續(Day 7) 2015-9-17
住宿:Annie’s Lodge Zomba
行程:Chiponde —> Zomba
終於繼續連載非洲之旅,話說上回講到我進入馬拉維國境時有阻滯。上網查過免簽證嘅特衰護照,去到關口就俾職員要求出示簽證,而免簽嘅BNO又因為早前入莫三比克時無用過而唔用得。出動到祖國領事大人都不得要領,唯有接受現實。好在仍可先入境才辦理簽證,不過就要偏離原定路線,要往南部一個叫Zomba嘅城市辦理。我橫渡非洲嘅路線係一路向西,中途要會合港女。現在偏離航道,唔知時間追唔追得返,令人擔心…
邊境城鎮Chiponde
離開邊境大樓,被一大班招徠黑市找換嘅人纏繞。此時乜心機都無,但聽到佢地嘅匯率比莫三比克那邊好得多,激死!
@1100
這裡很旺有很多小販舖仔,也有好多車輛於路上。問清楚人前往Zomba只需3至4小時車程,見時間尚早,希望今日可以到達Zomba攪掂Visa。於是在一檔舖仔食薯仔奄列做早餐後,找到架農夫坐車尾離去。沿途陽光普照,坐在車斗上諗住有好好嘅經歷,可惜攪咗一大輪最後都係壞車...
轉了另一架7人車,$4000-MWK($64-HKD)。看到司機有些不誠實,而問乘客又唔肯講,看來收我係旅客嘅價錢。不過諗諗吓因為呢程都4個鐘,同莫三比克又唔係差好多。
司機揸得蟻躝咁慢,沿住條暢通無阻山卡啦嘅路只行六、七十公里,心諗唔通馬拉維這裡執法咁嚴?起初我以為佢遵守規矩,怕比人罰錢先咁慢,但後來聽到後面D人都話佢慢咁即唔係啦!我都即時剷爆佢!話一入境已經麻煩,你又收貴我,揸得咁慢我今日去唔成入境處... (港女按:平時俾銀仔鬧得多,好想知佢點用英文鬧人。哈哈)
路邊幫一個小朋友小販買了7個青BB嘅非洲芒果,一共$50-MWK($0.8-HKD),好平。後面有個好人幫我用清水洗淨,連皮食嘅,但食落好酸,食了一半就算。餘下六個比晒車上嘅其他人,看見他們食得津津有味,天呀⋯
之後司機去到一個中途站,叫我們轉另一架小巴繼續前往。我真係好火滾,乜唔係直達Zomba架咩!司機怕咗我,話下一程我唔使俾錢。
Zomba
經歷五小時嘅車程才到達Zomba,成5點鐘,即今日攪唔到Visa啦!落車後,一直係車上傾開計嘅當地人叫我跟住個男人搵住宿。佢帶我去第一間full晒,第二間喺正巴士站旁中心地帶,索價$5500- MWK($88-HKD),上到房可以接受,但就話傍晚6點先供電。起初帶路個男人諗住收我$2000-MWK,痴線!我只比$500-MWK即$1-USD打發佢!開始好討厭的馬拉維人!忘記莫三比克嘅純樸吧⋯
酒店話幫我整晚餐,6點返嚟食,於是去附近行吓。自進入馬拉維開始比較多人想呃我錢,莫三比克的好人好事?忘記他吧!
Zomba街頭好多荷槍實彈嘅保安員,走在街上感覺安全。市面繁榮、汽車簇新、市民衣著再唔係爛身爛世,馬拉維應該較莫三比克富庶。諗住行去移民局一轉視察吓,問人先知道原來移民局喺山上,見天色已晚,放棄吧。
日落時份返回酒店都未到6點,上到房間仍黑麻麻,於是攞晒D照明裝備入浴室沖涼。正想攞野出去沖涼之際,一開著盞頭燈,發現床尾有隻大曱甴。直覺話俾我聽,有得一隻大就實有其他同伴嘅。於是再睇床嘅另一面,果然又有一隻細!即時落去同職員講,又話換房比我。一同上房後,即時執好行李,以免曱甴走進行李做非法移民!職員帶我到另一間房,直覺又話我知,同一環境、同一層都一定會有。都未諗完,一望入廁所已有一隻大曱甴慢條斯理躝緊... 雖然俾晒錢、雖然天已黑齊,但我嘅死敵出現,所以只好頭也不回地離開⋯
黑麻麻帶住行李,喺非洲嘅街頭有點徬徨,嚴格來說除了有車駛過時嘅車頭燈發出嘅燈光外,所有地方都無街燈伸手不見五指,要靠電話嘅閃燈來照明。去到巴士站有個住宿宣傳廣告牌,正望緊之際,有個女人話叫我俾錢佢先肯話比我聽間酒店喺邊。真係想用粗口鬧佢,有無咁貪錢嘅國民呀!真係火滾!於是搵一個外表老實嘅人問,佢都好似唔太熟。佢問另一個擺檔職員,職員叫佢帶我去搭的士,見佢同的士司機竊竊私語。頂佢個仔,又想夾埋屈我錢,我都費事理佢自己搵。你睇,明明一個想幫我嘅人,都被慫恿到要呃我錢。呢一刻開始我唔會再咁天真,成日諗住單純嘅莫三比克的人,呢度係馬拉維,係馬拉維呀!!!就算無得瞓,我死都唔會再被呃錢!於是一個人摸黑沿馬路再搵。由於尋晚無乜點瞓,真的好攰,再問一問人,點知佢唔識,但又有另一個搭咀,叫我跟住佢,搭的士$4000就可去到。你都痴X線嘅!剛才搭成5個鐘車都係$4000咋!
行行吓開始有D頭緒,行咗去一個好遠嘅油站問一個正在入油嘅私家車車主。佢話以前這裡嘅馬拉維人唔係咁的...
確認山上有住宿後,先到油站對面嘅印度人餐廳食晚餐。睇睇LP,原來有推介這餐廳架!書中講這餐廳有wifi,問老闆才知道馬拉維這裡無free wifi,要買張卡先享用到免費wifi。
食飽補充體力後,著住頭燈再摸黑上山。好在只是沿住馬路往上行,不過見到天上嘅星空都無心情觀賞了。行餐死終於都搵到剛才有住宿廣告,可惜了無生氣,毫無燈光,看來已關閉⋯ 記得剛才上山馬路旁不時看到還有其他住宿嘅廣告,於是再搵。
一袋二袋,係非洲黑夜行足兩粒鐘,晚上8時千辛萬苦終於搵到住宿,這討厭而恐怖嘅經歷真係要好好記下。
這住宿LP都有介紹,仲話”Top Choice”添! 但LP地圖就只顯示巴士站附近,遠D都無。LP於地圖嘅盡頭比個箭咀做提示都好吖,咁你介紹左我又點去呢?LP好少可咁馬虎,可想而知這裡真的無乜人來旅遊。
住宿嘅Reception好好人,又幫我影印過關嘅文件,方便我日後回港申訴。這住宿似一個渡假村咁,範圍好大,一排排嘅平房住宿。不過好貴,要成$77-USD,但總好過跟曱甴一齊瞓⋯
![]() |
唔知完成左1/4未呢? |
哈哈,原來你怕曱甴...
回覆刪除係,我會發癲架!!!
刪除o係非洲黑夜行足兩粒鐘,你好勇啫.
回覆刪除我天不怕地不怕,最怕曱甴!
刪除一隻大曱甴慢條斯理躝緊====>立即令我想起星爺果間麗晶大賓館!!!
回覆刪除看到曱甴時有冇突然間好掛住銀嫂XXXD
非洲黑夜一人拎住行李行足兩粒鐘,我真係要衷心寫個「服」字畀銀哥,勁呀!
最後尾咁搞唔搞到個visa,定還是反正都入咗境,到第時出境側側膊扮乜都唔識,到時先再搞呢?
對唔住,你book嘅唔係麗晶大酒店,wakaka~~~
刪除有掛呀,無佢幫我趕曱甴<--唔係男人,哈哈~
行足兩粒鐘無計,曱甴令我有無比嘅決心!
嘿! 我落得南部Zomba就知我無則則膊啦~ 攪唔攪到?下回分解~
一波三折...不過咁先難忘!
回覆刪除係! 歐洲咁先進發達,我去完即忘⋯
刪除非洲黑夜要走人, 真.真.真.[服] & [勇]!!!!
回覆刪除曱甴令我有無比嘅決心!
刪除銀生嘅經歷嚇c人 >.<
回覆刪除馬拉維啲人真係好乞人憎!
間貴嘢都咁嘅款, 曱甴屋會係點呢, 得人驚!
乞人憎嘅人,相信係部份發達城市⋯
刪除曱甴屋望落唔太差架,好大,雙人床,獨立廁所,可惜當時太暗無影⋯
見咗咁多曱甴, 克服唔到恐懼mee?
回覆刪除點解司機開咁慢呢?
最近睇別人namibia既相都好似唔錯.
我相信每人都有總恐懼係克服唔到,相信曱甴明知傷害唔到我⋯
刪除司機嘅野,天知了⋯
今個行程主力係納米比亞,一共玩了十日,係一個極度驚嘆嘅國家,小月你要留意了~~
大曱甴我都唔掂..勁爆驚!!!!!!
回覆刪除唉..乜唔係有錢d會好d咩?點解仲會咁樣呃人錢??
真係嬲喎!!!!!!隔離國d人差咁遠
你最後番香港有無申訴呀免簽哥度
其實反而係有錢先更貪! 當無錢時都不知道錢是何物⋯ 我之前去某D剛發展嘅國度都一樣。
刪除隔離國d人差咁遠<-- 係囉! 咁大對比果吓先嬲嘛! 火滾!
當然有申訴,依家應該中國外交部攪緊。
哈哈哈,估唔到你天不怕地不怕最怕曱甴(我都怕)………………………………!
回覆刪除不過我一直以為非洲到處都有曱甴@@
D人真係身光頸靚著哂老西咖喎又~ 咁壞既原來!
唔係喎! 大部份地方係乾燥帶,好少見小強噃,係香港見得仲多!
刪除著老西嘅好D,但佢地唔識又幫我地問D衰人啫⋯
曱甴我都驚,去旅行真係最怕住到曱甴酒店!
回覆刪除真係好恐怖⋯
刪除真係估唔到銀仔會怕曱甴,我以為係女士專利,hehe
回覆刪除其實你係街上遊蕩咁耐,只有嘗試呃你錢而無比人搶劫已經好彩吧!
唔得,小強真係諗起都打冷顫⋯
刪除可能我當時嘅情況係,零願比人搶劫都好過對住D曱甴!