續Day3 初出茅廬(印尼泗水)

續(Day 3) 2016-3-3

住宿：Hotel Sahid

行程：Cemara lawang —> Probolinggo —>泗水

早餐完執拾行李離開，隨即烏雲蓋頂，更下起雨來，難道山上嘅陽光真的咁短暫？

大約11點去到小巴站，小巴只得我兩人，看來剛開出一班車，車長索價每人4萬($2x-HKD)，但要等到坐滿人。

於是周圍行吓，去到尋日同車遊客入住嘅民宿，見有人一袋二袋準備離開咁嘅款，回來跟港女報告，港女又去了解吓。等候期間多了一個男人，原來係來自愛沙尼亞。我幾年前到訪過其首都塔林，當然又暢談一番啦~ 暢談期間港女帶了一對芬蘭情侶及一個德國男仔上車，現在共六人，還欠兩人才坐滿。於是跟司機講數，每人比多少少$70000提早開車。

落山途中從港女口中得知，單丁嘅德國男子十分黑仔。他上山前嘅命運跟我們差不多，被巴士司機呃到旅行社。不同嘅係，佢受氹買了來回車費加住宿嘅套餐。(可能是天價)（港女按：好似20幾萬） 不過預先約好9點半回程班車就不見蹤影，真係財到光棍手⋯ 佢打俾旅行社理論，好在最後呢程車唔使俾錢，應該叫司機回山下嘅旅行社收取，可憐嘅係浪費了整個上午⋯

車上看見芬蘭情女同愛沙尼亞男子用俄文傾得興高采烈，再用德文跟德國人交談，當然也用英文與我們傾計啦！我知芬蘭小學三年班前學校只教母語，即芬蘭語，先學好芬蘭語有助與北歐其他國家溝通。不准教任何外語，有了基礎才認識其他語言。雖然他們「起跑線」看似落後於「港孩」，但語文能力最終拋離我地數十個身位，當然主要原因係佢地經常能夠用到啦。外遊時見到歐洲遊客總會能講3至4種語言，試問現在香港，連母語廣東話都未識講就同時學3種語言，難怪鏗鏘集有個小朋友見到中文課本會喊了⋯（港女按：大部份主要歐洲語言源自印歐語系，以下分支有日耳曼、意大利、斯拉夫等語族，無論詞彙同文法可算一理通百理明。佢地未必個個係語言天才，但就享有天時地利。中文屬於漢藏語系，文字、語法係另一個世界。其實好多外國人都羨慕我地識中文，大家都認為「外國月光份外圓」吧！可惜而家香港情況有點本末倒置，某啲人視教育為「軍備競賽」，人有我有，但忽略了個小朋友咁辛苦學完，其實無乜地方用得著，結果「周身刀無張利」，除非家長一齊學一齊講啦。哈哈！）

Probolinggo

返回Probolinggo，濕熱返晒嚟，大汗叠細汗。德國男子都想去日惹，所以一齊到巴士站搵車，但搵唔到車直接往日惹。一是去瑪琅轉車，一是回泗水。德國男帶我地去車站附近，一間有wifi的大排檔食午飯兼上網。發現瑪琅看似順路，但由於係山城，去日惹嘅車程比泗水更耐，所以最後揀了泗水，始終大城市容易轉車，仲睇吓會唔會試到火車。喺巴士站一直有人兜搭，目的係過水濕腳，跟到我地上車又想呃錢，話每人$40000。我們來程時$25000，當然一口拒絕啦！見我地咁樣當然收回正價啦。其實上車俾錢就最穩陣，唔需要理其他無謂人！不過後尾發現唔記得攞車飛，好在無俾人乘機掠一筆，又係一個經驗呢！

1245時開車，全程車當然少不了不停有人叫賣，而呢程車也多了隊band做live show，又彈結他又打鼓唱歌，而乘客也有好多。坐坐下由逃避叫賣而扮瞓覺，變成真係瞓著。

右：印尼最常見嘅食物Bakso

泗水

這程車瞓吓醒吓感覺好似好耐咁，實際又唔係，3點零到達泗水嘅巴士總站Purabaya。此時同行德國朋友落車前慣了檢查背包，話唔見了電話，係車上左搵右搵都搵唔到，又俾人催落車。落到車，德國仔重新於自己嘅行李找尋，發現銀包裡面嘅錢都唔見埋，咁肯定被人偷了… 問佢原先擺放係邊，佢竟然話將這些財物放係輕便背囊，將背囊放係櫈底喎，諗住有人郁個背囊，自己對腳都感覺到… 邊有人將身家性命財產咁樣放架… 其實個賊算有良心，無成個銀包攞走，留返信用卡俾德國仔提款。

原來佢話第一次來東南亞，看來是一個初出茅廬嘅小伙子⋯

就到泗水，有好多木家具舖頭，也開始傾盤大雨

見佢六神無主咁，問佢需唔需要報警啦，如有買旅遊保險可以claim錢嘅，想警察幫手搵返就唔好諗了。只係在落後國度跟警察打交道真係諗過才好，但估唔到警察好快手就帶我地到警崗報失，仲係咁講free添~ 最後真係好快攪掂，德國朋友也順利得到報失紙。警察問我地會去邊，我地都話去日惹，仲推介我地去婆羅浮屠添~ 不過我話想由這裡坐火車去，佢就話無可能，火車要兩星期前買票，我就真係唔係好信⋯至於點解佢要咁講，到而家都諗唔通。

報完警後德國朋友仍然未有方向，跟著我們。我話先食飯，德國朋友之前咁豪，買晒昂貴套餐上山，但現在一齊食飯連飲品都唔捨得叫，希望請佢醫肚開心吓啦。佢無乜目的跟著我們，但就想今日再搭十小時嘅巴士前往。我跟港女盤算，今朝凌晨3點幾起床行完山，再坐完5小時嘅巴士，現在大汗疊細汗一身臭汗，今日一定要休息吓，再坐唔到10個鐘巴士了。再者不論現在搭車或晚上搭車，去到日惹都係凌晨時份，半夜兩三點搵住宿唔抵又麻煩，加上我始終想搭吓火車，所以食完後，港女比左電郵地址佢以便聯絡後分道揚鑣了。（港女按：銀仔話外國人慣了住簡陋民宿／旅館，今日行完山又接連坐長途巴士，我可能接受唔到。哈哈，可能係啩。）

上次非洲之旅已經好想坐火車又坐唔到，今次真係好想坐。上網check都話有火車往日惹，剛才警察偏偏又話無可能買到票⋯ 正所謂未到黃河心不死，以我嘅性格一定要去尋找嘅！好在港女肯陪我癲啫~ 

天氣唔好落大雨，先尋找去火車站嘅交通公具。問一問的士站，話睇錶約十皮($60-HKD)，見咁貴唔搭走人又話7皮，即又呃人啦！搵到架市內巴士Damri去市中心，每人$6000($3.5-HKD)，問人後得知需要行兩公里去火車站，情願行到死都唔比的士呃！

車程都幾耐，又塞車。約一小時車程，晚上7點天已黑齊，經巴士上一個好人青年帶我們落車，並指導我們火車站嘅方向。佢話都幾遠，約2km，心諗都係4個幾運動場圈啫。（港女按：孭住個背囊都無諗咁多，落巴士個位置有好多睇落唔錯嘅住宿，銀仔心思思想入住，我就堅持要先搵到火車站。因為如果聽朝一早要搭火車，就應該揀一間最近嘅住宿。萬一買唔到火車票，再作打算都未遲。）

@1900

好在落車後已停雨，步行45分鐘終於到火車站。先到月台，有個窗口，不過話只可以買即日票，並叫我們到對面大樓。望一望，原來係火車站嘅另一面。

繞了好大個圈，才到對面大樓，售票處無職員，只見有人用售票機機買票，相信用人手是不可預定未來幾日的車票。買車票時又有個好人教我地用部機，顯示最平嘅票無晒，得返最貴$28萬盾一個，即$165-HKD，焗買!  都係比巴士貴一倍啫，但巴士車程十個八個鐘，火車只需五小時喎！明早0700開車，輸入埋名及護照編號，即場選擇埋座位就有收據跌出嚟啦~

@2000

解決了一件心事當然搵住宿啦，剛才沿路都有好多住宿，但就偏偏係長途火車站這一邊一間都無。這裡烏燈黑火，無街燈，只小食檔擺賣。返回另一面，見對面有間似乎平靚正嘅類似Hostel又唔住，諗住今日咁辛苦要住返間正式酒店舒服吓，但check in 上房後發現這是舊式古董酒店（港女按：從外觀就知係又貴又舊，好似澳門嗰啲舊五星酒店。），一晚$40萬($235-HKD)連早餐，一下子就用晒剛才禁嘅一百萬了。。。

第一時間沖乾淨涼，思服晒，呼~

去附近一個Mall食吉野家，兩個人約十萬另加10%稅，已比香港平好多了。也係香港有但未試過嘅breadtalk麵包店買定D麵包、蛋糕，在火車上醫肚~

@2300

酒店斜對面，有個潛水艇博物館

本日行程