Day 5 享受最後時刻(印尼雅加達)

(Day 5) 2016-3-5

住宿：ibis Styles Jakarta Airport Hotel

行程：日惹 —> 雅加達

0900起床，早餐時又「銀仔mode」 plan埋餘下嘅半日行程。已知唔夠時間去另一個聞名嘅普蘭巴寺，見有咁多清真寺，便想帶港女去參觀吓，去reception問吓有乜推介先。回想自己在埃及第一次參觀清真寺，當時參觀左好多間。我總覺得伊斯蘭世界係最有異國風情嘅地方。

1015出發去reception推介較近嘅清真寺，駕駛電單車前往，不時要停低睇Google map。這間以黑色為主色嘅清真寺，有好多小朋友在玩耍，原來清真寺範圍內有學校，正值午飯／放學時間，唔怪之有咁多小朋友啦~ 問清楚女性可以進入清真寺，便放心與港女除鞋入內參觀。

參觀完清真寺，試了門外有類似雞蛋仔夾餅嘅小食$4500($3-HKD)。食完去埋清真寺旁嘅河邊，從高處眺望日惹市嘅平民區平房。

回程路經最旺、最遊客區嘅Jl.Malibloro大街，原來就喺我地酒店嘅後一條街。停車影相之際，俾眼利而識飲識食嘅港女一眼就瞄到間RotiBoy麵包店，話佢個空姐朋友出trip時必食喎！佢咁為食一定要滿足佢口舌之慾啦~ 都好似要十蚊港紙一個，以當地來講應該係超級高檔野。（港女按：於馬來西亞同泗水火車站見過，但都唔餓，所以無買。我朋友係鍾意食到鑽研食譜自製，好誇張。而家香港都有啦，價錢同印尼一樣，計返成本似乎香港抵食啲喎。）

還車取回passport，做完華Dee，出晒汗，上酒店房沖多次涼才check out。好彩只係臭汗淋漓，唔係頭破血流啫，哈哈~ 

沖完涼落起傾盆大雨。嘩！真係好彩，尋日成日陰天無落雨，今日上午出去玩又無，等到我還咗部兩個轆先落，如果唔係落住雨揸兩個轆都幾狼狽危險，上天對我們不薄吧～

冒雨去返租車舖頭隔離，去婆婆間餐廳食午餐，好在有帶把縮骨傘啫~ 當然我們還有防水風褸啦，不過咁熱無謂著。

今次我試炒小菜，好食，港女再食地道野Bakso。Bakso似我地嘅淨肉丸，喺香港應該好多印尼人幫襯至係，不過可能香港太貴了。

等食野期間仍然落大雨，小孩唔怕悶呢~

回酒店上網，見傾盆大雨毫無想停嘅跡象。原先想行去巴士站搭巴士前往機場，現在改為由酒店call的士，問清楚大約十皮八皮，即約$5-60港幣。唔太貴又酒店call嘅，都放心D。

搭的士時曾遇輕微塞車，都諗緊會唔會瘋狂跳錶。最後到達機場，咪錶跳到$54000，見佢咁誠實，俾夠$60000，仲同佢說明佢跟其他的士司機不同。咁樣咪大家都happy囉~ 其實我好衰，你越屈我，我一個仙都唔會俾，但如果老實嘅話我反而樂於做闊佬。

check in 後有大把時間，係機場逛吓，才發現印尼嘅朱古力同貓屎咖啡好出名。雖然我自去完牙買加後開始接觸咖啡文化，但我總是覺得貓屎咖啡已是脫離真正咖啡了。加上早前有報導過依家已經無乜真正野生貓屎咖啡，他們全是養殖，而且過程全程都有虐待之嫌，所以不感興趣。最後購買左兩排當地好出名嘅朱古力，一小排好似要成$70-80蚊港紙。見咁貴臨買前當然唔好蝕，慢慢逐樣試食吓啦，我終情於高純度海洛⋯ 唔係，係高濃度朱古力至真，哈哈~ 而港女係都要試特別嘅榴蓮味⋯ 去到登機口，又遇上航班稍為延遲，結果又擺低幾百蚊。我買了一件 National Geographic T-shirt，港女就買了一條當地設計師製作嘅印尼風闊腳褲。

雅加達 Jakarta

一小時機程到達首都雅加達，客運大樓有各機場酒店嘅穿梭巴士，今晚入住港女係香港時book好嘅ibis酒店，去到站頭剛好有車到。機場附近大興土木，所以兜咗一段時間先到。沿途見到夜市，於是打算出嚟食晚餐。

講起ibis酒店，自法國之旅後都經常入住。（港女按：ibis同Novotel都係屬於Accor Group，真係唔錯，價值相宜，服務、裝潢也沒將貨就價。）

Ibis亦分了唔同檔次，一是Budget，走平價平實路線，我住得多，好似印尼第一晚及南法時都有入住。另一種叫ibis styles，走較為高檔嘅路線，室內色彩繽紛。尋日於日惹時都問過一間，好似要成6-7舊水，比同一條街的Pop貴一截，而且今晚都會住，所以就無揀到。

港女出發前搵到這間走高檔路線嘅ibis style機場酒店，睇相時房間好正，有我嘅旅行主題，也不昂貴$330，一check in 入房，真係勁鍾意呀~~~ 銀仔旅行都好住得好平，但通常最後一晚都會住好D嘅~ （港女按：上次係馬拉先講完話唔好book定，不過喺酒店網見到呢間真係好鍾意，而且大牌子有保證，所以就預訂咗。）

見有時間，逼自己去健身室做吓運動，也看見健身室旁邊嘅按摩價錢合理，一於book定飯後來舒服吓先～

book定聽朝shuttle先~

好正呀! 好似我屋企嘅主題~

左上：顯示房間號碼好有特色呢~

運動完後，一身臭汗咁行出去尋找晚餐。由於酒店位置山卡拉嘅公路旁，基本上要靠專車出入。我們行公路旁嘅小路及馬路邊，行到距離酒店十分鐘路程嘅地方。好在剛才坐穿梭巴士時經過咋，如果唔係我都唔識去。這裡較為平民化，無高尚食肆，我都無所謂，反正我鍾意地道。搵到間超簡陋嘅舖仔食晚餐，裡面好焗好熱，雖然開了風扇，但啲風係熱的。言語不通，打算叫餐牌最貴嗰兩樣，我叫炒飯，港女食麵，不知是否Indomie。印尼炒飯是我這行程最回味的，真係好夠鑊氣呢！食飯前港女話一罐罐放係枱上供客人任食嘅蝦片好好味，當然要試下啦~ 嘩，脆卜卜好好味！兩碟飯分別是$18000、$12000，即約十蚊及八蚊港幣，抵到爛!

食飽回酒店沖乾淨涼就同港女落去鬆骨，臨離開前要享受一番~ $475000 Couple Massage有90分鐘，無索取Tips，酒店服務每人百幾蚊，價錢合理也十分滿意~ 思服完就要早抖，因為聽日早機回香港了。