2016年2月18日 星期四

Day 1 最佳航空公司(新加坡)

(Day 1) 2016-1-5
行程:香港—>新加坡
住宿:親人屋企


[新年樓樓,寫埋較有農曆新年氣息嘅星馬短線遊先~ 順便係下個旅程前清左呢篇短線遊記。]


先由港女online Check in ,寄存行李櫃台1915關閉,我1910才趕到,幸好來得及寄存久未出動過嘅大喼,又嬲死港女(港女按:我本來諗住用激將法,話佢1915才到,點知真係差d俾我批中,佢無希望咖喇。另外,好在香港都唔係太凍,我放工返屋企沖個涼,著條背心裙,加件薄外套就可以去機場,唔使孭件大褸過去差不多到赤道的新加坡。)



新加坡航空果然重奪兵器譜第一名!雖然經濟客位,但服務隨時好過部份航空公司嘅商務客位。坐椅雖講不上好寬敞(上次南非航空好寬敞,但就設施十分基本),但周邊配套極為齊備。上機坐定定後,空姐遞上印刷精美的餐飲Menu,這類Menu通常只出現於頭等或商務,其實我不太贊成這樣做,因為太唔環保了... 其後餐飲意想不到地唔錯,最後還奉上一杯久違了的Haagen Dazs雪糕。十多年無坐,好似改進了不少。據我所知,CX 多年前已經無再提供Haagen Dazs雪糕。我搭咁多次飛機,只有一次坐荷航由荷蘭往阿根廷先有。點解咁特別提到這程機呢?咪因為由香港飛荷蘭果程,同是荷航但無提供囉。

現在較好嘅航空公司,USB差電已是必備了~

這個間隔我第一次見

精美Menu



飛機滑行出跑道時,機長廣播呼籲乘客該停止所有電子用品。當空姐巡查時叫斜前面嘅男人停止,見佢從USB除下差電就算。起初都不以為意,見架機應該都仲有排轆。到後來排隊準備起飛,只見這位衣著十分斯文、身穿西裝、裇衫有袖口鈕的本地人繼續篤佢部 iPhone 6 plus,用完FB message chat,又用whatsapp ,用完whatsapp又打e Mail。見佢覆人打繁體字,(後來見佢睇"破風")似足D人平時無聊攞個電話左按又按咁款,看似未有跡象想過停止。於是問定港女一句英文,牢牢記住。飛機開始轉彎,進入跑道準備起飛,見這個斯文敗類仍然用緊電話,便哄個頭埋去,用港女教果句同佢講"excuse me, turn off the mobile phone please!" 我後自己加左句"The flight is fly"真係瘀爆... 佢連眼尾都唔咁望我一眼就即時熄電話。你話係咪衰吖,係要俾人話嘅!我唔敢拍佢,費事佢反咬返我轉頭話我打佢。因為以前我係機場工作咁耐,知道有類似情形。

斯文敗類

航班上觀看一套影片叫"Max",是以軍犬作題材的電影。之前在網上睇過trailer,但香港一直無上畫,可能無乜市場啦。如愛狗之人或喜歡動物嘅人,看此片極為催淚,就算是我這個淚孔早已閉塞嘅人都流下眼淚。

報紙有篇咁嘅野,古巴及納米比亞剛好2014,15去了~

4小時後,於2355時到達新加坡,這機場十多年前坐星航去馬爾代夫轉過機,印象模糊。「全球最佳機場」果然名不虛傳!行人通道廣闊,好多樹木草叢,一望已有綠油油、好舒服嘅感覺。不似香港機場,要用盡每一個位置來做店舖,現代化但冷冰冰。



今次無預先換錢,所以一到入境大堂就去ATM提款。撳了$200-SGD = $1200-HKD 左右。


港女有個堂家姐舊年年尾轉去新加坡工作,好熱情話招呼我地去佢屋企住。佢仲教路話Uber喺新加坡好普遍,call「菁英優步」無夜間附加費,所以最抵搭。新加坡機場Wifi要登記護照才拎到密碼,為了call車就無計啦。客戶服務櫃台職員好友善,好快就搞掂上到網。Uber APP內仲有計程車、七人車等選項,仲見到好多車等緊客,唔同香港成日只得小貓三幾隻。去到地庫候車處,人民好有規矩,每人等到車後,都會將部行李車推回大堂才離開,可見市民質素極高。(港女按:好熱呀,一出室外就冒汗,日頭唔知點算。)

Uber $19.12-SGD,由機場到堂家姐屋企(Woodleigh地鐵站附近)需時20分鐘左右。Uber係新加坡咁有規矩嘅地方都可生存,香港是否應該借鏡一下?

搭車期間,的士司機好健談,話去過香港9次,又去過台灣,都係覺得香港最好。因為新加坡好boring,台灣就似中國二線城市,無咁先進。我地提及會過境馬來西亞玩,佢就耍手擰頭話好危險,叫我地最好搵新加坡人陪同。


堂家姐間屋好大,三房兩廳、頂樓連天台,仲有私家按摩池,可遠眺摩天輪。佢話同男友、另一名法籍住客夾份租,佢俾大約萬幾二萬蚊港紙就住到,喺香港唔使諗啦。堂家姐剛歐遊完畢,仲未適應時差,所以介紹完間屋,又整了一人一碗午餐肉蝦子麵。佢終於都捱到睡魔召喚入房瞓覺。我地沖涼都入房,不過冷氣壞了,只可以開窗開風扇。可能因為太攰,攤上床無幾耐就瞓著。

27 則留言:

  1. 睇title,唔太相信你去咗新加坡.

    回覆刪除
  2. 回覆
    1. 哎呀好耐無見啦丹尼斯~
      原來你都有睇,都唔明咁特別嘅題材為何香港無上畫。

      刪除
  3. 聽聞新加坡住屋環境係比HK好好多

    回覆刪除
    回覆
    1. 比香港大好多! 樓下仲有休憩空間小朋友可以踩單車

      刪除
    2. 唔只住屋環境,而是整個國家大環境都比香港好好多,不過就無香港咁多姿多彩。

      刪除
  4. 其實新航一直都幾乎是我心目中服務最好的航空公司,娛樂和食用(齋餐)都非常不錯,不過航班時間和路線不配合我近年的旅遊地點,所以很久無幫襯,不過今年它新開始有航機直通我的城市(無需經悉尼),方便很多,十分期待!
    另外,我都記得你環島遊用GPS,就係你一句「set好健行模式,就能看返我行過嘅路線」勾起我興趣!不過我諗住行街同行山唔同,所以唔知道對我有無幫助,等我徹底研究一下先!

    回覆刪除
    回覆
    1. 相信佢鄰近馬來西亞,多馬拉人搭,而馬拉人好多人信奉伊斯蘭教,D人不時食齋,可能咁樣齋餐會不錯呱~ 咦! 你食法國大餐有無要求改為齋呀?
      直航你嘅城市? 睇嚟你住M字頭城市噃~ 係咪?
      隻錶健行模式,其實攞嚟行山用,我夾硬囉嚟平地用之麻。健行模式記錄晒你高低落差,行左幾遠,行過嘅軌跡等;而行山期間也不會迷路。比條Link過你睇!
      http://www.garmin.com.tw/minisite/fenix3/

      刪除
    2. 伊斯蘭教食好多肉,只要halal同唔係豬肉就得,一般航空公司都會有halal餐比佢地。我響法國梗係要叫齋啦,哈哈!喂,你個GPS錶好靚,呢個網頁話佢係今年最佳行山錶:http://besthiking.net/best-watches-for-hiking-2015/

      刪除
    3. 你果隻係Gamin最新款之中最貴既sapphire型?之前我已經響澳洲網頁睇過(但我們這裡沒有玫瑰金),我就唔捨得買喇!只會考慮Fenix2,因見減價!但看網上資料很籠統,不知道有否 trail planning 功能?你有另外download當地地圖?輸入目的地後它會詳細顯示路徑教你怎樣走?行錯路它可會顯示?今日見Suunit Ambit 2 有半價,亦有點心動,但店主建議索性買部Magellan eXplorist更有用。

      刪除
    4. 食齋先可以keep住你窈窕身形啦,呵呵~
      最佳行山錶! 勁~ 我個人較為低調當然唔會買玫瑰金啦,而且也同我外遊乞兒造型唔襯。我嘅係藍寶石版,貪佢錶面唔怕括花,因為我旅途上帶得好"粗"的。如果佢唔壞,我相信會用好耐,因為功能fit晒我嘅旅行模式。
      錶嘅模式較基本,應該你你講到咁po嘅功能。如要你所講嘅功能真係有如店主所講買部Magellan eXplorist好過,你記得我Day 3 果篇嘛?馬達加斯加朋友,公司提供幾部比佢地去莫三比克森林工作,都係用Germin,Germin於GPS應該有領導性,好似係

      刪除
  5. 新加坡消費比馬來西亞高好多。

    回覆刪除
  6. 我朋友係日本唔知係咪唔小心咁錯uber, 車到咗cancel 罸 1000yen.

    回覆刪除
    回覆
    1. 哦! 係呀,佢靠過App,自動過數架。咁你朋友有無追討返?

      刪除
    2. 搭下訕先~~ HAHA
      UBER真係好好用!我響香港未用過,不過響英國就成日用~~

      上次我架車未黎到我CANCEL左佢都扣左我錢
      我SEND EMAIL去,佢即刻比返同價錢CREDIT我下次用~
      你朋友可以試試~~

      刪除
    3. 咁又係佢服務咁好應該有得退嘅~
      香港,算吧! D法例跟本追不想時代,又要保護商家,好似民宿一樣,香港不容許。

      刪除
  7. 新加坡的居住環境比香港好, 但生活指數奇高!!
    雖然生活平淡一點. 總比香港好. 唉.....

    回覆刪除
    回覆
    1. bell,我確信每樣野都係此消彼長的,當地生活咁好是因為皇帝統治,當一個英明領導當政絕對攪得有聲有色,如一個他信或阿扁當道就不知點了。
      雖然悶,但住係新加坡真係好舒服,唯獨是天氣⋯ 生活指數?不知是否香港真的太高,我覺得當地,尤其食方面真是超便宜呀!

      刪除
  8. 仲諗住邊有咁快寫好非洲, 原來真係未寫好, 寫咗短trip先 ^^
    新加坡航空服務真係好, 我同意!

    回覆刪除
    回覆
    1. 係呀,因為又去了印尼。唔清就堆埋好多了

      刪除
  9. 我四月初去紐西蘭會乘搭新加坡航空.

    回覆刪除
    回覆
    1. 我見星航4月有平價票去印尼

      刪除
    2. 嘩~ 星航咁正,如價錢差唔遠真係首選!

      刪除
  10. 如果冷氣壞咗我會即刻搬去酒店住...XDDD

    回覆刪除