Day 7 高度戒備(西班牙巴塞隆拿)

(Day 7) 2015-04-07

住宿 : 民宿Kevin Toulouse

行程 : Port-Bou —> 巴塞隆拿

今早清晨5點幾起床，尋晚半夜窗外風聲颯颯，天氣應該十分寒冷。大家於住宿食尋日買嘅麵包作早餐後就出發！先幫團友們搬行李落三層樓嘅住宿，再搬超長梯級上火車站，辛苦過擔泥...

往巴塞火車0730開出，尋日車站職員話唔可以預購，售票機也買唔到，所以由港女趕去買車票，兩個多小時嘅車程每人€13.9。上了火車，我地就開始擔憂巴塞的治安了⋯

途中有對英籍夫婦坐我地對面，又傾咗一輪，當然唔少得提我地小心財物。

巴塞隆拿

一到巴塞火車站，各人打醒十二分精神，仲自創三人防守陣，可惜有姿勢無實際。出到戶外的士站搭的士，選擇了一部旅行版的士夠放晒D行李，便前往港女早一晚預約好嘅民宿。到埗時的士咪錶跳到€9.8，同屋主講嘅吻合，加埋4件行李共€15.8。

先講民宿，雖然無𨋢，又要銀仔做咕哩。不過位置一流，位於市中心，步行往著名嘅聖家堂只需幾個街口。民宿內環境唔錯，兩房一廳開放式廚房，有個大平台。我地比原定時間早到，鐘點工人仲清潔緊。屋主是法國人，熱心地介紹每個區域嘅特色。佢亦好細心地整咗個file，內裡有巴塞嘅資料，包括景點、餐廳菜單、地鐵路線圖等。屋主亦提供手提電腦、音響，比對面的Ibis酒店更抵住。

安頓一切又搵食喇！於街道上行走細心留意市內建築，果然設計獨特，好有藝術噃，同歐洲其他城市有顯著分別~ 自尋日進入西班牙Port-Bou時已留意到，街上只看見加泰隆尼亞旗幟而看不見西班牙國旗，語言亦是用Catalan，而非西班牙文。巴塞市內嘅加泰隆尼亞旗幟就更多，自我意識也較鮮明。加泰隆尼亞與西班牙的文化、語言不同，令我想起今日本土意識才抬頭嘅香港。

之後去屋主推介，又話經常會去食嘅墨西哥餐廳。不過可能上個旅程都去過墨西哥，對墨西哥食物感覺麻麻，而且這間餐廳也較昂貴⋯ 價錢一樣，都係食西班牙炒飯好過食墨西哥粟米片。

午餐後前往幾過必到景點，先路過聖家堂（稍後先入內參觀），然後前往名店林立嘅加西亞大街Passeig de Gràcia。

於聖家堂外，愛狗人士高Ling對一名老伯伯正在放狗感到興趣，老伯伯都好樂意將狗給我們每人合照。當合照完畢，該老伯露出真面目，就係問我地攞錢，話要買狗糧。我地當然「扮痴扮傻蜜絲佛陀」，扮唔識聽離開啦，哈哈~ 經此一役，我地喺巴塞的戒心又多一重。

於聖家堂附近見有雪糕店，愛好甜品嘅團友們當然唔放過啦！不過他們始終鍾情南法Fontaine嘅雪糕店。

食完雪糕繼續步行前往中心大街，即加西亞大街Passeig de Gràcia。這裡名店林立，也有很多必到景點，如名建築師高第傑作「毒瘤」之家、「米拉屎」之家等。不過由於入場費幾貴，銀仔唔捨得，團友對入內嘅意欲也不大，所以大多於外面欣賞。

行街期間，跟我早前去歐洲一樣看見有好多當地人用單車來代步，他們大多穿著上班服。香港則唔同，幾乎全部都是約埋一大班人踩單車作娛樂。由於出發點不同，所以部份香港人踩單車太多險象環生嘅場面，或一隊車隊霸晒整條行車線來嬉戲。車輛駕駛者對單車於馬路上行駛嘅知識薄弱。當然另一大問題就是香港對單車嘅配套嚴重不足啦！及後我地見有借單車嘅地點，於是問當地人，佢地話呢啲單車唔係俾遊客用。

來到歐洲，「購物」係女士們是指定動作。銀仔旅行時不太愛逛名店，之前去咁多次歐洲爛身爛世都唔夠膽入，就算入都無錢買，今次都算是破例入內參觀了。

行到攰於露天茶座食茶點，於名店街食個Tea 4人共€22，一D都唔算貴了。有churros同咖啡，都係古巴嘅churros好食啲，而且侍應臉色非常難睇。（港女按：部份名店有人排隊，好似尖沙咀廣東道。）

茶點時計劃今日餘吓嘅行程，大家決定趕去有好多馬賽克嘅Park Güell看日落。先去搭地鐵，買票時大家都提高警覺。團友們都好聽我嘅忠告隨身物品不要外露，最好兩手空空。高Ling、Ellen將D袋，大相機收係褸裡面，攪到好似大肚婆咁，哈哈~ 由於網上太多於巴塞被偷被搶嘅經歷，身處十大搶劫城市之首，都係小心為上好。

地鐵站時高Ling手持自拍神棍咁樣街，仲有賊敢埋身咩! 哈哈~

於公園最近嘅Alfons站落車，幾經問人吓，好趕咁往山上行，大家為了日落前上到公園，行到港女面燶燶添... 入場費每人€8

Park Güell景觀一流，可看到市內全景及遠眺地中海，也有我很喜歡嘅馬賽克。可惜已日落西山只剩晚霞，影風景唔錯，但要影建築物及馬賽克已唔夠光，我技術差影得唔靚⋯

@0630

園內遊覽了個半鐘，天已黑齊於另一面離開。 於出口處有個臨時收費洗手間，要€0.5一次，我們四個都要去⋯ 高Ling見無人就開心大發現，慳番少少啦！正直誠實嘅人不要學⋯

於黑暗嘅街道落山，去到另一個地鐵站搭車回近住宿嘅聖家堂站，就於聖家堂斜對面的一間就打烊嘅餐廳晚飯。飲品叫了一大瓶Sangria，食物方面點了西班牙炒飯、Pizza、燴牛腩。西班牙炒飯麻麻，但燴牛腩就好入味好好食。

晚飯完帶點醉意步行回民宿，乜嘢警戒心也放下了。

@1030

讀萬卷書不如行萬里路之”建築師高第”：

(取自Wiki)

安東尼·高第·科爾內特（加泰羅尼亞語：Antoni Gaudí i Cornet，1852年6月25日－1926年6月10日），西班牙「加泰羅尼亞現代主義」建築家（Catalan Modernisme，屬於新藝術運動），為新藝術運動的代表性人物之一。

高第出生於加泰羅尼亞雷烏斯，世代是做鍋爐的鐵匠，所以他天生具有良好的空間解構能力與雕塑感覺；又因小時患有風濕病而不能和其他小朋友一起玩耍，高第便把興趣放到觀察大自然上，為他日後成為師法自然的建築師奠定基礎。高第從觀察中發現自然界並不存在純粹的直線，他曾說過：「直線屬於人類，曲線屬於上帝。」所以終其一生，高第都極力地在自己的設計當中追求自然，在他的作品當中幾乎找不到直線，大多採用充滿生命力的曲線與有機型態的物件來構成一棟建築。

高第是五兄弟中最小的一個，因受到父親的鼓勵而到巴塞隆納讀建築系。1878年，瓷磚商馬紐·維森斯（Manuel Vicens）委託高第設計一棟避暑別莊，叫做維森斯之家（Casa Vicens），高第從此展開設計生涯。然而維森斯之家並不是高第最經典的作品，高第在接下來的幾個作品當中，才漸漸樹立起自己獨一無二的建築風格。1878年高第也認識了他最重要的贊助者，顯赫的歐塞比·桂爾先生（Eusebio Güell），奎爾先生驚於高第的天才，從此委託高第設計墓室、殿堂、宅邸、亭台等，使高第能充分自由地表現自我，發揮才華。高第的許多作品除了表現極強烈的個人風格之外，也對往後的現代設計乃至於後現代建築設計提供了許多養分。

高第終生未婚，除了工作，沒有任何別的愛好和需求，聖家堂是他最偉大的作品，他把一生中的43年都貢獻在那裡，1925年還乾脆搬到教堂的工地去住，全心全意研究教堂的結構設計，1926年6月7日的下午，高第完成當天的工作從聖家堂到市中心的教堂做禮拜，被一輛電車撞倒。當時他衣衫破舊，路人以為是流浪漢，把他送到聖十字醫院，並在三天後去世。同年6月12日，高第的葬禮隆重舉行，前來送葬的隊伍從聖十字醫院一直緩緩地延伸到了聖家堂。高第被安葬於聖家堂的地下墓室，這座大教堂迄今尚未完工。