Day 18 婚照煞科(古巴夏灣拿)

(Day 18) 2014-11-18

住宿：Casa René

行程：夏灣拿

由於係香港一早經facebook預約好當地攝影師（到而家都唔明點解佢地可以咁自由上FB），替我們影一輯婚紗相。原本約早上9時，不過喺牙買加發現9點已經好熱，所以改為8點。早D無乜人又無咁熱，所以0600已起床準備；港女穿起婚紗化埋妝，屋主René叔叔即時眼前一亮咁呀!

準時0800時有人係樓下叫我們，出露台一望已見有三人在樓下等候了，估唔到幾認真製作噃!

攝影師年約40歲，另外有一名女助手及年青人幫手，裝備睇落十分專業，全片幅相機、多支鏡頭、閃燈等等一袋二袋。我與港女穿著隆重既衣著，跟隨著攝影團隊穿越破落不堪既大街小巷找尋景點。

影相其間發現忘了帶花球，無理由用珍貴既時間返轉頭架! 都係算吧⋯ 攝影過程歷時一小時，當然係可以加鐘啦，不過同港女都覺得差不多了。而且隨著太陽上升，天氣開始炎熱，大汗既港女開始滿面水珠。 完結吧! 約好下午來Reńe家中交收。

於是穿著婚紗沿最旺既步行街行返民宿，因為唔太熟路無得選擇，沿途都吸引所有人既目光呀! 

古巴既婚紗相算是最後一輯婚紗相了，呢個歷時一兩年，係世界唔同地方既個大Porject終於完結了!!! 以後唔使煩! Yeah~ 因為影婚紗相都幾打擾旅行既時光的。 起初諗住緊接住墨西哥既七大奇蹟奇琴伊察會再影，但原來發現要申請的，因為當地係神聖之地，而且從未有人成功過。 回想起成個影婚紗相歷程，較遺憾應該係冰島時無影⋯

以下係銀仔與港女影過婚紗相既地方：(專揀D無香港人影既地方 :D ) 

俄羅斯西伯利亞、蒙古、馬里亞納群島羅塔島、巴哈馬群島、牙買加及古巴。

由於昨天提款不成，即時返住宿換衫，去銀行再試過，先試ATM又唔得，而其他人就攞到；再排隊，銀行可以唔知透支定碌卡，諗住十拿九穩，再比恆生visa試，點知又唔accept，徬徨之際再走返住宿攞埋最後張HSBC master卡，再攞埋港女張銀聯，及剩下既所有美金（$300-USD），如唔得都可以頂得住；剛去到港女剛啱試完佢張恆生visa都係唔得比人趕返出黎，諗住再排過，點知門口控制人流既阿嬸好好人，見我地由尋日開始已不停排隊，叫我地唔使排直頭係頭位等召喚，好在最後機會張master卡攞到錢，攞$600-CUC額外扣多$19-CUC費用，呼！ 一天都光晒～ HSBC果然最信得過! 有錢身痕，即時擦返餐飽先～

$10-CUC（$78-HKD) 一個西班牙式套餐，有前菜、主菜、甜品及兩杯飲品；主菜係原隻龍蝦，咁既價錢絕對超值啦~ 而據港女學西班牙語時得知，西班牙套餐最特別係有兩杯飲品，最後一杯通常係咖啡或茶； 餐廳內有樂隊駐場，小費醒左$2-CUC，食足個半鐘!

食完返住宿，攝影師們已到，播相我地睇，覺得好滿意，請人影打晒燈係唔同D，有隻好精美既CD rom比我地，全程$200-CUC+$20tips($1600-HKD)。 攝影師走之後屋主擰晒頭，話$100-CUC係當地已有埋化妝幾套衫既攝影套餐啦，仲有硬照同相簿喎⋯ 算吧，$1600-HKD影一輯婚紗相真係去邊度搵。

諗住掉既即棄婚紗屋主要左，花環同無用過既花球就俾左攝影師。

其實第一張係古董車前影嘅婚紗相感覺好正，諗住曬大佢做油畫，於擺酒當日作門口相，可惜send比曬相公司將其放大時發現了攝影師有輕微手震，即曬大相會效果無咁好； 於是要選擇另一張相，其實最後一張係教堂前影都唔錯，可惜又覺得太普通，感覺像去了歐洲婚紗照熱點一樣(現在興歐遊影婚紗照嘛)，最後選擇了由銀仔自己操刀，係牙買加一個好有牙買加風情既街邊檔影既婚紗相。

下午開始落雨，都算天公造美，影婚紗相時就風和日麗! 於是雨中行街，有銀係身終於有心情走入商店，看見一式一樣同等價錢既手信。

食當地人排晒長龍既甜筒$1.3-CUC，及飲古巴可樂。臨返民宿前係士多買兩罐古巴可樂及"來老野"既雀巢中筒裝雪糕返民宿個雪櫃雪住佢先~

蔬果店，當然要入去睇下啦～

雨果博物館及其真跡，不知是否"鐘樓怪人"呢？

古巴行程係港女最想去既，所以由佢plan，而英文版既Lonely planet當然只係佢識睇啦。 行完街返到住宿，覺得今日好似無乜地方遊覽過，講吓講吓話到港女發脾氣，其間話吓比本LP佢唔識用之類既說話（因為無中文版），唔識重點遊覽，錯過左好多特別景點，如古巴最出名，一諗就係哲古華拉、革命、雪茄、冧酒既野，但比佢plan，佢話去Museo de la Ciudad，點知LP個開放時間係錯既，冒雨去到已經夠鐘閂門，門口職員都話知道旅遊書個時間係舊既。港女原來一直無提及其他選擇… 最後我都找出原因，因為港女係backpacker新丁，比個重擔佢當然有問題啦，係我錯! 對唔住⋯ 都係我衰啦愛理不理，哈哈~ 不過最衰都係我唔識英文喇! 古巴既LP我都覺得無之前睇過既咁好，據港女講只教人搭的士，因為當地巴士班次好混亂，車廂又好擠迫而草草了事！ LP既風格通常係教人體驗當地文化嘛！

民宿主人推薦抵食晚餐，要行出大街，感覺無步行街咁安全，因為烏燈黑火襯托著殘破建築物，也有較多無所事事既人留連。到達餐廳既建築物，地下排晒長龍，建築物有三層，全是餐廳，不過排隊既人全是René介紹三樓既餐廳，看來很多遊客都慕名而來噃! 排隊期間個職員詢問排隊既人，會否選擇其他樓層既餐廳，因為即時有位，但排隊既人都堅定不移! 

排了差不多半小時終於到我地⋯ 上餐廳內再等! 餐廳內部感覺豪華，而且有人彈鋼琴，看來古巴好既餐廳必定要有音樂元素噃!

叫了兩個set晚餐，分別是羊脾及牛排，不過René極力推介既羊脾就一般，而飲品就係古巴啤酒+麥味飲品。

巴哈馬牙買加Cayman麥味飲品牌子係Vita Malt，而古巴則另一款叫Malta，太好飲，已愛上了，唔知香港有無得賣呢？（港女按：商店好似聽到我地呼喚，而家喺某超市同數字屋搵到。）

民宿主人好熱情，幫我地收衫，執好左間房，又話帶我地去巴士站買飛，平價賣雪茄俾我地，仲話陪我地去景點影相。開頭都受寵若驚，但冷靜諗下，開始有點懷疑，佢會唔會想從中撈一筆呢？銀仔旅行一向有自己風格，所以都唔太熱衷俾人帶住玩，而且之前都有類似不愉快經歷

P.S. 古巴國內流通的兩種貨幣：(取自網上http://www.thenewslens.com/post/10403/)

古巴上世紀90年代陷入經濟危機，時任領導人菲德爾・卡斯楚1993年授權，批准美元在古巴境內流通以回籠資金。一年後，古巴宣布廢除美元流通，改為實行貨幣雙軌制，一種是「古巴比索」（Cuban Peso，CUP；1美元約合25比索），大部分古巴居民的工資以及購買日常生活用品均以此貨幣支付，該貨幣被禁止帶進或攜出古巴。

而發行於1995年的「可兌換比索」（Cuban Convertible Peso，CUC；1美元約合1比索）大部分由外國旅遊者在古巴消費使用，並於古國全境享有與美金同級之強勢貨幣效力。在古國國內各主要都市，其市區內均有錢幣兌換所之設置，可提供各國外幣兌換古巴比索之服務。（美元於古巴國內兌換時須加收10%之稅金。）