2016年2月12日 星期五

Day 7 又有過關問題(莫三比克Mandimba)

(Day 7) 2015-9-17
住宿:Annie's
行程:Cuamba —> Mandimba —> Zomba(馬拉維)


晨早天都未光就起床,為了搭0530前往邊境Mandimba嘅Chapa。隊了幾個乾爭爭嘅Bolo及一個橙做早餐後便離開住宿。



0510找到架Chapa,職員收了我$2-USD,但計計下要幾個鐘車程,無理由收咁平咖!追問之下原來是搬行李上車頂費用,頂!我剛才又無需要將行李放上車頂。明知財到光棍手,都嘗試叫佢退錢。當然不得要領啦,於是狂鬧條友,話我來莫三比克旅遊,遇見所有嘅當地人都係好人,好多美好回憶,現在無晒。雖然我英文水皮,相信佢應該都聽得懂,只見其他人聽到都互相談論及苦笑。


點坐呀! 前面對頭仲要坐滿人⋯ 這經歷真難得!

非洲木瓜


經過4小時車程,到達邊境小鎮Mandimba,於鎮中心一間食店為終站。落車後一群電單車司機及換黑市錢嘅人圍住我,我也想換些少,一名電單車司機帶我入到食店室內,叫我選擇一個人來找換,換定少量馬拉維貨幣(此刻為何我無擔心過會被人洗劫一空架呢?)莫三比克離境極為順暢,起初進入邊境建築物前,有個自稱醫生探熱,又睇黃熱病針紙(起初以為想掠水的),室內嘅海關警察全部無明示或暗示想屈錢,當然大讚佢地一番。乘電單車$150-Metical($20-HKD)前往馬拉維關口,回憶滿載咁向後say goodbye Mozambique!電單車車程約3分鐘,其實這邊境路程可步行的,沿途所見仲有住宿添。

出入境大樓

過了這閘口,就是前往馬拉維啦~


到馬拉維,用BNO佢話唔得,因為莫三比克用特區出入境,現在都要繼續用特區。咁無所謂,反正check過特區護照都免簽證。點知佢話特衰要簽喎,出發前我都醒目,叫港女上政府網頁print定兩本護照免簽證國家個list。職員睇完就指出,「註解三」話由入境職員有決定權,咁香港政府不如唔好話免簽啦!由於無wifi,即時用電話sms港女,佢send埋資料俾我,話自2014-1-23,馬拉維駐北京使館話俾特衰免簽。我同個高級關員講,但佢直頭唔聽,話一係返轉頭,一係去Zomba攪簽證⋯ 我仲有最後一著,出發前抄好晒每個中國駐當地使館嘅電話,於是即時打比領事。領事先生聽得明我唔鹹唔淡嘅普通話,聲線柔和地確認特衰係免簽,並叫我遞個電話俾關員對話。裡面有兩個後生關員其實一直都幾好人,幫我遞電話給房間內一直無露面嘅上級。幾分鐘後比返電話我,領事話從電話中同我講無問題,會比我過關的,於是道謝後掛線,心諗仲唔過關!點知房內個big boss 皺晒眉頭拿了一個file比我睇,佢地列出要簽證嘅名單有香港份。文件個蓋印日期仲要係最Update嘅2015年添,話唔可以比我免簽證入境,於是唯有選擇先入境後辦簽證啦。關員發了張行街紙我,三日內要到南部Zomba入境處辦簽證。我無奈地再打比領事,今次唔係叫佢幫忙,因為知道叫都無用,純粹講個situation 俾佢聽啫。佢話可能當地單方面取消了,叫我保留單據,等兩國再溝通喎... 如港女喺度實叫佢打埋俾英國領事館,問佢為何唔俾用BNO。我之前旅行好多時都兩本護照交替用啦,不過之前如用其他護照通常都係飛機入境,陸路咁樣交替用應該都未必得嘅⋯


今早肚痛,依家又痛,要借用關口職員專用嘅化糞廁所,疴完後發現有曱甴爬上來,好在啫。。。

22 則留言:

  1. 行街紙>> 咁似啲聲請人士。

    回覆刪除
  2. 用行街紙,香漬港聽得多,原來非洲都有。

    回覆刪除
  3. 聽落又好似唔係想屈錢果隻~~~?!!!!
    咁最後駛唔駛再簽證?
    我知銀哥向來做事好有原則,不過換轉係我都想問下佢簽證幾錢,如果只係一百幾十而手續又唔煩的話就即場簽咗就算啦,肚痛仲同佢地周旋其實我真係好佩服你嘅堅持^^犀利!!!

    回覆刪除
    回覆
    1. 唔似,完全無明示或暗示。
      我問過佢一定要去南部嘅Zomba攪簽證,無得即場攪⋯ 所以之後無拿拿偏離航道向左南面⋯
      周旋緊果刻真的想瀨,但要咬緊牙關⋯

      刪除
  4. 我反而有興趣知道當地何故單方面取消免簽證。另外,我發現我在你上一篇的留言又失蹤了,妖!本來是問你的GPS手錶對行山有否幫助,因為我準備行self-guided walk,有好介紹嗎?

    回覆刪除
    回覆
    1. 這方面我很懶惰,直到早一兩日才打好封信連單據,寄了給入境處,睇佢點回覆。
      唔使嬲,被失蹤留言我已從垃圾留言復完返啦~ 亦答左你,買啦! 包你無買錯!
      垃圾留言我以後每次都會check,唔使擔心~ Blogger嘅問題其實我send過意見去了⋯

      刪除
  5. 嘩!你已經有兩手凖備咁都過唔到。。。。
    如果係我實嚇到鼻哥都無肉!

    回覆刪除
    回覆
    1. 以前,我可能驚。但現在我會同佢地爭論,我唔會再驚佢地,要錯係特區護照嘅錯! 你越驚,人地只會覺得你同D唔見得光嘅中國人一樣,入境有不軌嘅企圖。

      刪除
    2. 你咁講我又諗返起我7年前去ICELAND...
      我諗當時仲係無咩港人去~
      明明CHECK過唔洗VISA
      CHECKIN時佢又話要!!!佢問來問去問左勁耐!!!
      好彩最後過到... 因為我無兩手凖備一切在腦海中...
      特區護照真係好麻煩!

      刪除
    3. 7年前,你都算係未興起時去了,勁! 現在香港人個個都一窩峰話去,幾年前也包括了我。
      咦! 你以前係英國讀書,依家又係英國做野,有無英國護照? 如無諗辦法囉返本吧!

      刪除
    4. 係囉!當年猛嗌人同我去都無人肯(所以我自己去)。宜家一打開fb就總有一個fd響ICELAND~

      英國居留權宜家好多限制... 唔係咁易有得儲。
      我哩D短期居留人士係無咖(因為我employment仲係under香港公司)……
      同埋我上次係去美國,唔係英國呀^_^

      唔洗諗,我都係局住返去獅子山下咖喇……

      刪除
    5. 所以小紀你都同我有點以,無人陪迷自己去囉,使乜要其他人認同。
      你係工作簽證嘛,做夠幾年就可攞居留權啦~

      刪除
  6. Silver, 非洲D厠所都好恐怖.

    回覆刪除
  7. 其實我懷疑關員手上份2015年資料唔記得拎番香港出嚟, 仲跟番舊嘅, 今次去南美我都印定特區張免簽list, 因為會喺阿根廷過一過巴西。so far我拎特區去到邊都冇試過有問題, 反而冇攞番BNO, 09年去冰島一樣好順利, 有時呢啲嘢都係睇個關員好唔好, 有彩數成份

    回覆刪除
    回覆
    1. 唉,就算過左期我都出動到領事啦⋯
      我成日都出問題,可能我黑仔呱⋯ 定係你通常一團人過關?或身光頸靚?

      刪除
    2. 咁又係, 唔通中國領事會呃佢咩, 條友都多鬼餘嘅!
      我從來都用特區, 喺香港都執執個look, 出外都比較casual, 初時本特區啲印唔多時, 啲關員會問多兩句, 我哋會拎個入晒酒店同機票confirmation嘅file出嚟講我哋成個旅程, 個別關員會拎嚟望兩眼, 宜家本特區多印, 好多時只係求其問吓留幾多日就過得

      刪除
    3. 吖! 同埋可能你無經D咁山卡啦嘅關口過關,應該ok。你下次試吓過D無香港人過嘅關,我相信9成有問題。哈哈~

      刪除
  8. 疴完後發現有曱甴爬上來==>嚇C人咩!

    回覆刪除