2015年9月11日 星期五

15橫渡非洲之旅(前言/準備)

罪案、黑暗、暴力、貧窮、飢荒、疾病⋯ 彷彿就是非洲代名詞,尤其是撒哈拉沙漠以南。我就係想親身去睇吓係咪咁恐怖,所以這次可能是銀仔歷來最艱辛之旅。(港女按:身邊朋友有啲已消化到我近年的「驚人」舉動,有啲仲問我點解要去呢啲隨時俾人食咗都唔知嘅地方。)








我已不是第一次踏足非洲,不過之前兩次都係去北非,不論文化及人種感覺較似去了中東。
撒哈拉以南相信較貼近我們想像中的非洲,對於熱愛旅遊嘅我,覺得橫道非洲絕對是一個旅遊人生上必定要做的一件事!現在西非伊波拉疫情減退,部份有派系鬥爭嘅地區亦平靜下來,加上我還算年青(其實就嚟四張)絕對是實現呢個旅程嘅好時機!
畢竟假期唔多,看地圖時選擇了一條較短嘅路線橫渡非洲。身邊好多朋友知我去非洲即時問我係咪去肯雅?南非?睇大遷徙?或者近年才興起嘅馬達加斯加?通通都錯!首先,「大遷徙」並不是我今次去非洲嘅主要目的,其次是銀仔鍾意去冷門國度嘛… 有人會問非洲仲唔冷門?我就係想去冷門中的冷門!
初步路線我會由東非嘅印度洋,終止於西非嘅大西洋。東非起點會定於較冷門嘅莫桑比克的一個同名沿岸小島,旅程將於納米比亞嘅Luderitz終結。
今次橫渡非洲旅程,我會先一個人浪遊,後半段由港女陪伴來完成這旅程。銀仔會於較為熱門,有三大瀑布之一嘅維多利亞瀑布嘅贊比亞城市Livingstone接港女機。
認識銀仔耐嘅都知我無既定嘅行程,又無planning,不過心目中都有幾個必去地點嘅。本行程起點莫桑比克嘅同名小島、贊比亞及津巴布韋邊境嘅維多利亞瀑布、入一個國家公園Safari、納米比亞土著紅泥人及沙漠廢墟。所以心目中都有大致會去那幾個國家,而簽證上做了少少資料統計:



為何搵埋中國護照?因為這些國家通常接觸最多是中國護照,尤其偏門嘅陸路關口,當地官員可能一生從未遇過香港人!銀仔歷來有好多用「特衰護照」嘅不快經歷,之前算是先進國度,但今次是極為落後的地區,避免過關時被誤以為中國護照被屈錢,可衡量埋選擇BNO還是特區有利嘛!(睇情況特區有利D,但應該會被屈)


第一站莫桑比克是必須簽證,所以都係香港辦理穩妥一點。不過位於中環嘅領使館維修,曾經摸門釘。辦理過程手續簡便,先Fax黃熱病針紙、護照及有照片嘅表格。過幾日confirm後帶回正本文件,最快可上午放低下午取回。收費$850,好貴呀!


至於防疫針,根據上次去南美時的旅遊經驗,再次預約不為港人所知嘅「衛生署旅遊健康中心」見見醫生。
由於黃熱病針有效十年,我對上一次是2011年去南美前注射,所以打少一針,只打了傷寒及甲型肝炎,港女就要捱足三針了~ 哈哈!
不過去到最難抉擇嘅就係瘧疾藥物,我上次去南美無入亞馬遜,只是短暫停留算是極高危嘅巴拉圭,所以只靠做好防蚊,而無服用藥物。今次長時間逗留瘧疾區域,都係乖乖聽醫生指示食藥吧!我們有三個選擇,價錢分別是$100/$2xx/$1xxx,相差好大呢!除了價格有極大差異外,不論貴或平都有不同程度嘅副作用,有些服藥後甚至會有幻聽幻覺精神病痙攣。最後選擇了貴十多倍價錢,副作用較少嘅藥物「氯胍」。由於我旅程較長,所以藥物也較多,淨係藥物就要成$2140了⋯ 不過醫生話政府已經賣平左比我地,話這種藥如其他地方買需要$90一粒,即貴2/3價錢。最後藥物疫苗診症費用共$2760,港女平少少$1690。好肉赤呀!!
上次去中亞要搞邀請函,又要申請Visa,寫咗篇名為「未見官先打八十」,咁今次是名符其實的「未見官先打一百八十」呀⋯



近期三色台洪永城拍嘅北韓特輯又被人圍攻,雖則他早前嘅《峰火大地》我都覺得有點誇張失實,但畢竟自己都未曾去過、未曾親眼所見,就不便評論了。
好像俄羅斯,大部份人覺得俄羅斯好危險,但就竟然無擔心過意大利、西班牙、法國。我問這些人有否去過俄羅斯?原來無。為何無去過又知道當地危險呢?究竟點危險呢?以上地方我就去過,俄羅斯算是曾踏足三次添,就算去過咁多次又如何?俄羅斯我可以話比人聽好安全,這幾次旅程長則停留十日八日,短則停留兩三日。但是每個人的遭遇都不同,我見嘅事又唔同你所見嘅,所以就算去過幾多次都好,這國家咁大,見嘅都未必係事實嘅全部。
所以我自愛上旅遊後,不論是否關於旅遊,人們口述的、媒體報道的,如我無去過、無親眼目睹,都不會亂加評論。
伊朗好邪惡?印度對於女性極度危險?南美治安好差?網上可以搵到好多正面嘅旅遊經歷。伊朗有去過人嘅認為是是世界最友善嘅民族,印度亦都有好多單獨女生獨自去過,他們都有好多愉快嘅經歷。其實講到尾,「危險」每個地方都有,只不過你識唔識去避開啫。與其道聽塗說,再隨口噏,不如自己親眼睇吓吧!因此,我近年喜歡去D較冷門嘅國度,其中一個原因就是想親眼睇吓這世界,看看是否大部份人所講咁危險,亦不知不覺對於探索世界樂此不疲。我亦相信大部份熱愛旅遊嘅人,絕對唔會道聽塗說,是會自己尋求真相的。


拍攝裝備:
今次拍攝裝備以輕便、便宜為主,亦有被偷被搶嘅準備。昂貴器材唔帶了,改帶質素絕不遜色,但超輕超平嘅M4/3 Panasonic GM1s,Kit set套裝只需$27xx,真係平過傻瓜機呀!由於今個行程可能會去國家公園影動物,望遠鏡頭跟笨重絕對是等號,也很昂貴,所以也不浪費金錢,改為買了部長炮Canon G3x傻瓜機,另外帶多部幾舊水嘅「山狗」以便上山下海。

其他準備:
剃頭 - 其實是型仔版鮑魚刷,唔知點解覺得流落非洲梗要做的事。
留鬚 - 又係唔知點解流落非洲梗要做的事,可能被電波少年影響到。出發前剃乾淨,不出幾日相信已經會好多鬚根了。
MP3 - 大熱是舊劇集歌曲,大時代、譚詠倫;另外有關於非洲愛與和平嘅We are the world、Beyond嘅Amani、光輝歲月作這旅程嘅主題曲。



出發!一個月後見~

50 則留言:

  1. 銀仔, ENJOY YOUR TRIP!!
    橫渡非洲是冷門地方, 路線真的是神級旅遊路線. 我LIKE.....
    期待你的旅程分享!! ~~

    回覆刪除
    回覆
    1. 神咩吖見笑了~
      回來後再慢慢分享。

      刪除
    2. 係呀Bell,回來往忙緊其他野,多謝掛念~

      刪除
  2. 銀仔真係好,有銀嫂同你一齊出走地平線!玩得開心D~~~

    回覆刪除
    回覆
    1. 佢唔陪我都會自己出走架呵呵~ 就好似前半段佢無假期一樣。

      刪除
  3. 一個月?!!!!!
    非洲我膽心係衛生問題。

    回覆刪除
    回覆
    1. 係,中途疴左幾日,不過依家疴清晒無事。

      刪除
  4. 期待看你的跨越非洲一個月探險之旅....@@
    雖然花費不菲,不過針藥真係唔慳得,尤其係你喱類長途探險之旅,最煩就係(touch-wood)途中病了!!!
    祝團長和銀嫂今次玩得開心平安歸來,畀多啲新奇有趣歷險鏡頭我地睇下.......如果途中住宿有wifi,希望upload一兩張相來先睹為快啦^^

    回覆刪除
    回覆
    1. 多謝基爾!
      不過行程無帶notebook,只帶了I pad,唔知點upload上blog,都係回來後慢慢分享吧!

      刪除
    2. 回來了,因早前忙緊其他野,依家要開始寫我未完成的旅程啦~

      刪除
  5. 幾個個禮拜無時間上來,極速追回你的南法遊記,看到這一篇才知道原來你又出發了,厲害!
    我也深感旅遊地點治安問題多是傳媒渲染,我本人隻身遊印度幾次,有朋友一次都沒去過,卻力勸我別去印度,說女遊客在印度不安全,不能去,哈!不過,安全意識一定要有,意大利西班牙的罪案亦不少,至於俄羅斯,最大的問題不是暴力搶劫,而是穿著制服的人扮警察敲詐,真假難分最難應付,我就有親身經驗。

    回覆刪除
  6. 去山卡啦地方,簽證、打預防針真係所費不輕。那年我經吉爾吉去絲路,真係同你一樣咁肉赤。
    今年我去南非同 Swaziland 選擇七月,七月南半球是冬天,一般少蚊,可免吃 Malaria 藥。這邊 malaria 藥也是十歐一粒,相當昂貴,同時亦有副作用,所以能免則免。
    銀仔路缐很有趣,應可看到很多殖民對非洲文化的影響。 Namibia 很先進安全,曾有朋友帶過當年仍得十歲的女兒踏單車漫遊 Namibia,回來後讚口不絕。祈望銀仔的非洲遊記,加油!

    回覆刪除
    回覆
    1. 很高興六斤前輩再探望! 係呀,走了一半路程,最深刻殖民史算是莫桑比克了,因為達咖瑪。
      暫時來講很安全,甚至比歐洲部份城市更安全,我可以很安心咁一個人夜晚在街上行走,或背住背包搵住宿。

      刪除
  7. 我唔敢去嘅就睇你遊記好喇!

    回覆刪除
    回覆
    1. 平平安安!玩得開心DDD ~

      刪除
    2. 中秋節快樂 !玩到邊樹呢?嘻!

      刪除
    3. 中秋節快樂呀JJ~
      於贊比亞會合港女後開始豪華fing錢之旅,玩了好多洗錢活動。。。現在身在津巴布韋,明天算是尾聲自駕遊納米比亞十天。
      唔好唔敢啦,有好多外國女仔都一個人嚟,而且我暫時咁多日來講全部都好安全,可以一個人入黑後行走或搵住宿,感到比歐洲部份城市還安全呀!而且非洲黑人也極之友善。只是有些地方極危險如約翰內斯堡及肯亞內羅比,但唔代表整個非洲。所以我這個行程很愉快,推返好多對非洲嘅誤解,回來慢慢給大家分享吧~ 也再拜訪大家。

      刪除
    4. 返左啦,多謝掛念~
      早排太忙了⋯

      刪除
  8. 很期待你的旅程分享!

    回覆刪除
    回覆
    1. 也期待你美國國家公園之旅呢~

      刪除
  9. 明明之前有在此留言,何解消失了?應不是被刪除吧,我沒有寫粗口呀....

    回覆刪除
    回覆
    1. 咁你寫過乜留言呀?應該無咁少噃。。。

      刪除
  10. 非洲都係我好想去嘅地方,不過鍾意咗滑雪之後,呢個地方要遲d先可以去...

    回覆刪除
    回覆
    1. 南非有無得滑呢? 唔知。。。
      我自去完安道爾後突然都想學滑雪呀!

      刪除
    2. 作者已經移除這則留言。

      刪除
    3. 快D學啦,我好後悔學得太遲呀!

      刪除
    4. 但我傷過波羅蓋兩次,唔知冒唔冒險好⋯

      刪除
    5. 銀仔,瘧疾藥係咪要日日食架,我未得閒去問醫生,問咗你先,你有無咩副作用出現?

      刪除
    6. 我呢隻係呀日日食架,我好彩無副作用。有D一星期食一次,隻隻唔同。
      比個site你睇來比較吓D藥。
      http://www.travelhealth.gov.hk/tc_chi/travel_health_advice/anti_chemopr.html

      刪除
    7. 幫你諗埋,就貴果隻啦!

      刪除
    8. 我打算順便去埋印度,打得針,食得藥就一嘢過!

      刪除
    9. 拮左幾針去埋印度,咁似港女講嘅野嘅?

      刪除
  11. 期待你呢次既非洲遊記~~~!
    每次睇你既遊記都好似自己會去一次噤!
    玩得開心d & 小心安全!

    回覆刪除
    回覆
    1. 好似自己去咁?真定假呀tina,哈哈~
      暫時大半程都很安全,多謝關心。也想介紹給多點香港朋友去感受非洲人嘅友善。

      刪除
  12. 銀仔,我係呀文,去到邊站?祝你同你嘅港女有個愉快旅途,出入平安!

    回覆刪除
  13. 回覆
    1. 我個blog通常唔見樣噃~ 呵呵~

      刪除
  14. 上次留言梗係寫左一大段啦,後來見竟然神祕消失,已無興趣再打過,亦唔記得之前講過乜。

    回覆刪除
    回覆
    1. 咁無計啦⋯ 咦! 見你來探我應該展開了新行程噃!

      刪除
  15. Silver,佩服,佩服等看你的非洲的旅遊Blogs.

    回覆刪除
    回覆
    1. 多謝捧場,最後階段仲有你鍾意嘅自駕遊添~

      刪除
  16. 「型仔版鮑魚刷」,你唔好隔空讚自己,總之----無圖無真相!

    俄羅斯係我想去嘅地方,想18年感受下世界杯嘅氣氛,不過要帶埋囡囡去,唔知去唔去得成,如果有需要,到時再請教你!

    2xxx蚊嘅藥是必須的,唔通你想有幻聽幻覺精神病痙摩咩> <......旅行重要,但健康更緊要!

    回覆刪除
    回覆
    1. HEHE~ 有一篇已出左樣呢~
      咦! 兩年後,小朋友識行識走開始有點記憶,應該是一個唔錯的睇驗。俄羅斯我都是蜻蜓點水啫,不過都希望盡量幫到你~ 等你!
      去完才發現,我去嘅地方8成係無蚊患,真係"非洲"一字難免令人杯弓蛇影。如再去D地方真係check清楚,無謂嘥錢。

      刪除