歐非之旅後記

相隔左4年再寫返既遊記,有幾樣野覺得有好大感覺! 最大感覺就係物價! 呢4年間我既旅行仍然繼續,

Day 18-19 歸心似箭(馬耳他)

(Day 18-19) 2008-10-20 ,21住宿 ：航班上

行程 ：馬耳他 --> HK

 

 

今日要返香港啦~ 食飽早餐收拾行裝,係早上1000離開住左成個星期既St.Greoge Bay啦~

Day 17 依然無所事事(馬耳他St,Greoge Bay)

(Day 17) 2008-10-19
住宿 ：Gorgianis Hotel

行程 ：St.Greoge Bay

瞓醒已過了早餐時間,於是食埋係香港帶過黎既杯麵,唔食唔通帶返香港咩! 不過諗諗吓呢個杯麵都跟左我十幾日啦~

Day 16 藍洞(馬耳他Blue Grotto)

(Day 16) 2008-10-18住宿 ：Gorgianis Hotel

行程 ：St.Greoge Bay --> Blue Grotto(藍洞)> St. Greoge Bay

返來馬耳他,只係第一日去左藍湖Blue Lagoon,之後就日日無所事事,遲遲未去既另一個藍Blue Grotto(藍洞),就決定今日去!

Day 15 中心的中心(馬耳他Mosta)

(Day 15) 2008-10-17住宿 ：Gorgianis Hotel

行程 ：St.Greoge Bay --> Mosta --> St.Greoge Bay

食完早餐後,今日要去一個地方,叫Mosta!

由於我住係St.Greoge Bay,所以9成9既目的地都要去首都Valletta轉車架!

Day 14 癡呆在海邊(馬耳他Sliema)

(Day 14) 2008-10-16

住宿 ：Gorgianis Hotel

行程 ：St.Greoge Bay --> Sliema --> St.Greoge Bay

尋晚唔知係咪飲左D酒關係,11點上床,典到成半夜2點仲眼光光...

早上瞓到0800又好自然醒左,個肚又呼喚我食早餐啦~ 同尋日一樣,擦完牙去街口間酒店包埋既餐廳食早餐,食完返酒店擦完牙再瞓過!

Day 13 奢侈的旅遊生活(馬耳他St.Greoge Bay)

(Day 13) 2008-10-15住宿 ：Gorgianis Hotel

行程 ：St.Greoge Bay -->遊車河 --> St. Greoge Bay

Last呢個星期好多時都係... 食-->瞓-->食-->瞓...咁樣做好似好浪費難得旅行既日子!今次第一次用咁多日去玩同一個地方,用上九日去玩只等於香港三分一大既馬耳他,由於真係有太多時間啦! 所以就初步計劃隔一兩日先去一個主要景點,尋日已去完,今日就係休息日,連自己都覺得奢侈呀!

Day 12 有人喜歡藍(馬耳他Comino)

2008-10-14（Day 12）
住宿 ：Gorgianis Hotel

行程 ：St.Greoge Bay --> Comino --> Gozo --> St.Greoge Bay

早上食酒店包既早餐,不過係要出去外面既一間餐廳食,原來又係尋晚食過果間喎! 仲要唔使証明你係住客,咁咪阿豬阿狗都可以食囉!!! 開係中國人地方真係執左9世…

相隔幾年,再續馬耳他

話晒都隔左咁耐，先寫少少引言吧〜
呢過旅程斬件左幾次來寫，橫跨數年，依家一於要的起心肝寫埋佢！
話說呢個旅程，繼續 我呢幾年內既一個人流浪既作風，而今次旅行既style亦有大膽嘗試，就係事先極少資料搜集•••

不吐不快，又係哈薩克

有睇無線新聞既話，講述早前一個香港人，由德國踩單車回港既報導；經過多國，沿途都相安無事，唯獨偏偏又係哈薩克，主角由俄國入境，橫過哈薩克，係邊境正要離境返入中國時，同我當年一樣，又係無去移民局蓋印而唔比離境，當地關員仲一定要主角返阿拉木圖蓋好印先比離境呀！當主角再踩單車回阿拉木圖時Visa已經過期，差人仲嚇佢將要坐監Tim... 最後主角話比左$800-USD先攪掂。

如果係我，又有時間，一於發窮惡零願坐監！

哈薩克呢D咁既惡法，簡直同去搶無分別，加上依家香港又有直航機去，諗住一心探索神祕中亞既朋友，真係唔知道仲有幾多人會賴野呀！哈薩克呢個國家真係離晒普！

（我當年既慘痛遭遇，都唔想再三提及，自己搵吧！）

一次過滿足晒三個人生願望

呢個旅程，起初就係為左單單既北極光，因為今年係太陽粒子高峰期嘛~ 北歐多國，我選擇左曾經破產，比較便宜既冰島作環島遊！

Day 41&42 兇姐你好野! (南美完結篇)

2011-03-18 & 19(Day 41,42)
住宿 ：航班上

行程 ：荷蘭AMS --> HKG

係1300時到達阿姆斯特丹(AMS),關員Block左登機閘口截查假証,對象係南美人,中國人竟少有被放行喎! 不過排隊時有見到影衰晒既強國人打尖,人地個個係登機橋排隊得有秩序,你就要係旁邊D空隙打尖行前,唔通要D人排到塞到無空隙,先制止到你打尖???

同隔離果個宣洩不滿其間,後面打尖既同路人聽我鬧可能感到羞恥,乖乖排係我後面... 係羅...咁先至係個有文明既中國人嘛~

由於晚上先登機,係AMS等候其間都不愁寂寞,有小型圖書館,又有畫展行,好容易打發時間~ 不過機場提供既Free Wifi就有時間限制...

Day 39 貽笑大方(秘魯利馬)

2011-03-16（Day 39)住宿 ：Hotel President

行程 ：智利Easter Island --> 秘魯利馬

 

 

今早再食多次住宿提供既豐富早餐

旅館主人既家庭好Nice

早餐也豐富,十分滿意

只不過就有我既死敵... 曱甴...

係酒店既草地,花園都屍橫遍野

好在係房間內無發現啫...

Day 38 我愛南太平洋(智利復活節島)

(Day 38)2011-03-15
住宿 ：不知名住宿

行程 ：智利Easter Island

Lonely planet 及網上係咁形容復活節島的:

“復活節島是世界上最與世隔絕的島嶼之一，東距南美大陸有3700公里; 西面離最近有人定居的皮特開恩群島也有2,075公里距離”

Day 37 "謎"(智利復活節島)

(Day 37)2011-03-14

住宿：不知名住宿

行程：復活節島環島遊

瞓醒先係旅館食包埋既豐富早餐，有自家香蕉同鮮渣果汁。好有島國特色既早餐，慢慢食，十分享受~ 我諗呢餐如出去食，一定又過百港紙呀!!! 特登食淨塊火腿用來夾麵包及香蕉打包用來中午食先~ 係復活節島旅遊，飲食上真係要慳得就慳呀!

Day 36 遠在天邊的Moai(智利復活節島)

(Day 36) 2011-03-13
住宿：不知名住宿

行程：秘魯利馬 —> 智利復活節島

 

4個多小時既機程，係0530天都未光，終於到達迷一樣既復活節島啦~未有計劃來南美之前，只是從書本上看到有Moai石像既復活節島，感覺是多麼的遙不可及。

排隊等候入境期間，有D staff應該兜售tour，仲見有好多人即時報名添!

Day 35 又遇問題(秘魯Cuzco)

(Day 35) 2011-03-12
住宿：飛機上

行程：Cuzco —> 利馬 —>復活節島

25小時既車程，係1500終於到達秘魯首都利馬。係成個車程入面，頭半段係崎嶇既山路，九曲十三彎，從海拔三千多米既高地一下子去到水平面。

Day 34 日本311大地震(秘魯Cuzco)

(Day 34) 2011-03-11
住宿：巴士上

行程：Cuzco —> 利馬

高度:海拔3700米

清晨比手提電話Smartone既一個SMS嘈醒，內容話日本發生8.8級大地震，仲引發大型海嘯Tim!!! 所以即時起身開電視睇CNN，當然關心地震之餘也關心後日將會去，係南太平洋既復活節島啦! (當時唔知咁大劑架! 所以只擔心我既行程)

Day 33 人狗情未了(秘魯Aguas Calientes)

(Day 33) 2011-03-10
住宿 ： Hostal EL Solan $50-Sol ($150-HKD)
行程 ：Aguas Calientes —> Hydroelectrica —>

Santa Maria —> Cuzco

最高高度 :海拔4550米

起床食埋酒店提供”貴夾唔飽”既早餐後，係早上9點鐘裝滿水壺就出發Lu~

今次離開，一樣唔比觀光列車賺我地錢，一樣係步行離開。不過今次唔走回頭路，一於試吓Lonely Planet所講，而且係討論區無香港人提及過既路線先~ 呢條路線就正正係當日入村時既另一面。於是我後面背著大背囊，前面背著手拉背囊，同斜孭相機袋出發!

今天既天氣係… 又回復返烏雲蓋頂，毛毛細雨啦! 呢度天氣真得意，又會隔日天晴,隔日落雨既!

Day 32 天空之城(秘魯馬丘比丘)

(Day 32) 2011-03-09
住宿 ：不知名Hostal $50-Sol ($150-HKD)
行程 ：馬丘比丘

高度 :海拔2500米

 食早餐時真係火滾! 話說尋日入住時加多$10-Sol($30-HKD)既早餐，原來只係一人一個麵包加一杯茶，邊夠食呀!!!

咁就收我地每人$30港紙! 於是出去舖頭買定D麵包一陣食，買左6個大麵包都只係$2-Sol咋! (即$6-HKD)

Hostal收咁貴仲唔係禁住搶？ 返黎Hostal仲特登”樣”袋包比老板娘睇tim!

Day 31 歷盡艱辛(秘魯Aguas Calientes)

(Day 31) 2011-03-08
住宿 ：不知名Hostal $50-Sol ($150-HKD)
行程 ：Ollentanbo —> Aguas Calientes

高度 :海拔2800米

從窗口透進光線，原來已經天光，望一望電話已經6點啦! 成晚久唔久就有人係門口行過，都唔知係咪壞人，令到我提心吊膽； 而且天氣寒冷，件褸只蓋到上身至Patpat，腳部得不到足夠既保暖，成晚都凍醒； 再者雖然有張毯毯住瞓，但地下太硬太寒冷啦… 總之就瞓吓醒吓啦!

續Day 30 荒郊爛屋(秘魯Ollentanbo)

(績Day 30) 2011-03-07

住宿 ：荒郊爛屋
行程 ：Ollentanbo —> 印加路軌Km94

高度 :海拔3700米

食完豐富既秘魯午餐，就去到中央既一個廣場，會合飯前認識既智利情侶，發現佢地再搵多一啤阿根廷情侶加入呀! 都係唔識講英文… 所以只係得智利男識英文咋!

Day 30 專貴列車(秘魯Cuzco)

(Day 30) 2011-03-07

住宿 ：荒郊爛屋

行程 ：Cuzco庫斯科 —> Ollantaytambo

高度 :海拔3700米

7個多小時車程,係晨早0530到達被喻為全南美最古老城市既庫斯科Cuzco，個天啱啱才亮起來~

由於時間所限,必有取捨… Cuzco就諗住是過境性質，要盡快去有天空之城之稱既馬丘比丘(Machu Picchu)

Day 29 美食在秘魯(秘魯Puno)

(Day 29) 2011-03-06

住宿 ：長途巴士上
行程 ：Puno —> Unos Island —> Puno —> Cuzco

高度 ：海拔3660M

晨早0830起床，爭取僅餘既時間用Netbook既視頻，睇左十分鐘利物浦對曼聯既大戰…

秘魯Puno係的的喀喀既湖畔城市，也是南部通往玻利維亞既邊境城市，所以有不少遊客都專程到訪，或感受的的喀喀湖或過境~ 我就係過境之餘，也想感受埋秘魯這邊既的的喀喀湖啦~

Day 28 嗅名遠播的關口(秘魯Puno)

(Day 28) 2011-03-05

住宿 ：Hostal ArcaIris
行程 ：Sol Island —> Cabacabana —> Puno(秘魯)
高度 ：海拔3660M

一早起床就趕落山，搭1030回Cabacabana既船；落山其間再一次見識到當地人既神乎其技啦!

D當地女人個個都背住一大袋既野，有D背著半個人既行李，有D背著Baby，有D背著枱、櫈、柴枝等等… 他們於山野間表演深厚既輕功凌波微步! 爬完我們頭後，轉眼間消失得無影無蹤，早已被山下既林木所遮蓋…

Day 27 享受的的喀喀湖(玻利維亞太陽島)

2011-03-04（Day 27)
住宿 ：Hostal ArcaIris
行程 ：Sol Island太陽島
高度 ：海拔3660M

今日換左住宿,位置係原先住宿既下面,價錢亦都只係半價,$40-BR一晚咋！
房間景觀一流,躺在床上已可欣賞到美麗既的的喀喀湖景啦~ 比尋日既更好~ 只是規模大與小既分別吧! 而規模小，主人亦相對nice,呢個暫時係我旅行歷程裡,不變既定律!
咁既價錢有咁靚既景觀,真係物超所值呀！

Day 26 的的喀喀湖(玻利維亞太陽島)

(Day 26)2011-03-03
（住宿 ：Hostal Las Islas
行程 ：拉巴斯--> Copacabana --> Sol Island太陽島
高度 ：海拔3660M

係酒店用$12-BR食左個早餐,好急好趕咁搭0815開出既巴士; 搭巴士前除左車票,原來仲要比多$2-BR唔知乜野既收費先可以上巴士架！

續Day 25 恐怖的巫婆市集(玻利維亞拉巴斯)

2011-03-02（Day 25)
住宿 ：Hostal Tambo de Oro
行程 ：Uyuni --＞ 拉巴斯
高度 ：海拔3660M

係酒店放低行李後,事不而遲即刻遊覽呢個全球最高既首都拉巴斯！

由於巴士總站及住宿在高地,首先行落地勢比較低既市中心,只需15至20分鐘路程就到,途中仲食左個類似”角仔”既小食,內包有唔知乜肉既餡料,大大個熱辣辣,都幾好味~

Day 25 全球最高首都 (玻利維亞拉巴斯)

2011-03-02（Day 25)
住宿 ：Hostal Tambo de Oro $100-BR
行程 ：Uyuni --＞ 拉巴斯
高度 ：海拔3660M

返到香港後,係書店見到一位時裝界達人,去完南美後出左本書,書名叫[天空之鏡] ,好奇吓緊係翻幾頁睇吓啦,一睇之下佢竟然係旱季去,只係睇到一片白蒙蒙既鹽湖... 用呢個書名會唔會有D誤導呢？

Day 24 解散 (玻利維亞Uyuni)

2011-03-01（Day 24)住宿 ：特色鹽酒店
行程 ：Huaylljara --> Uyuni
原定今朝天空之鏡既行程,由於尋日已經去左,所以可以瞓晏D~


瞓醒食完早餐後,係鹽酒店內四處參觀，拍照留念~ 發現酒店有好多鹽做既手信賣架！最小型鹽做既十幾隻草泥馬,仲比我一次過買晒Tim~ 不過呢d手信,係香港既潮濕氣候好難攪,會出水同溶化架！所以要放係防潮箱•••







中間最細既草泥馬,一次過買晒~


今日係tour既最後一日,而最後既景點就係火車墳墓,出發前發現架四驅車底部,佈了一層厚厚的鹽粒! 相信係尋日入完鹽湖而攪成咁既。其實咁樣對架車好傷架！

火車墳墓

=======
我諗對其他人來講,可能係一個普通景點,不過對於我就有另一番意義! 幾年前去過烏茲別克既鹹海,因人類既破壞令到鹹海範圍縮小,海水後退後只剩吓荒廢既魚船,成了船既墳墓•••

之前去過船墳墓,今次去埋火車墳墓,一定另一番滋味呢~

未去火車墳墓之前,先由司機車我地到一個平原上,講一個故事給我們聽~ 並由阿Kim翻譯,呢個故事原來係,鹽湖天空之鏡既由來架！
相傳鹽湖既形成,係一個爭女三角關係既故事,仲好香艷Tim~ 呢兩男一女,就係分別三座火山既名,情投意合既一對情侶,男既要去好遠既地方工作,女既就被另一個叫波托西既男人乘機強姦! 並因姦成孕，上天既神要沒收呢個baby,而女既正直谷奶，噴到一地都係... 就係咁，就形成了今日奶白色既鹽湖啦！

呢坐女火山,亦被神懲罰係鹽湖旁暴曬勒！個故仔聽完覺得有D攪笑,聽完故仔就出發~

聽故事 

去到火車墳墓,有好多遊客呀！ 仲有好多日本人Tim~ 因為YouTube點擊率最高既天空之鏡片段,係日本電台NHK拍嘛！ 幾年前去過船墳墓,依家到埋火車墳墓,果然有另一番滋味噃~

不過... 當然係烏茲別克既船墳墓淒慘D啦! 船墳墓係當地居民因人類既破壞,棄船棄村而走呀! 而呢度只不過係一個火車垃圾站咋!

去完火車墳墓,兩架車既人去到一間餐廳,食完呢個local tour最後的午餐就解散啦！

影完張大合照後,大家都每個相擁一番後解散離去~ 同車既阿Kim仲話,咁親密既離別,係呢6個月來既honeymoon
第一次咋！ 吓！ 乜唔係西方人當呢D係家常便飯咩？我地見司機咁熱心好人,同巴斯阿Kim夾埋,人頭計每人比$100-BS即=$100HKD貼士比司機! 司機數到唔數，望都唔望就袋落袋,表現滿足之情,我好欣賞佢不求回報既心態~ 佢地兩人都識流利英語,同識西班牙話,4日3夜都係靠晒佢地替我們翻譯咋！

解散後,巴斯兩公婆邀請我們到他住宿的酒店沖涼; 因為我們不作停留,稍後搭巴士直往首都拉巴斯,不過他們的酒店係共用廁所,比少少錢沐浴吧~


等候沖涼期間,又遇到隔離車果兩個阿根廷女仔行過,我稱他為毒后,因為一停下來,佢地兩人就煙不離手•••
大家好興奮再寒暄幾句,又再擁抱道別,仲比佢捉住塊面
來個goodbye kiss Tim!


輪到我沖涼,細心洗淨我每一寸既肌膚,因為已第四日無沖涼啦！ 尋晚去完鹽湖仲醃住tim！ 呼~ 沖完涼真係成個人都爽晒呀~


沖完涼寄存d行李出去行吓~ 撞正d學生放學,唔知點解個個都玩水彈,緊係避開佢地啦！

Uyuni比較細,個零小時基本上行得晒,有個大市集同小市集幾值得行吓！ 尤其小市集,售賣當地人既手工藝品~ 一買就買左6個用手織既紀念品! 個擋主仲好開心Tim~

小市集

距離晚上2000開車,真係仲有好多時間呀••• 行到攰係火車站坐一陣,D風吹到好涼爽呀！


火車站

有時間表架!

來到玻利維亞咁多日,一張滿意當地人既照片都唔到呀！當地人太抗拒鏡頭啦！ 就算遠距離zoom埋去,都比佢發覺••• 我覺得咁多種類型既照片,當地人特色既自然人像照
係最難影架！ 我又唔會學D厚顏既人,明知人地唔願意,或者無表示願意,夾硬隊個鏡頭埋一埋去影! 鬼唔知又wide又靚咩！ 有無理過當地人既感受呢？ 上網睇尤其去西藏攝影既內地人,香港人唔知有無••• 而且我又唔鍾意比錢造假,例如魚夫撒網等•••

等到黃昏時候,去左一間烤肉店食烤肉,食既係可愛草泥馬烤肉呀！ 不過有埋烏蠅陪伴,草泥馬肉感覺"鞋鞋地"唔太好食••• 呢種”鞋鞋地”既感覺似曾相識,應該Local Tour都食過…


食完後天都黑啦,終於係呢個小鎮,消磨左大半日既時間啦！ 係2000時坐長途巴士出發,直上全球最高海拔既首都拉巴斯~