Day 19 一無所有by港女(古巴夏灣拿)

(Day 19) 2014-11-19

住宿：Casa René

行程：夏灣拿 

港女：古巴係我今個旅程最想體驗嘅國家，可惜期望愈大，失望愈大。一到埗已諸多阻滯，幸好民宿主人非常幫忙，住宿一帶都尚算安全。第二日影完結婚相就一直落雨，只可以喺舊城區徒步閒逛。到第三日，接二連三嘅打擊實在令人崩潰。

一早起身食早餐，有多款生果、果汁、麵包、雞蛋，仲有屋主親手沖嘅espresso咖啡，佢話真係好好飲。期間發現民宿對面天台有隻狗(洛威拿)，活動範圍只得天台，覺得佢都好可憐。

打點行李後，同民宿主人要求左好多次，佢終於肯換本地貨幣CUP$75俾我地，仲教我地點兌換當地使費。起程去Viazul巴士站買去Camagüey車票。的士司機唔肯收本地貨幣，最後CUC$4成交。去到車站，幾經詢問，職員話未來幾日去Camagüey沿線嘅巴士飛已售罄，於是臨場決定去Trinidad同Cienfuegos。買完明天嘅車飛，銀仔話要行去古巴一大地標"革命廣場"，結果兜兜轉轉行咗差不多一小時，沿路見到不同類型嘅房屋，可見共產都唔係眾生平等。

冒住風雨去到革命廣場，影咗一輪相，就搭的士返舊城區CUC$3。原本一心去革命博物館，但沿路銀仔想睇下有無其他選擇，於是喺車上睇書，而濃烈嘅汽油味令我感到非常唔舒服，幾經顛簸，去到原來目的地後急急落車。得知博物館於5時關門，便打算先去醫肚，就喺呢個時候，銀仔問我拎相機影博物館門口嘅坦克車，我先發現相機不翼而飛，相信係我忙亂間無將相機放回慣常位置，落車時留咗喺車廂。的士一早已絕塵而去，我諗到呢大半個月好多快拍，同在地人合照，仲有最重要及唯一一段，係巴哈馬群島結婚行禮嘅片段全部遺失! 只有六神無主，喺附近街頭希望撞返架的士。結果當然喺無功而回，最大嘅不幸往往由連串失誤造成。今次買新相機附送32gb記憶卡，好用到無諗住備份。到達古巴後曾經諗過換另一張記憶卡，但又感覺安全而作罷。。。民宿主人都有話幫手搵，不過跟住都係沿路行多次，又係再次失望。相信呢個一生人一次嘅旅程，相遇嘅人和事，只能盡力靠腦袋記住，而健忘嘅銀仔就算唔記得呢個旅程嘅種種，都一定會以呢個天大嘅教訓嚟不停警惕我。今日係同銀仔結婚後，佢第一個生日，真係有說不出的難忘。

天陰又落雨，苦候好耐才有架舊車經過做襯托⋯

心情非常沉重，喊咗好幾次。6點幾先午飯晚飯夾埋一齊食，去返尋晚間靚餐廳，但感覺已是天淵之別，只好當補影前一晚嘅相。港女好耐無試過食不知味嘅感覺，叫咗一份牛扒同一份龍蝦，都無咩心情品嚐。。。銀仔話好彩佢自己部相機都有好多靚相，而且一直有備份，但願餘下旅程可以順順利利。

CUC$35($280-HKD)

之前一晚D相無晒，依家瘋狂補影，認住係"Los Nardos"

如無記錯好似係蝦及飯，好足料，但齋蝦好似drydry地⋯

古巴Malta麥汁當然唔少得啦~

食完落返地下仲多人排隊呀!

食完飯出門口，仍然忍唔住張望馬路上嘅車輛，希望奇蹟出現。最後拎返民宿嘅係兩個總值CUP$10嘅火腿芝士包，係第一次成功用到本地錢。呢CUP$10用得著其實好艱難，原先去第一間麵包舖買包竟然收我$3-CUC($24-HKD)，即時踩佢都傻啦，於是再去第二間見有個價目表$5-CUP一個包，我即刻想問清楚幾錢一個麵包，即時被經旅行驗豐富既銀仔制止，就係咁，扮當地人咁，一手攞麵包，一手放低$10-CUP二話不說就走人。 都係銀仔旅行時經常掛起咀邊既一句說話「唔係要識講價，而係要知價」

銀仔叫我執聽日去Trinidad嘅行李，但我只想今日快完，所以打完呢篇文就瞓覺喇。

餐廳就係國會大樓斜對面

好好人既屋主Reńe叔叔，跟港女傾計

一般古巴民居既格局，我相信Reńe是比較富有嘅一群

當年屋主René去馬德里表演時嘅Poster，大大張鑲係牆上，之前嘅相唔見左即時補影!