Day 2 Book住宿問題(馬來西亞新山)

(Day 2) 2016-1-6

住宿：Grand Bluewave Hotel

行程：新加坡 —> 馬來西亞（新山）

如題! 是否該Book定住宿，對於我無定向嘅人來講偏向唔Book定，所以我嘅行程9成都係去到邊住到邊。但港女較有計劃嘅人就偏向book定，所以這問題於旅途上經常成為話題。其實無對與錯，只用自己喜愛嘅方式就好了。今日，偏偏我就跟港女角色對調，真攪笑~

早上曾經醒過，可能新加坡無乜動力令我起床，所以再瞓返，但一瞓就瞓到1200。

起床後食晒堂家姐D野做早餐，烚蛋又整三文治食。攞起港女問人借嘅閃閃系列新加坡旅遊書看，（叫左佢唔好借書）(港女按：唔係閃閃書，係以親子遊為主題嘅旅遊書，不過香港市場來來去去都係咁上下啦。)諗吓今日去邊度好，可惜書裡不是講主題公園就係聖淘沙之類大路景點，睇了兩頁都唔想再睇，有點迷茫。隨即諗到離境去馬來西亞，上網得知有火車前往馬來西亞，便朝著這方向前進。

堂家姐屋企

左上：露台
右上：堂姐熱愛滑雪
左下：我住的房間

堂姐間屋連天台，有埋按摩池及大電視，真識嘆!

大廈無清潔工掉垃圾，要靠屋內呢個門仔掉垃圾直達垃圾房，不過堂姐話曾經發現曱甴走出來，好恐怖!

計劃先過境馬來西亞嘅新山再算，上酒店網一睇，原來馬來西亞那邊酒店好平，便叫港女選擇訂一間車站附近的5星酒店，$330-HKD一晚。

拎起咗未來兩日需要嘅行裝，就放低個大喼係堂家姐屋企，背個背包輕裝出門。去到地鐵站唔識買飛，問個口音極重嘅職員伯伯，聽完一輪才理解要買一張可用5程嘅地鐵飛，每次買單程或來回，有幾毫子回贈咁樣。先搭地鐵$2.6-SGD，地鐵車程都幾耐，轉兩次車需時45分鐘才到邊境地鐵站Woodlands。

到Woodlands站，搵唔到火車，原來要再轉巴士前往火車站，每人$2.8-SGD，無散紙所以俾夠$4-SGD。到達火車站於售票處買票$5 ($28-HKD)，並等候45分鐘後開出嘅火車。

好耐未幫佢影過相了

樓下仲有泳池添~

搭地鐵，這張能增值嘅車票只限用6次，如用多D相信會更環保。另外香港人成日見人用殘體字就一口咬定係big6人，華語地區有好多地方都用緊簡體字架! 

要再轉巴士才能到火車站

火車時間表

於火車站內行來行去，又被人老點（後來發現有誤會），行錯去另一個巴士站嘅離境關口，要關員帶我地離開過關大堂。返回售票處才知道火車入口原來遠在天邊... 

列車頗舊，可惜月台不能拍照。

列車無乜人搭，一卡只有幾個人。車程原來只係5分鐘，過了一條渡海橋後就到馬來西亞國境。去到馬來西亞好在有得係月台影相，好人嘅站長仲叫我企上去火車頭度影添！影完仲按住部𨋢等埋我地，苦了𨋢內另外兩名乘客等候了。

火車站像一個小型商場，有食肆、Starbucks、樓盤展銷、飾物店等等。由於酒店鄰近火車站，於埋站前都見到。用Google map 離線GPS認清方向後，便沿馬路步行前往。步行無耐已看到酒店位於遠處，約十多分鐘路程，更要穿過重門深鎖嘅平民區，此酒店位置應該較偏離市中心。

Chech in時見酒店有免費穿梭巴士前往市中心，便同職員講想搭1800開出嘅專車，叫佢等埋我地。上房後見到房間好大，好似話upgrade咗，但無時間欣賞，匆忙影了幾張相就算。在大堂等了一會，酒店職員叫我地同另一名外國人登上一架的士，話當係穿梭巴士，費用由酒店支付。約五分鐘到達「市中心」，咦！咪係剛才我地落車個火車站對面個大商場！原來這裡就是新山市中心了～

房間景觀，能望到對岸嘅新加坡

唔知以為去左香港，商場好新淨企理，店舖大部份跟香港一樣，Giordano、眼鏡88、萬寧、H&M、Levi’s等等... 由於今日出門口前只食了三文治，太肚餓。去到food court 見一間"石頭燒"，見價錢合理就走入去。我未食過石頭燒，有點大鄉里。點了一羊扒一牛扒，上菜時只見一塊血淋淋嘅扒於石頭上渣渣聲，要靠自己來反轉整熟佢。据扒時見港女放落碟食，係喎！係石頭食咪熟過頭？都唔明D石頭為何可以熱咁耐。$87-RM($180-HKD)

食飽後返回火車站地下嘅巴士站，了解聽日想去嘅目的地搭車方法。對複雜得有如畫鬼腳嘅路線圖有點頭緒後，再問站頭職員，原來好簡單，便用紙筆記下。

之後前往夜市，再路過商場時食了一杯乳酪，$12.3-RM($24HKD)。離開商場往南走，無幾耐就到達夜市，其實這夜市正正就係我住嘅酒店對面，直頭係遙遙相對，只不過隔了條火車路軌不能直達，要兜個大圈才到。即坐車又兜個更大嘅圈好唔抵，步行又遠...

係夜市兜了個圈，見食肆為主，也見到很多好靚而又方便嘅酒店（港女按：見到有間叫Bello Hotel JB Central，好心心眼，返到酒店上網睇返原來內籠都唔錯，好揼心呀！話說當時飽飽地，無胃口掃街。如果住呢度，返酒店攤抖吓再食都得，可惜當晚住咁遠就無辦法了）。俾港女趁機會話反我轉頭，話我好叫佢book定酒店。因為我不嬲都唔鍾意預約好住宿，而港女就比較穩陣鍾意book定。佢同我一齊耐左都少book左，但偶然都會。（港女按：不外乎要遷就航班時間、好想住某酒店／Airbnb或旺季先會咁諗咋）曾因這問題於旅途上都爭吵過好幾次，現在俾個機會港女入到位，話返我轉頭添，哈哈～ 即再一次證明我平時唔book定係正確啦！

這裡小朋友應該好鍾意

港女見到流晒口水

夜市

來到馬來西亞，當然要試肉骨茶啦！就算幾飽都好，於夜市找了一間地道餐廳，點了肉骨茶加豬腰豬膶，$24-RM($48-HKD)。肉骨茶裡有好多肉，清清地甜甜地，真係好飽呀！還記得我上次到沙巴真係好白痴，以為肉骨茶好似去酒樓飲茶咁樣架！哈哈～

現在身處較地道少少嘅地方才令我有點興致，不致於新加坡時乜都唔想做，畢竟我唔喜愛大城市的。

食飽飽又要穿過火車站步行回酒店，這段路已不知行過多少遍了。尋晚uber司機講到馬來西亞好危險，又robbery，kidnap，又話一定要有當地人帶才好去咁話，我覺得治安ok喎！（港女按：全晚經過最危險嘅地方係警署門口，好多唔太友善嘅人企喺門口。）

返到酒店去酒吧享用埋酒店free嘅飲品先，不過只可飲咖啡或茶，順便聽吓現場唱歌。