Day 7 離別(關島)

(Day 7) 2014-01-10

住宿：Aqua Suites Guam

行程：關島

係五星級的家瞓飽後，由港女整埋D意粉及餃子做早午餐，食完仲有港女筒雪糕⋯

@1200

check out 後，先去太平洋戰爭公園，再去郵局由港女買郵票寄出佢寄比friend既十幾張post card； 我呢？ 無喎! 除非係好特別既地方我先會寄既!

當地死左位重要人物，全部下半旗

之後去到我黎緊一星期住既Aqua Suites Guam酒店； check in上房，更年期阿媽既牢騷又發作啦! 見到D茶包沐浴露開始鬧，前日Sheraton無refill既牙膚都仲講到今日! 之後我提議吓用埋呢兩個鐘去沙灘遊吓水啫，其實老豆都想去，阿媽就爆足十多分鐘，(因為阿媽唔想再開喼攞野)真係我都頂唔順⋯ 一入小小既房間把聲就爆足咁耐! 牆身都好似震裂咁呀! 拿拿林同港女換泳衣出門口，見港女面色都不太好，真為難了港女了⋯

今次去島國旅行，緊係陽光海灘啦! 唔計潛水，實質只係係羅塔島游了半個鐘水，所以港女都放棄去免稅店而去沙灘； 去既係Agana, D水係就好清，不過行到好出都好鬼淺水，又無魚睇，而且仲有tour不停玩水上電單車同香蕉船穿梭往來，都幾危險! 曬左陣又浸左陣水，約莫一個鐘走人。

返到酒店見兩老正食緊壽司卷物，原來佢地出去附近行，仲話附近有個保齡球場叫我一條友都去轆齡喎⋯ 我同港女沖涼後拿拿林去食野，食返早前食過好正既韓國餐館”世宗”，由於無乜時間，諗諗吓都應該食快靚正既而唔係呢度，攪到最後趕頭趕命去機場，又比阿媽鬧爆⋯

1830揸車係Departure放低佢地(佢地1925起飛)，諗住泊好部車就去送機，點知兜左兩個圈都無得比公眾泊，原來同香港一樣，carpark係arrivel； 無時間啦! 係離境層盡頭既拖車地帶都泊，走入去check in 櫃台，無晒人! 要去到保安檢查，見佢地正進行安檢，來不及跟港女擁抱，只能隔住個保安檢查處揮手，也跟兩老揮手道別⋯ 

於是急急腳返回話會拖車既位置攞車，見個天正直magic hour既尾聲，又無帶腳架，唯有借住架海關農夫車既車尾固定部相機啦! 點知影影吓有個警察搵支電筒射住我盤問⋯ 好驚呀! 會唔會搵電槍拮我架⋯ 好在問了幾句就趕我走⋯

諗住係機場附近搵個好位等待飛機起飛，但兜來兜去越兜越遠都搵唔到個好位⋯ 最後又去到K-Mark既大停車場，呆望機場； 自十幾年前搬出來一個人住以來，今個trip係跟兩老相處最長既一次時間呀! (以前日日返去食飯，自從幾年前阿媽突然話好辛苦劈炮唔煮之後，只係一星期返去食一次)

雖然阿媽既牢騷煩音真係好煩，但呢一刻身邊一個人都無，靜蠅蠅咁，又特然想聽返阿媽既鬧人聲喎! 一個人，無乜方向tim...

好! 又去關島最旺既杜夢區行行先，順便替港女交低要買既咖啡； 成日話要影聖誕燈飾既公園依家先影，行過免稅店，也行過數間既百貨公司，買了港女既咖啡，也買了姪女希希既行李牌，及老豆想買而又無買既鉛子筆。

路過大型水族館

街頭既刺激活動，好多日本人玩架!

健康飲食~