Day8(上) 廉潔國度(馬拉維Zomba)

(Day 8)上 2015-9-18

住宿：不知名簡陋住宿

行程： Zomba —> Mongochi —> Monkey Bay —> Cape Maclear

這間住宿早餐豐富，環境算是不錯，享受自拍之際醒起不是享受的時候，先攪Visa才是正經事。

先係reception約好左架的士，$1500-MWK($24-HKD)去兩站。先落山去市中心銀行換錢，再上返山去移民局。上的士時諗諗下，不如先經過移民局問一問幾錢先啦。10秒鐘車程，約60米路程到達移民局，原來咁鬼近。問一問職員才知道可以直接俾美金，$70-USD就可辦簽證。身上有美金當然唔使落山換錢啦！於是諗住原先要比$1500-MWK，依家只係10秒鐘車程，俾夠$1000-MWK($2-USD)，佢應該都賺到笑呱。點知佢好似唔夠咁咦咦哦哦，又打電話比酒店個reception。我睬佢都傻，鬧到佢走為止！鬧到移民局職員都笑，我鬧為何每一個馬拉維人都咁貪錢架⋯ (其實事後諗返都係我唔啱，我地協議好在先，應該原定路線兜晒佢。因為當地人難得遇上我呢條水魚，根本就唔關油錢或浪費時間嘅問題，而是我協議好嘅錢) 我錯，sorry⋯

跟隨職員到一間狹小嘅辦公室，門後掛了一件職員制服。無耐一名類似長官嘅人入嚟，知我要辦Visa就俾張表格我填，並收取了我的護照及$70-USD。佢好nice，我都未開聲便發了一張收據俾我。隨後也有兩名歐洲女仔入嚟辦簽證，我填好晒野當然讓坐啦~ 等咗一陣這位長官又帶我入一間更大的辦公室，只見這辦公室有一張書枱，一個書櫃，另一端有梳化茶机，茶机上放了一份報紙，淡淡藍色嘅窗簾，好優雅嘅格局。書枱有一位好架勢人物正在處理文件工作，十分有威嚴氣勢的樣子，似是局長咁。他看了的我一眼便賜座，隨即低頭繼續辦公。而啱啱帶我入房嘅長官放低了我剛才填好嘅表格及護照，默不作聲等候指示。耐心等候期間，他枱頭正在處理的文件，不知關唔關我攪Visa事，但發現文件格式竟然跟我們香港的政府文件格式一模一樣喎！呀！我明白啦！大家也曾經是英國嘅殖民地，唔怪得之啦~

首先到狹小的房間，唬佢唔係度偷影⋯

大約等了十多廿分鐘，問了一兩句關於我的馬拉維行程後，便從一本有大量Visa嘅簿撕下一張，交俾較低級嗰位長官，再由佢帶返我回狹小嘅房間，最後將Visa小心地貼上我的護照上，攪掂晒，Yeah~  臨離開時，見到剛才好有氣勢嘅長官行出嚟，佢仲同我講兩年前曾經去過台灣交流添~ 

就係咁，順利攪好Visa。勢估唔到會咁順利，係非洲落後國度會有咁官方嘅處理方式，無收多一分一毫，也無要求賄款。當堂對馬拉維改觀，呢兩日嘅冤屈氣盡消呀！開開心心重新出發~

步行60米返回住宿，收拾行裝，沖乾淨涼先出發，離開這個不喜歡嘅城市。（整個非洲旅程只得Zomba這裡咁貪錢討厭，算是整個旅程的唯一污點吧）

再經reception約好的士，等候期間櫃台職員好好人咁幫我影印剛才辦簽證嘅$70-USD收據。我亦問清楚一陣搭巴士幾錢，費事又被屈。

這段旅程，我本來是想去馬拉維湖享受一個週末假期的，可惜因要辦簽證而來到南部。現在重新出發，北上馬拉維湖！

去到巴士站，找到架Mini bus北上往Mongochi，即時跳上車。原來我是最後一名客人，上車後即時開車，真幸運。費用為$2700-MWK，有車票，明碼實價。

@1135

利用這程車，記下少少當地生活－

車上看見隔離當地人份報紙：

－話馬拉維政府今日會銷毀4.5噸象牙。我即刻同隔離個當地人講，如果非洲無大笨象，就唔會有遊客了。

－阿仙奴 “slip” 於薩格勒布，即歐聯輸波。

當地油價約$12-HKD 一升，咦？咁貴唔知有無記錯。

一條普通嘅魚$1.6-HKD。

上：深入內陸後第一次見有湖
下：路經一間教堂

途中隊晒梳蕉先

Mongochi

三小時後於1430到達Mongochi，像一個大型市集，比較集亂。其實我都多餘，大部份非洲地方都係雜亂架啦，哈哈~ 看見有一架貌似香港用來做警車的新款Benz等緊客，是前往馬拉維湖畔Monkey Bay的。這車主看來幾有錢喎~ 可惜車內車上只得三名乘客，看來有排等了⋯ 由於今日只食過早餐，同剛才嘅一梳蕉。依家成2點幾太肚餓，買了隻烚蛋食，$100-MWK($1.6HKD)。最後，於市集一帶兜了成粒鐘先坐夠人開車，但這程車原來只需約半小時⋯

當地人興咁放魚，以免滴水及腥嗅味整污糟架車

Monkey Bay

究竟Monkey Bay係咪好多Monkey呢？我都無深究，只知Monkey Bay係個地圖上有馬路直達、有碼頭港口、有渡輪去馬拉維湖各處，相對較為發達。我要去更隱蔽，地圖上只顯示有小路才能到達，同樣係馬拉維湖畔嘅Cape Maclear。

於Monkey bay落車，隨即有電單車兜客。我就選擇了一個青年載我入Cape Maclear。為何較隱蔽呢？因為無主要道路前往，得泥路碎石路，當然也無公共交通前往啦。我選擇這裡，就係想有少少與世隔絕嘅感覺~ 希望日落前會到達。

@1630