2015年8月5日 星期三

Day 25 走過瑪雅遺跡(墨西哥奇琴伊察)

(Day 25) 2014-11-25
住宿:Hotel Sac Be
行程:Valladolid —> 奇琴伊察 —> Dztinup —> Ekbalam —> Coba


今早瞓過龍,早餐都無食就飛車去新七大奇蹟之一的奇琴伊察。 取車時發現尾門全部無上鎖,原來呢架手動車除了入波是手動外,倒鏡、窗、甚至連車門係無Central lock,要逐隻門於車內反鎖架! 真係手動得幾徹底噃! 手動到咁都係依家先知,即尋晚、呢兩日架車都係處於不設防狀態⋯
@0730

因為Lonely Planet話早上11點後就會有大量tour遊客,想靜心欣賞就要早啲到。公路上我行100km都仍然有好多車”篷篷聲”過我頭,見D車開咁快,即無快相,我當然都放心加速啦!(要衰衰大堆嘛) 真係飛車,因為曾經試到架車嘅極速!雖然揸得快,但仍然被好多車爬頭!到達奇琴伊察時,雖然比預計遲左少少,泊好架車係停車場,喺車內食了在巴哈馬買的rum cake頂一頂肚當早餐,入場時好在仍是頭批客人,順利喺大量tour入場前參觀,影相都可以避開遊人、唔使張張相都人頭湧湧嘛~ 
@0800


入口售票處無遊客

奇琴伊察Chichen Itza

一入場當然直奔於整個遺址最出名既El Castillo馬雅金字塔啦!英文叫The Pyramid of Kukulkan,香港好似叫咩牛鬼蛇神金字塔⋯ 唔係,係叫「羽蛇神金字塔」至真!四周有圍欄,禁止進入或上去,感到好失望,我之前好似見有人爬過上去噃… (後來得知是2002年一次致命意外後已成禁地,應該有人碌落嚟)之後繼續遊覽,每個遺跡由港女翻譯,有球場、有廣場等。(港女按,個所謂球場,兩邊牆各有一個小洞,話古人會將球踢過個洞,好高難度呢!我亦曾經喺明珠台播嘅一套名為《亞波卡獵逃》(Apocalypto)嘅西片見過呢個球場,同時係一個刑場,犯人背向貴族跑,貴族就以犯人為活靶。神殿係用來祭天,犯人會被帶到塔頂,活生生挖個心出嚟,然後殺頭,連人帶頭碌/扔落塔底,諗起都恐怖,估唔到而有機會可以睇到實景。)



行了遺址一半,突然諗起既然唔可以係遺跡影婚紗相啫,但可以拍段以手拖手遊世界為主題進場片段的片頭噃。

可以避開遊人,真好!


球場








遺跡內有眾多的紀念品攤檔,尤其通往Cenote Sagrado岩洞的小徑上,咁多競爭就對我們消費者相當有利,大部份紀念品更是$1-USD起跳!真後悔昨日買貴了一件紀念品⋯ 於是我們買了一幅大型瑪雅風格嘅格仔布,與眾多攤檔選擇了一位穿傳統服飾既當地女人,經港女同瑪雅族大媽講價,由$800peso講到$450peso($225-HKD);及後係另一檔仲買了大量鎖匙扣,作日後擺酒嘅回禮。另外眾多小販手持能發出巨大猛獸聲響,用來作弄遊人嘅紀念品,但格格吓價竟然無買,最後喺機場搵唔返,有點後悔⋯
臨離開時見到有大量嘅遊人湧入,出入口範圍更擠擁得水洩不通,而且氣溫開始上升,果然係早起的鳥有蟲吃。
@1050




離開後開始落大雨,由於今朝趕住去奇琴伊察,只係喺車內食了在巴哈馬買的rum cake頂一頂肚,而遺跡內的餐廳價錢昂貴,又無乜特色。諗起剛才沿路也看不見有任何小村落,於是繼續駕駛向前行。去到不遠處的一條小村嘅路旁小店,被店門口正在燒烤中的牛扒所吸引,當然毫不猶豫就停車詢問價錢啦~ 可能真係極為地道,無做遊客生意,竟給我們當地人嘅價錢$100-Peso($50-HKD) 一公斤牛或雞,以公斤計我地邊食得晒呀? 哈哈~ 最後應該係食咗半公斤牛及雞扒,仲開咗個椰青,其實齋食肉真係幾dry。店內有兩姊弟,不停撩我地玩,好得意。



餐後打開地圖查看,發現墨西哥這個半島,有著無數既鐘孔石洞穴、地底岩洞及大量馬雅遺址,於是就挑選了一個從旅客中心poster所見,位於Valladolid城西6公里Dzdinup 既Cenote Samula洞穴。





Dztinup Cenote Samula洞穴

位置偏遠而且走入支路,好不容易及幾經問人下才找到。先到一個停車場泊車,有人來收Tips,當然無俾啦,落車時仲要確定完全鎖好車! 入場費$59-peso($30-HKD),於廁所換上游水套裝,穿過有大量檔口仍未開檔嘅區域就到洞穴,但原來洞內比較深水,港女陪唔到我喺清澈而涼快既地下水暢泳,只係喺淺水區浸浸水。




Ekbalam

之後去埋另一個馬雅遺址,Ek’ Balam,在停車場泊車時,又有人來收tips,當然又無俾啦。佢好似幾嬲,講這裡是墨西哥之類嘅說話,都驚佢攪我部車架,但無理由向惡勢力屈服嘛!



這處雜草叢生更添神秘,帶備了腳架喺門口俾保安截住,話唔可以帶入去,會幫我地keep住,走嘅時候俾返個號碼牌佢取回。這個遺址全部都可以行上去,我們選擇了最大的一個金字塔,登頂後傾盆大雨,匆匆影了幾張相又要爬番落去,但大腿已開始抽筋,而港女粗壯既雙腳就完全無問題!  心諗腳軟失足咪會一命嗚呼? 終於明白為何奇琴伊察的羽蛇神殿唔開放了。






好鍾意呢個遺址被森林包圍,好有神秘嘅感覺!

唔小心,隨時死得人的!



Ek’ Balam一帶只有三個簡陋渡假村,無冷氣不突止,LP推薦果間竟然索價$970-peso($480-HKD)直頭離晒譜,咁嘅價錢會無電又話落雨時會漏水!咁我不如瞓車? 而從職員得知條村會因大雨而停電,入夜就會漆黑一片! 
但這個鎮有一樣好特別,就係全鎮都長滿了橙樹,樹上跌落嚟嘅橙一地都係,揀返兩個外型靚仔嘅攞走先~
@1700




先停埋一邊睇睇地圖,如繼續揸車向東海岸前進,會路經幾條村莊,應該會有住宿呱⋯ 唯有繼續前進不回頭,而滂沱大雨就未停過。入夜後公路無街燈,加上雨勢變得非常大,視野極度不清,可以講係乜都睇唔到! 罕有地好有危機感,因為前後左右嘅路況都睇唔到,怕駛出道路範圍而炒車,真的要憑經驗,憑感覺來駕駛了。



Coba

最後去到一個叫Coba小鎮,馬路旁見有兩間住宿,選擇了一間叫Hotel Sac Be,$450-peso($220-HKD)。想用信用卡俾錢,但佢地部卡機壞咗,職員一臉無奈先交鎖匙俾我地,剛搬晒啲行李入房,就嚟敲門叫我地趁停雨,去附近的姊妹酒店Hotel Lol-Ha碌卡。過到去都搞咗一輪先成功過數,此時又落起大雨,於是決定喺原地食埋晚飯,港女叫咗墨西哥傳統食物同埋啤酒。進餐時,發現隔離用草搭嘅屋頂有隻青蛙,小心翼翼咁慢慢向地面移動,最後不知所終。


食完等咗一陣,趁雨勢稍弱,就返酒店房沖涼瞓覺,有熱水冷氣,算唔錯了。


22 則留言:

  1. Silver,我去年八月去奇琴伊察超多人,要排個幾小時才能爬上金字塔頂.

    回覆刪除
    回覆
    1. 咦Andrew? 你去年去時開放金字塔咩? 原來我只是遲你幾個月出發咋!

      刪除
    2. 不知道有開放過爬! 我五年前去時已經不許爬上去! 而我認識有朋友 2009 年都已經不許爬的:

      刪除
    3. 可能Andrew兄記錯了第二個金字塔。

      刪除
  2. 啲熱門旅遊景點,真係永遠早去有著數,唔駛驚多人阻住影相之餘又唔駛排長龍入場!!!!
    個金字塔真係超級斜喎,行落嚟時真係會好驚,一定腳軟:P
    銀嫂又可以陪你一齊捱餓(上文好似無話有怨言kakakaka...),又夠晒體能和腳力陪你走過天涯海角上金字塔,剩係喱兩樣已經非一般港女可比,銀哥真係有福氣XXXD

    回覆刪除
    回覆
    1. 早去有著數,但就要先克服起床呢一關,哈哈~
      我大肶先抽筋,跟住就腳軟,雙腳疏於鍛鍊,失禮!
      基爾兄又笑我~ 有人係呢個旅程減左好多磅,擺酒當晚激瘦,又可以去玩又可以減肥,一舉兩得,真係唔知邊個有福氣呢~ 哈哈~

      刪除
    2. 旅行+減肥====>非常有gimmick喎^^

      刪除
    3. 到時又要搵我攪返團就實賺大錢~ 哈哈~

      刪除
  3. 我影相都唔like有咁多人.

    回覆刪除
    回覆
    1. 不過有時真係無計,旅途上不能盡如人意。

      刪除
  4. 嘩!堂梯真係好似好危險!
    我平時行樓梯無扶手都驚驚地..... @@

    回覆刪除
    回覆
    1. 無扶手之餘每級都幾高,真係腳仔軟架~

      刪除
  5. 這球場是參觀過瑪雅遺址當中最大的一個球場, 歷史較早的瑪雅遺址的球場都好細, 可能到奇琴依察時, 球場也有了發展!

    回覆刪除
    回覆
    1. 哦,原來係咁~ 唔該晒~
      不過又可能佢作為其中一個時期嘅首都又大D呱,我估⋯

      刪除
  6. 多年前我也到過。記得當日爬奇琴伊察金字塔, 爬到一半心驚膽跳, 唔上唔落腳都軟晒, 好瘀。

    回覆刪除
    回覆
    1. 原來你已經係仍開放時候去過拿!
      Peter你咁講所以絕對明白我嘅心情,而我爬嘅仲比你嘅矮添!

      刪除
  7. Chichen Itza ,2002年已經唔准上o拿,有人個d相咪好耐之前囉。所以旅行要早d去,越遲越只可遠觀。睇見好多人張相,嚇c人喇!

    回覆刪除
    回覆
    1. 係囉,都封左十幾年了⋯
      呢D舉世聞名嘅景點,下次更加要 plan好時間入場,以避開人群。

      刪除
  8. 樓梯好高咁......><

    like hand in hand's photo!! 好sweet, sweet.....
    我下次又學你同朋友仔一PAIR影手拖手遊世界相.....

    回覆刪除
    回覆
    1. 樓梯上去無咁驚,落黎時已用了大半體力,又攰又驚⋯
      咦! 你提起我,就算唔使再拍來為婚禮,下次都繼續咁樣影先~

      刪除
  9. 岩洞嗰兩張相好靓呀,我唔like游水都想跳落去呀...XDDDD

    回覆刪除