2015年7月26日 星期日

Day 23 重投文明世界(墨西哥Cancun)

(Day 23) 2014-11-23
住宿:Motel Las Cerezas
行程:夏灣拿(古巴) —>  Cancun (墨西哥)

今日即將要離開古巴,前往本旅程嘅最後一站墨西哥東部。

一早起身,連日大雨終於結束。難得最後一日好天氣,即刻出去行街影靚相啦~ 離開遊客大街,穿梭於平民區,竟然影到我本行程最愛嘅照片!及後去埋港女最想去嘅malecón,可惜有好天氣,有靚景不過⋯

正是「計劃了,照做了,得到了,時間卻太少 Oh no no no~ 」(港女按:一直諗如果可以沿住malecón漫步就好,可惜只可以夠時間影幾張相,又去唔到有耶穌像嘅小山)

左:住宿嘅露台,景觀開揚
右:民宿地下有René間民宿嘅標誌

本行程最滿意嘅攝影作品

觀光車



舉世聞名嘅Malecón




專程等到遊覽後才食早餐,應該係Brunch至啱!因為中午機,又是短途廉航,都係食飽上機有著數!於是去返早前食過、感覺最抵嘅餐廳啦~ 再次介紹該餐廳座落於遊客大街中心地段,一個set只需$10-CUC($78-HKD),包括前菜、主菜、甜品及兩杯飲品(雞尾酒、咖啡),當然叫返食過番尋味嘅龍蝦做早餐啦。不過今日太早,所以Live Band未瞓醒,無歌聽。



喺餐廳不停補返影相、又慢慢品嚐隻龍蝦,臨尾飲返杯咖啡,不過杯Espresso個杯個size唔係好啱⋯(銀仔揀齋啡 - café solo,話要嗒真啲古巴咖啡)最後攪到好遲先返住宿收拾行裝。返到民宿附近,未見到Rané,本來佢話今日約左佢個妹車我地去機場,唯有先返Juan & Magarita 執好行李,跟住再次落樓,做最重要嘅事 -買手信。
及後終於喺街撞到Rané,佢喺咁催促我地,最後買唔切churros,無得食... 佢細妹同妹夫車我地去機場,收費$20-CUC。臨別時覺得René待人是真誠的,大家來個擁抱,有種親人嘅感覺呀,佢仲係咁話係我地papá!(港女按:寄唔切post card,交低俾René,等到過埋農曆年先收到)

是一間好有園林感覺嘅餐廳

又係Pina Colada

每人一隻龍蝦做早餐!


係車上,與René細妹兩公婆傾談,原來以前幫政府打工,所以男嘅去俄國,女嘅去中國學法律經濟,唔怪之之前René成日話自己細妹以前幫卡斯特羅工作啦,原來是真的!喺共產國度,可能全民皆兵。


去到機場額外仲要每人$25-CUC離境稅,唔夠錢又要去找換店... 已經好趕時間,排隊排到


行程最後一站,將會返回墨西哥,以Cancun坎昆一帶為終站。選乘十大危險航空公司之首嘅-古巴航空,機程無乜特別,係臨降落時比較顛簸。
再見古巴,希望佢地有個更美好的將來。(港女按:起飛時又忍唔住喊,呢個星期真係「來回地獄又折返人間」。執筆時剛睇完一個用廣東歌做主題嘅港台節目,有個角色感歎影相,係咪可以保留記憶,定係影完就擺埋一邊,然後好放心咁遺忘。今次唔見相機,雖然失去咗重溫嘅機會,但就令我地更加努力記住旅程嘅種種。)


向航空公司櫃台交完離境稅才會出boading pass



墨西哥-Cancun坎昆

抵達後,看見一班典型既內地人,但竟然全部手持特區護照,所以我之前講過,將來既特區護照係世界各大關口出入境有機會會更加困難。


到達行李大堂,Cancun機場細得可憐,但又不停有來自世界各地既航班。整個行李大堂都擠滿了人及行李,連走動都有問題,只看見一大條沒有龍尾既蛇餅。另有一大群人正在另一個樽頸位打尖,因為好多人跟本唔知邊度係龍尾。正當心裡十五十六,諗緊排隊定扮傻仔跟大部份人打尖呢?不過既然自己已知道龍尾,做返個守秩序既香港人,希望呢個百年品牌得以保存;如果連自己都做得不好,又有乜資格話人呢?當然很多人也插隊,更是那班「新」港人嘅專長Tim!點知排了差不多一小時,將進入近X光機既正式蛇餅時,個職員竟然無故截龍喎! 叫我們重新再排另一條看不見龍尾既隊喎!這條大家排了一小時隊既客人頓成了無主孤魂,而「新」香港人仲用國語大叫煽動要衝入去添!當佢想解開排隊圍欄膠帶時,即時被關員制止。雖然我都好嬲,但又未至於做啲咁不文明既事… 所以這條無主孤魂既隊伍,最終全部都被迫係個樽頸位插隊,早知係咁,一早扮傻仔無咁嬲!沿途多次同其他旅客有眼神接觸時,都只有苦笑~

雖則話這班內地人的行為不是,有待改進,但從旅遊角度出發,又是銀仔老生常談的話題。他們是一個家庭,年青的帶著父母來旅行,試問香港人會帶父母或小朋友來這些普遍香港人口中覺得落後國度嗎?其實,內地人早已向世界出發。




幾經辛苦,心力交瘁下終於辦理完入境手續。大堂外有租車櫃台,幫襯了Thrifty,於是決定餘下4日旅程用自駕來完結,租車4日只需$148-USD,其實有4日半,真係抵到爛!櫃檯個女仔帶我地搭穿梭巴士去租車公司,仲想幫手搬行李,服務好好呀!


乘搭穿梭巴士去到機場外圍嘅租車公司取車,本來講好要架棍波,但職員都係俾咗架自動波我。為咗享受駕駛樂趣,都係堅持要棍波。租嘅係volkswagen,取車後朝Cancun市中心方向換錢開餐等等⋯ 於公路四處探索,期間駛入油站,發現唔識入後波!好在求救成功,油站職員教路,原來係用力按枝波棍才可入後波⋯ 哈哈~ 銀仔孤陋寡聞,按波棍倒車是第一次知道。



去市中心換完錢,於公路旁見到間Fonda Argentina食巨大扒餐,認真平靚正,仲有斷斷續續嘅wifi,終於再同世界接軌,由於一星期古巴旅程未上過網,感覺重回文明世界呀! 


接駁車

左:Cancun的公路
右下:Cancun係世界知名渡假區,大型商場少不了



牛扒真係好"巨"


天已黑齊,去唔成計劃想去嘅小鎮,於是摸黑於公路往奇琴伊察方向駕駛尋找住宿。經過一兩間住宿唔太啱心水,最後係公路旁既Motel住一晚$400-Peso($200-HKD) 咁大個仔第一次住,覺得唔錯喎!(港女按:抵係好抵,但求有床瞓有涼沖係無問題,不過好大陣煙味,枕頭底有一大撻煙灰,地板仲依稀見到蠟燭痕跡,而且都係有蚊,又要勞動滅蚊大隊長。呢種Love Motel特別在,職員盡可能唔會同你見面,房內有個旋轉窗口用嚟找贖。沖涼房好大,又有長櫈,對於有特別需要嘅客人係唔錯咖,哈哈。)



左:旋轉窗口
中:浴室
右上:另一角度,全是開放式

14 則留言:

  1. 沖涼房好大....幾個人一齊都得? heeheeheeh

    回覆刪除
    回覆
    1. 王子:呢D motel 擺名比人爆房架啦! 哈哈~
      jane : 一個花灑掛高D,都可以好多人沖,wakaka~

      刪除
  2. 打蛇餅!咁攪左幾個鐘先離開機場?
    機場額外仲要每人$25-CUC離境稅,你之前唔知道?

    回覆刪除
    回覆
    1. 港女:知道,不過時間緊逼,身上已無CUC,所以要先換CUC,再排另一條隊拎離境稅印花。換錢時,排前面D人又係咁比較唔同貨幣的匯率,所以等左好耐~~~

      刪除
  3. 果張得意傑作真係好colourful好靚
    如果鍾意睇古董車的人去到古巴一定開心到癲~~~~~~
    排長龍真係人都癲,羅湖原來已經好好,好有效率
    個浴室咁大,係咪可以在入面開台麻雀同埋食飯kakakakaka....

    回覆刪除
    回覆
    1. 係呀! 唔開將來無得睇架啦~ 諗諗佢啦基爾!
      如出去外面世界睇睇,其實我地住緊嘅地方真的好幸福了。
      個浴室都唔知做乜起咁大,哈哈~

      刪除
  4. Silver,我在Cancun住過兩晚,這裏的海灘好靚,是度假勝地.好久沒有揸棍波了,所以我租車一定自動波.

    回覆刪除
    回覆
    1. 可能Cancun太過商業化,不在我今次旅程之列,並無認真遊覽,緣慳一面了。
      租車租得多,原來好多地方棍波車比較common,而且比自動波便宜,Andrew,練返棍波有著數噃~
      Andrew,你係加拿大都生活過,外國是否多highway又少燈位,所以先多棍波車?

      刪除
    2. Silver,加拿大都好多Highway,但現在一般出車都會出自動波車.

      刪除
  5. 古巴真係消費幾高, 感覺上墨西哥的Highway 建設得很好! 事實上外國多highway又少燈位, 不過大部份人都開自動波! 而 Cancun 的 downtown 都算ok.. 而 Cancun 舊城區的的紀念品都ok平! 不過遺址內賣的紀念品價錢都平!

    回覆刪除
    回覆
    1. 不過講開又講, 美國 Jetblue 航空公司已經回復飛古巴的航線了! 雖然古巴的味道會消失, 但對於古巴人民來說, 可能會有好處的, 於古巴來說始終都想多個朋友好過多個敵人的!

      刪除
    2. 我無睇其他人早前去嘅資料,可能以前消費無咁高呱,依家半開放狀態開始掠水。 哦,原來Cancun是這樣,不過Cancun這類商業化嘅城市不在我遊覽之列,緣慳一面了。
      你第二段留言絕對認同! 親身到過後更加明白當地人嘅感受。

      刪除