Day 13 陽光與海灘(關島)

(Day 13) 2014-01-16

住宿：Aqua Suites Guam

行程：關島

離開酒店前又係既定既節目，1430先捨得出門口； 先去滕一番食碗拉麵，然後趁最後一日去沙灘曬太陽，因為聽日酒店check out左無得沖涼，而且香港依家天氣寒冷得十零度，梗係感受多點既熱辣辣陽光啦~

今次去呢個沙灘係正市中心，酒店林立既背後； 同之前去既兩個主要本地人為主既唔同，今次全部遊客，8成係日本妹~ 

我於是曬吓白雪雪既心口，又遊水； 水好淺，但好清，一樣見到珊瑚魚~ 好似同魚一同暢泳咁呀~

係近岸浸水期間，見兩個日本好不停擺pose玩自拍，並叫我幫手揸機⋯ 原來佢地想玩跳起，比我一剔攪掂，佢地真係開心到飛起~ 最後當然捉埋我合照啦~ 

佢知我香港人後，第一個反應係⋯ 香港人英文好好既⋯ 吓! 乜真架咩？ 佢地兩個自己來關島玩，同我去旅行認識到既日本妹一樣，英文都係有限公司，可能只有小學水平，但人地一樣可以向世界出發! 咁我地香港呢？ 就算空有一身好英語，好多地方都唔敢去!

係沙灘逗留左兩小時要走之際，見有幾個青年玩水上滑板既玩意，我駐足留意，即被邀請，當然玩啦! 佢地原來都係玩左第二日咋! 

呢個我都唔知叫乜玩意，問佢學懂後係咪出去滑浪又話唔係，只係極淺水既地方滑行⋯不過我想信係滑浪既初階~

返去沖完涼即刻出去早前去過既Fort San Agueda，從高處影關島中心既Magic先，點知個天唔靚，求其影兩張就算Lu⋯

影完又落去無開既夜市，睇吓已連續兩次摸門釘既韓國餐館有無開先⋯ 係有既! 食左個魚湯，有成條好新鮮既魚，好飽~