Day 13 騎馬遠觀金字塔(埃及Giza)

2005-7-13 Day 13 

住: 火車上

 

瞓到黃朝百妟 ,比阿泰個死仔入黎我間房 ,搵野撩我鼻攪醒左... 佢今日又唔做野話陪我去金字塔騎馬Woo...

早餐食左個公仔麵 ,唔知點解黎到埃及勁想食公仔麵 ,同好鍾意飲可樂 ; 仲有發現香港無得賣既Lipton罐裝檸茶好好飲tim~  仲好飲過雀檸呀!!!

揸左差唔多一個鐘(因為塞車) ,都左吉薩金字塔外圍既一個馬房 ,用HKD $150 租了三隻馬一個鐘(大力唔騎) , 真係低到爛呀!!!

 

我係第一次騎馬咋 ,勁驚! (好似Milly都係)  開頭勁難平衡 ,阿泰仲整鬼我不時踢我隻馬 ,不過好快就習慣 ,仲識轉左轉右同停tim~

但跑就唔係點聽我話 ,用腳踢極個肚都唔係點跑 ,只係聽職員既口號...

 

騎馬既路線係金字塔外圍 ,上一個小小山坡 ,呢度可以飽覽整個吉薩金字塔區tim~ 至於遊金字塔內部同騎駱駝就等我去完南部返黎先啦 !

我騎既馬

金字塔全景

骸骨呀

離開時見到既金字塔被原野包圍住,就像發現到失落的遺跡一樣呀~

騎完馬都5點鐘lu... 於是返阿泰屋企沖完後 ,去左 "Pizza Hut" 食Pizza ,就係落車既時候 ,阿泰同Milly兩公婆為左d 小事就開始鬧交 ,到Pizza Hut 仲秋唔采唔 ,攪到我都唔知點好tim... 我係第一次見佢地鬧交咋 ! 唸住佢地成日相隔兩地 ,一年都見唔到一兩個月 ,應該唔會咁既... 點知比我返到香港發現佢地成日為 d小事鬧交架... 人地既事都唔好講咁多lu... 唔係第日比阿泰同Milly 炸型咪死 !

 

唔之點解外國既"Pizza Hut" 零舍好食咁 ,食剩兩件我仲打包拎走上火車食tim~

之後佢地就送我去火車站搭8點班火車啦~ 去到月台見到我坐既火車外型唔好又污糟 ,不過入到我間房感覺都算係咁啦~

 

當晚同房並無乘客 ,一個人瞓晒 ,正呀 ! 食完車上供應既一餐 ,就係火車既隆隆聲中熟睡lu~

人生第一次流浪正式展開 !

外型不討好既火車

我間房尚算唔錯,椅背反落黎就變成一張床啦~我仲借左阿泰一頂古怪既冒去流浪tim~(張相右下方)