2016年3月6日 星期日

Day 5 世界級景點(新加坡)

(Day 5) 2016-1-15
住宿:親人屋企
行程:新加坡


由於間房冷氣壞咗,所以同港女做廳長,瞓到1000自然起床。因為唔想中午炎熱天氣外出,所以食完自製早餐就係屋企hea。




既然於家中無所事事,便享用吓屋苑設施。我先去健身室,港女係泳池浸住水等我。(港女按:原本想試吓個按摩池,但無開到,點知個急緊掣就係開關。)健身完後一氣呵成去泳池游了1000米,當然也用了能上山下水嘅Garmin手錶來記錄啦!堂姐話,我旅行都幾hea架噃~ 嘿!這是我的旅遊風格呢~


1550才出門,先再到牛車水,真真正正咁行吓。見到一串串紅燈籠,又感受到濃厚農曆年氣息。這旅途上不時見到年貨市場,仲見到外國遊客專程來感受這傳統氣氛添!估唔到,農曆年氣氛要係外國先感受到,香港嘅節日就以消費為主,已覺得越來越陌生了…


買了Chu ming尋日介紹,無係香港開分店嘅「香味」買了點牛肉乾作手信,也在雜貨店買了相信A貨戶外型頸巾。


公屋


午餐


之後搭地鐵去了海旁,一出站就到濱海灣金沙酒店嘅購物中心,類似香港IFC的格局吧。跟指示牌行,路過超大商場就到達海濱長廊,新加坡地標魚尾獅就在對岸不遠處。回望這酒店外型好宏偉,據聞天台是一個巨型空中花園。



這海濱長廊很像香港嘅維多利亞港,一樣被高樓大廈所包圍。不同的是,這裡無一大批喧嘩嘅旅客,相信遊客來到這國家都不敢造次。這裡設計得很舒適,有沙灘椅供人寫意咁享受悠閒、寧靜嘅時光。




後面係濱海灣金沙酒店


係海濱行了一陣,也懶得行去無乜歷史意義、純粹地標嘅魚尾獅。(港女:即係香港人都唔會得登去睇金紫荊啦。)反而對近年新興嘅景點Gardens by the Bay有點興趣,便行去看看。

Gardens by the Bay是一個休閒大公園,再行入d就到中心地帶。抬頭一望不禁「嘩」一聲。(擎天大樹/Supertrees)著晒燈,好夢幻!參觀期間突然燈光全熄,原來有light show,唔怪之遊人早已蓆地而坐,霸好靚位啦~ 我們都無心欣賞,因為約了堂姐食晚餐,急急腳咁回家集合。 


唔知點解用了5000iso


集合後由堂姐call Uber前往東北區Uncle Leong食海鮮。有炒蟹、蟹湯米線等,都幾好味,坐室外又無乜蚊。最好笑係文化差異,堂姐個外籍男友唔喜歡食蟹,因為落手落腳好麻煩,也好失儀態。堂家姐摵了隻大蟹鉗俾佢,擺到埋單走人都未食,要堂家姐善後。可能係中間嗰片薄骨令佢卻步啦,哈哈~



食完返屋企天台,開了喺馬來西亞買返嚟嘅菠蘿,好香好甜,可惜堂家姐男友又無乜興趣,乜外國人口味咁單調?跟住享用按摩池,一邊浸一邊飲酒、談天說地。原來平時硬朗嘅堂姐原來都好nice嘅~ 相信港女亦從未試過同堂姐咁樣傾計,好像重新認識一位新朋友一樣。
浸到甩晒皮,沖完涼半夜三更0345先瞓⋯




17 則留言:

  1. 終於起好晒, 幾年前住marina bay sands時, 望出去仲係地盤一個
    嗰幾棵Supertrees好掂, 我諗點影都靚

    回覆刪除
    回覆
    1. 無錯! 嗰幾棵Supertrees近年已成了新加坡的標誌咁濟了~

      刪除
  2. 回覆
    1. 唔好見我背包咁辛苦,我有時勁hea架~

      刪除
  3. 我覺得有啲外國人對食好保守,未食過但又試都唔試.

    回覆刪除
    回覆
    1. 係喎! 王子係外國生活應該見得更多喎~

      刪除
    2. 不過佢地又食蝸牛,內臟又鍾意食鵝肝,真係唔明⋯

      刪除
  4. 海濱長廊有埋沙灘椅設備真係好正........
    不過HK一定學唔到這份悠閒,最驚到時吸引到啲大媽用來晒襪晒內衣褲XXXXD

    回覆刪除
    回覆
    1. 唉⋯ 人地對象都唔係劣質客,當然見唔到呢D情形出現。就算有少部分劣質客來到新加坡,都會唔夠膽咁做。而香港,好似蝗蟲咁多嘅劣質客,人多勢眾,世界自然被佢地改變的。

      刪除
  5. 一口氣游1000米,都好勁!近年我去旅行都鍾意hea,不過唔會響住宿內hea囉,尤其係如果無伴的話。不過你呢個住宿咁正,都有hea既價值,況且響新加坡,出到街上都係咁上下。

    回覆刪除
    回覆
    1. 其實我幾年前開始迫自己游水,有D帶氧運動,因為我唔鍾意跑步,而一游通常游1800米架。
      如再選擇外出hea嘅話,一定只會去海濱D長櫈痴呆吓~

      刪除
  6. 我五月去新加坡真係要到Gardens by the bay 走走.

    回覆刪除
    回覆
    1. 一定要去,留多少少時間,因為範圍幾大

      刪除
    2. 銀仔,留一個黄昏,影夜景.

      刪除
    3. 嘩! 期待你D靚相呀! 我就無時間用心去影⋯

      刪除
  7. 好鍾意嗰幾棵擎天大樹...好靚呀!

    回覆刪除