Day 12 出海觀豚(關島)

(Day 12) 2014-01-15

住宿：Aqua Suites Guam

行程：關島

今日book左出海睇海豚$50-USD。

一早起身係房食D野就夠鐘啦! 一落到大堂架車已到左，揸車接我既係老闆娘Judy,後面有日本兩父子。

開車後同時Judy交談，當佢知我係香港人後就講開我成日講既話題，佢話極少香港人來關島，來既大多來honeymoon喎! 最多日本人，跟住係韓國人，台灣人⋯ 唔怪之港女D港女朋友知今次來關島，仍然都話係”Not Normal”既地方啦! 

其實日本妹比港女更講究打扮，好有生活態度，表面睇落唔係更港女咩？ 點解我去過既落後地方都見到佢地既？ 好落後既烏茲別克，我見好多係一個㗎妹去tim! 8年前我去既無乜香港人去既波斯尼亞，已經見到有日本團啦! 

所以我膽敢講，香港人自稱熱愛旅遊既，但落後日本20年，台灣10年，祖國都可能5年了⋯ (講大圍，成日周圍去既blog友前輩係香港既另類) 

你睇連Lonely planet雜誌都出國內版，裡面有好多既內地人投稿，佢地全部唔係講去咩名店，而係去D冷門國度體驗，所以點解LP雜誌無出繁體版，現在係香港連LP繁體版旅遊書都不復見，佢唔係要為左賺人仔，而係香港跟本就無呢個市場! 

再講再講! 除左旅遊書，包括所有旅遊有關既野都係香港損手離場! 好似航空公司，冷門城市冒險來港辦航線一定死路一條(日，韓，東南亞除外)，就剛剛上次坐完既西伯利亞航線，就比我當時狠批一定執硬，現在唔係香港做蝕本生意啦! 轉左以聯營方式，經北京轉機⋯ 係大陸，有人去呢D山卡拉觀光，也有大量既生意人，而係香港兩種人都無，係香港攪實死緊啦! 我都慶幸搭到呢班直航機，感受到西伯利亞風光!

其實我唔係要同人比，而係我要去見識呢個世界，唔抵得比香港D井底之蛙話啫⋯ 關島係美國地方，都話Not normal喎! 真係井底之蛙到極點! 無計⋯

原本以美人魚宮主號帆船做招來既帆船，正值兩年一次例行安全檢驗，所以要坐另一首遊艇，船上十多人，全是來自日本家庭，有老有嫩有些BB； 

好似隻龜

當出海無耐就見到我第一次見既飛魚，飛得好遠架! 不過只得數條，但一閃即逝來不及影相⋯ 出到海追尋海豚，每人都全神貫注，後來去到其實都頗近岸既水域⋯  嘩! 唔係一兩條，係一大群呀! “卡娃依”之聲此起彼落，幾乎每一個人都講，當然除了我及職員啦~

咁啱尋日報名後，facebook有兩個fd post左兩條不同大量殺海豚既報道，分別係法羅群島及日本⋯ 當見到呢群海豚係旁邊游過，十分感動!

呢張相有好多架!

賞豚後去另一個水域釣魚作餘興，但只得一個人釣到咋! 個個都食白果⋯ 點解唔帶我地去D多魚既地方呢？

整個過程2小時15分鐘，再由老闆娘車我返去，其間梗係又不停傾計啦~ 有樣野好好笑既，原來台灣同香港都一樣，有D老夫少妻既問題，少妻唔使講明來自邊啦⋯ 呢D少妻為求攞台灣戶籍，專向老伯埋手，所以台灣對呢班人有個稱號，叫”收屍大隊” 哈哈~

老闆娘好好，知我去食飯，車到我去世宗韓國餐館呀~

午餐又係果味，不過Lunch有套餐就平D,亦都細碟D~ 食完後要係烈日當空30幾度吓步行半小時返酒店，真係攞命! (香港現時得10度)

@1400

仲下緊半旗

返酒店瞓個晏覺先~ 瞓左陣去租車，尋日話最平$25-USD一日既已租出，依家只得$35-USD per day⋯ 唯有租啦⋯ 架車02年，年份在我角度其實不太舊，但架車又殘甩甩離離，睇黎大撞過，揸落仲chokchok吓! 我諗架車都有好大問題，真係少D技術都唔得呀⋯ 希望捱到兩日，好在用來附近代步唔係去得遠啫~

返酒店攞好腳架，睇睇地圖選擇南西部一處地方，影magic hour! 自己一個人先有心機慢慢影相咋! 今日影magic hour 個plan 係佢地走晒，得返我一個既時候諗既! 我諗要有椰樹做背景影張magic hour~

去到構好圖，但又比我發現部相機無電得17%,當然又係無吸取教訓無帶後備電啦⋯⋯ 最衰之後同一名好好傾既退役美國海軍吹水，移過部相機來合照，當到日落後既magic moment出現後，我都唔夠膽開機用僅餘既電來慢慢研究⋯ 最後返酒店睇無張滿意⋯

回程路經Califorlia mart又買pack刺身先，今次係黃鰭Tuna $3.9-USD； 返酒店放低刺身，換個相機電，就出發去逢星期三先有、上次一家人去既查莫洛夜市行街＋食飯。

兜左個圈，同上次一樣好多人，今次可以認真行吓! (因上次諗住先食飯，但食完飯9點零已收晒檔⋯) 其實夜市除左做生意，仲有係比當地原住民一星期一日既聚會，見廣場有隊老band, 一啤啤既老人家跳舞或者坐係廣場，睇個樣應全是原住民。

當地人

查洛莫傳統舞，唔怪之去餐廳食野既份量咁大啦!

諗住食上次由韓國人經營既餐館，點知已連續兩次無開⋯ 今日咁旺都唔做生意既？ 於是食第二間設計得好有特色既餐廳，BBQ Rabbit魚,味道麻麻⋯