2015年8月22日 星期六

Day 2 租靚車,食大餐(法國Gordes)

(Day 2) 2015-04-02
住宿:Le Mas De Gordes Hotel
行程:西班牙巴塞隆拿 —> 法國馬賽 —> Gordes


瞓醒坐酒店既接駁車出機場,check in後食老麥做早餐,無諗過外國嘅漢堡包會仲細個香港囉!之前食過嘅一定會大過香港嘛⋯
@0735


酒店前往機場的Shuttle

巴塞機場一景

巴塞機場當然唔少得巴塞專門店啦!
右:我會入場睇呢場波架~
機場老麥

1005時起飛往馬賽,乘坐廉航Vueling Airlines,一小時機程到達馬賽機場。等候攞行李時廣告牌有南法的交通資訊,原來由馬賽搭火車去較近西班牙嘅城市蒙彼利埃只需1.5小時。我相信就算揸車慢一倍都係3小時啫,如再計落到邊境頂多係6個小時,即用5-6日來玩6個小時車程嘅地方,應該夠玩呱。





一出機場就見到眾多嘅租車公司,問第一間budget 已無晒車。因為現在復活節,其實都有點慌架… 再去eurocar排隊詢問,好在職員話仲車租,話要$1300-HKD一日,係一架叫Mercedes嘅車,經港女提醒先知係Benz,唔怪之咁嘅價錢啦。為何香港叫Benz,真係不得而知了... 我話有無平點嘅車,佢話有一架Volkswagen最入門版,仲帶我地出停車場睇實物比較。VW索價$920-HKD一日,完全唔合邏輯,梗係租Benz啦!雖然係貴,但以咁嘅價錢租到Benz,又有四個人share,計埋車尾箱剛好放晒各人行李,完全唔算貴喎!到要選擇還車城市,心裡還未有定案,究竟是圖盧茲還是邊境小鎮呢? 銀仔臨場睇住張地圖,決定於邊境城鎮Perpignan還車。臨離開時順便問吓職員,揸Benz會否招搖得濟,佢話去馬賽市中心就危險,其他南法小鎮就ok嘅⋯ 嘩!連當地人都話危險,大城市治安可想而知!回想這個職員英語流利,笑容可掬,十分有禮,跟係香港傳聞法國人出名傲慢相差甚遠。所以話,與其道聽塗說,再周圍隨口噏當秘笈,不如自己去親身感受,看到真正一面才說吧!

搞掂晒租車手續,再次出停車場攞車才知Benz有齊GPS、自動波。職員跑出嚟提我地還車時唔使入油 (當時油缸係滿的) 。嘩! 咁多著數加上係Benz,每個人都覺得好抵了,因為Volkswagen係乜都唔包的。
坐上車時,車內嘅豪華、高科技真係令我呢啲窮等人家大開眼界!車頭嘅萬能組合控台好厲害,個multi touch pad可控制音響同GPS功能唔在講,又有藍牙功能方便連接MP3機/手機播歌,仲有USB充電等等… 睇埋登記證,原來係今年二月先出廠, 即差不多係全新咁濟滯呀!每個人都好興奮~ 

後來有朋友去德國自駕遊,同樣租新款Benz,只需$500-HKD一日,可能係淡季呱。



剛剛好放晒行李

下:播放高Ling嘅ipod,顯示中文竟然無亂馬!



用少少時間研究呢個萬能組合控台,並Set好GPS前往第一站Gordes後就出發。架車有點長、有點大,睇D位唔係好慣。


駕駛無耐就離開主幹線轉入小路,期間路經Cavaillon的購物中心,於一間類似IKEA的半自助式餐廳食午餐,一望餐牌價錢合理喎!据扒、pizza,仲有港女最愛嘅甜品,結賬好平,大家都食得好滿足。

@1300







食飽飽後去埋隔離嘅超市逛,外國嘅超市當然應有盡有,但多了點法國元素,就是巨型鵝肝、紅白酒、士多啤梨及不同種類芝士。識飲識食嘅團友們仲睇超市標價睇到嘩嘩聲。如其中一款陶瓷瓶嘅乳酪香港要賣五、六十蚊兩瓶,但這裡只需$15-20-HKD 四瓶,畢竟歐洲專門出口奶類製品吧。及後高Ling及Ellen去買電話咭,話怕迷路要數據來睇google map喎。銀仔外遊通常都係用當地Wifi,亦不怕迷路,而且都不建議好似係香港咁機不離手,做香港日常做嘅事,所以不加意見了。






用膳後再揸十零分鐘車到達高Ling最想去嘅山城Gordes,果然是好宏偉的山城。住宿比想像中少,於市中心見到一個住宿路牌,但行來行去都找不到。其實法國lonely planet只得半版介紹Gordes,回港後check住宿網,發現Gordes全鎮只有三間住宿。最後入住小鎮邊緣,係一入鎮時唯一一間搵到的Le Mas De Gordes Hotel €139($1172-HKD),連早餐。雖然稍貴,但服務一流,職員十分nice。仲要之前歇冬翻新過,今日係重新營業既第二日。


安置好行李後,一行四人出發遊覽小鎮,影影相、逛逛市中心。山上果然好凍好大風,期間仲見到有人於叢林中摘露筍添!






駕駛呢架古董車嘅兩位老夫婦原來住埋同一間酒店


遊覽後回酒店攞返件褸再出發搵食,望望餐牌又係好平。餐廳係酒店接待員介紹既叫L’Artegal。3個Course嘅法國大餐剛好有4個選擇,我地便點勻成個menu。每個套餐只需€37,即三舊水港紙,喺香港真係邊度食得到呀!開埋紅酒連Tips每人都只喺€50咋!這法國大餐食足兩小時,就算餐廳只得一個職員,佢都對每位客人食完一道菜才上另一道菜,亦都記得我們各人邊個選擇邊樣菜。雖然佢都知我們會share,可見法國人對他們傳統飲食文化嘅執著。法國餐,食松露、鵝肝少不免,但原來兔肉都係法國餐嘅主要菜色,因為之後經常見到係餐牌出現。(港女按:餐廳約有十張枱,樓面只得一個職員。開頭想幫我地點菜,但未諗定,之後再揮手示意,佢叫我地等一陣。觀察到原來佢落單、派餐都胸有成竹,有自己嘅步驟,所以就乖乖地等候。呢餐唔知算唔算係正宗法國大餐,但論味道、份量,喺香港應該要俾多三倍價錢。)
@2115


遇上晚霞


頭盤

主菜

甜品







16 則留言:

  1. 全名Mercedes-Benz ,可能要HK人講Mercedes太翹口了,所以只講Benz 卦。

    回覆刪除
    回覆
    1. 咁Benz又真係幾順口嘅,但Mercedes都要識,唔係點同世界接軌呀!哈哈~

      刪除
  2. gordes 我好鐘意, 所以去過兩次。 記住歐洲去餐廳唔好舉手叫佢哋呀。 要等架。 你好趕都只可以用眼神同佢哋接觸示意。 如果唔係佢哋唔高興㗎。 除非你見到有鬼佬舉手啦。 如果唔係千祈唔好呀。 呢個係我住了一段時間學識嘅習慣。

    回覆刪除
    回覆
    1. 所以文化唔同,真係要慢慢學習,仲有講野要蚊滋咁細聲,你知廣東話真係好嘈嘛,我地都唔好50步笑百步⋯
      咦? 係仲住緊? 住幾耐? where?

      刪除
  3. 超爽!!! 豪華美食之旅. 引C人, 流口水........


    回覆刪除
    回覆
    1. 我做開乞兒,仲唔到我豪番次!

      刪除
  4. 以前見法國人唔多 social, 可能英語唔好既關係. 比人感覺高傲. 今次去見到好多法國人講英文, 同以前好唔同.

    歐洲都係要早d 租車,因為自動波唔多. 我最近幾次租車d 車都幾新. 第11張相右面個舊乜來架? 我今次無時間去 gordes. 我係去到provence 先開始諗西班牙就係隔壁

    Strawberry 好靚呀! 我有一次係 colmar 塊鵝肝大塊到好似唔駛$$$

    回覆刪除
    回覆
    1. 我都覺得法國人係英語唔好既關係啫,因為8年前去突呢西亞時,見D法國人連基本英語都唔識,但佢地又好想問你野。我覺得佢地有自己語言,無乜必要用他國語言來就你。
      果個係touch控制器,好似手提電腦咁呢~
      鵝肝係大塊,但諗起幾殘忍⋯

      刪除
  5. 剩係見到山城,我乜都見唔到喇。

    回覆刪除
    回覆
    1. 知你掛住個山城啦! 快去啦~

      刪除
  6. 陶瓷瓶嘅乳酪真係好好味,我要等減價先捨得買...

    回覆刪除
    回覆
    1. 咦! 果然係識飲識食嘅毛毛噃~

      刪除
  7. 最緊要夠大可以放晒啲篋..
    看照片已經感受到慢活悠閒愜意的味道^^

    回覆刪除
    回覆
    1. 呢種慢活悠閒愜意味道我旅途上都經常出現,但豪華嘅話算是第一次了。

      刪除
  8. 回覆
    1. 係,但之後嘅行程更有驚喜。

      刪除