印尼indomie之旅

部份人的世界真的很小，只有日韓星馬泰！為何又講這話題？因為這趟印尼之旅，又一次令我深深體會到身邊嘅人的世界觀。我成日於遊記咁講，可能會得罪好多香港人。不過我部落格宗旨是記下我的遊歷，無需要討好所有人，而且這些都是我親身經歷，無老作喎！

這行程是一個無目的，無組織之旅。之前講過今年上半年唔去長線，以去多幾次短線為主。起初諗住check 日本機票，查到廉航網上東京來回普遍為$1200-1600之間。忽然有日check到有$10xx，便叫港女回公司攞假。可惜確認假期兩日後，票價便升至$17xx。叫港女取消假期，佢又話剛來到新工作崗位，夾好晒全村人不便取消。我覺得既然日本機票可以咁平，如每人俾多$700蚊好似唔抵咁，只好作罷。

再上網搜尋機票，看看有甚麼地方好去。由於得六日時間，目的地選擇不多，都係局限於東南亞。自兩年前到吳哥窟一遊後，對佛教遺址有點認識，也想看看東南亞其他類似景點。熱門柬浦寨嘅吳哥已去，而近期有新航線開啟，媒體推介得如火如荼嘅緬甸當然也不是我考慮之列，因為跟熱潮嘅旅行模式絕不是我的風格，所以就想起印尼嘅婆羅浮屠。

網上格價，直航雅加達以華航最抵，來回連稅$18xx，係貴過日本，但既然有信心下次可以買到日本平機票，今次就去印尼吧，deal！可惜買機票時趕時間，回程買錯左日子，要每人加$350作為改機票費用，好慘。。。

之後身邊有好多朋友知我因為這原因去唔成日本而去印尼，總結他們的說話，大約分為三個答案：「寧願貴D都去日本囉」或「寧願唔去」或「兩度地方差很遠噃」。這些人基本上都去過日本一次或以上，所以我一開頭講香港人嘅世界很小，就是這印尼之旅的感受。其實港人熟悉嘅峇里，好多人去完才知係印尼。（港女按：我聽到嘅回應都差不多，另外99%人會搭一句「印尼？去峇里呀？」只有一個同事問我係咪去睇火山湖，知音難求哦。）

買了最主要嗰程機票，便上網看看除了婆羅浮屠外有什麼景點，發現泗水附近有火山，所以這行程重點就是去火山及婆羅浮屠喇！Check一下內陸機，發現AirAsia只是$2xx一程，隨時抵過搭巴士或火車呀！又deal！由於夜機到晨早機返，連隨book埋第一晚及尾一晚分別於泗水機場Ibis Budget及雅加達的機場酒店Ibis Styles，又係抵到爛，只係分別$2xx及$3xx一晚咋！（港女按：後尾諗返，應該直去泗水，最後由雅加達回港就無咁轉折，不過上網睇返剩係得國泰有呢個直航組合，要貴一倍呢！都係內陸機抵玩。）

這個印尼indomie之旅成行！