Day 3 再見世外桃源(羅塔島)

(Day 3) 2014-1-6

住宿：Sheraton Hotel

行程：羅塔島 —> 關島

0900起床，要爭取時間係羅塔島影婚紗相!

有人會問，之後都會去關島啦，點解唔去關島先影呢？ 熟悉銀仔既人都知，銀仔唔鍾意人云亦云，隨波逐流
，依家見到D人出國影婚紗相(尤其D港女)，影親都係巴黎鐵塔，大笨鐘，個個一式一樣，真係你唔悶我都睇都悶呀! (雖然串左少少，唔好見怪，哈哈)

銀仔去旅行都鍾意冷門國度，影婚紗相當然要係無人去既羅塔島啦！而大部份港人都去影婚紗相既關島!？ D教堂真係好靚⋯ 但係我應該唔影了⋯ 今次係繼上次西伯利亞及蒙古後，累積第三個國度既婚紗相喇~

由於尋晚落大雨，今日都有點擔心，點知天公造美，雨過天清，藍天白雲呀~ 

係酒店食完尋日買既”美式”合味道杯麵，實在太難食了，淡而無味! 兩老仲用每人$2-USD 幫襯住宿買了兩杯咖啡tim~

共用大廳食早餐

食完早餐，港女裝身完畢，即時係住宿範圍影返幾張先~ 酒店範圍原來都好靚架! 影相期間兩老不停提供靚景idea tim!

影完拿拿臨揸車去尋日去過既”爹爹頭”海灘Teteto Beach； 真的太好了，全個沙灘都無人，又可霸晒來影~ 來到羅塔島，真係去到乜景點都包場，好似做緊島主咁呀!!! 真係一個世外桃源，避世既好地方~

途經另一個景點再影婚妙相

之後再爭分奪秒咁又返去Songsong Village既遊艇碼頭影相＋游水! 
Songsong Village相信係羅塔島最大既村，雖然尋晚既住宿比較有規模，又有熱水淋浴，但奇怪地竟然個個都好懷念第一晚好簡陋既平房! 我相信便利都係一個原因! 
於是用埋僅餘既時間來感受湛藍既海水，雖然係好趕，但無理由來咁多日都唔游嘛~ 最後全部人都游返半小時~ 我見到好多珊瑚魚呀!

影完又游完，好趕咁揸車返酒店，又好趕咁沖涼執行李，執完行李，又見二老係涼亭煲煙等我地； 暫時整個行程，見阿媽最愛既地方就係屋外既地方，佢一定會搬櫈到門外嘆架~

由於全羅塔島只有SongSong Village有郵局，剛啱早前去又撞正食飯時間，港女唯有麻煩老闆Jacky了⋯

去到機場,發現去過既紀念品店都買唔到我儲開既貼紙，無計⋯
check in 時有細枝裝礦泉水派，睇真D，咦!原來係Rota出品既Rota水黎架! 即時hold住D行李，攞返兩支做手信寄倉先~ 液體係唔可以帶上機嘛~ 所以依家屋企有Fiji水、貝加爾水及Rota水勒!

機場外圍裝飾

機場資訊角落竟然有中文簡介!

簡陋人手航班資訊板

候機室既沙發好舒服，突然發現停機坪出面果一男一女職員咁熟口面既! 原來係剛才替我們check in 既地勤來架! 男既揸車女既搬貨一腳踼架! 

回程再坐螺旋槳機回航，再見了羅塔島! 每個人都好nice,簡直係熱情如火呀! 當地駕車時有個特別規矩，就算識唔識都好，都要同對頭車say hi 架~ 羅塔島果然真係如機場標語所講，”羅塔島係全球最友善既島嶼”，名符其實! 捨不得妳呀，羅塔島⋯