Day 17 時光倒流(古巴夏灣拿)

(Day 17) 2014-11-17

住宿：Casa René

行程：開曼群島 —> 古巴夏灣拿

今早食自製早餐，麵包夾火腿、烚蛋，仲攞埋屋主最後一個鬆餅，因為呢個鬆餅係屋主由我地入住既第一日整比我地食的。 臨別影了張合照，但唔見埋。

趁有時間去George Town買Postcards，然後去郵局寄，郵局極富殖民地色彩，而個職員十分風趣，叫我地寫咩文字都得， 最緊要用英文寫國家名。

首先要返機場還車，循著依稀記得既路到達機場，還車後先check in後食午餐。

出發前check過入古巴係要簽證的，但有好多人既經驗只需係check in時一刻才買張叫travel card都無問題，但之前徬徨既係網上大多數人都係由墨西哥、俄羅斯出發，開曼群島就無，又唔確實有無得買，不過我覺得既然有機去應該有得買既，去左先算吧。 （港女按，香港都有古巴領事館可以辦理簽證，但要交相，hkd$250，需時五個工作天，仲要就佢極為唔方便的office hour去，又要提供到住宿地址，實在太麻煩喇）

好在係check in時都可順利買到古巴既travel card $20-USD，喺櫃台填埋個人資料俾地勤核對，地勤千叮萬囑唔好寫錯，如果唔係要再買一張。

午餐食機場既餐廳”Hungryhorse”，竟然平過市區，跟巴哈馬群島一樣喎! 兩個餐$23-USD，飽死！

保安檢查後，前往古巴既旅客係有關員特別招待的，檢查一下passport就放行，亦都無離境印。

1340 Cayman airways 準時起飛，40min機程準時到達古巴首都夏灣拿，關員細心查問，因為係特區護照見唔到開曼群島個印章左揭又揭，之後仲睇埋BNO，當見到美國VISA時偷笑。 因為出發前網上搵資料時得知，美國曾經視去過古巴是一種罪行，所以唔想麻煩當然用另一本特區來蓋印啦。

行李大堂只得兩條reclaim belt，兩條都係同一班機，只見當地人將大量物資運入境，而且好多人帶電視機入境，仲見有人一次過帶4部tim！可想而知真係幾咁封閉喎！但亦衍生咗認領行李嘅服務，只要將boarding pass交俾職員，佢地就會喺一堆堆行李裡面幫你尋寶，同埋運上車。

但睇螢幕顯示，竟然有美國機直航喎! 後來港女網上查到是有定期既包機由美國前往，接載有親人喺兩地嘅國民，同埋屬於指定專業嘅人士。

係專係book古巴民宿既英國網站，book埋程的士接送，半小時車程竟要$30-CUC($240-HKD) ，嘩！ 咁貴! 咪仲貴過香港？古巴呢D地方可能係成個月人工了！ 此刻便與港女互推責任，我就話佢喜歡book定晒，佢又話我無幫過手，大家都口燶面燶，當然大家都好快無事啦！ 我就係鍾意港女呢種性格！鬧完交好快無事。（港女按: 開頭誤會咗係1蚊英鎊，原來只係按金，我又係太天真嘅）

接我們既的士算是不錯，係韓國車，不過司機好趕，話有下一單生意。沿途所見建築物殘舊不堪，汽車大部分都是古董車。 的士經過舉世聞名既海濱長廊Malecón。無耐司機知我地喺佢催逼下，未換到當地錢，就車我地去高級酒店換錢，我地當然知道酒店匯率奇差啦，所以無換，最後都係先到達目的地。（港女按: 對古巴嘅第一個印象係時光倒流，潮濕嘅空氣，加上淡黃嘅太陽光線，好似影相用了懷舊filter咁）

去到民宿，屋主Rene已係樓下等，並帶我們上樓，由於我地未換當地錢，所以的士司機第二日再來收數。 民宿要行三層樓，好辛苦，屋主話自己係鬥牛勇士，仲比心口條疤痕我地睇，牆上掛有佢當時去西班牙表演既大Poster，又真係佢個樣喎! Rene間屋似足香港既唐樓格局(小型單位)，有一間大套房用來租比遊客，自己同兒子則住在板間房內。

安頓好一切，趁銀行未關門，問清楚Rene銀行大約位置就出發。 沿步行街直行，發現住宿坐落既步行街Obispo應該係遊客區既中心地帶，兩旁盡是較高級既餐廳、紀念品店等等，亦有好多遊客在街上遊覽。 沿步行街行好快到達銀行，門口排隊約有十多人，排了十多二十分鐘終於到我，但只准一人入去； 步入銀行，去到一個櫃台，櫃台上貼滿可以提款既方法，Visa, Master,銀聯等等，我選擇了恆生Enjoy既Visa，登記了護照，寫下中文姓名比職員核對後就出了張單，滿以為攞錢成功，殊不知係失敗⋯ 身上除了恆生Visa就只有Citibank提款卡及美金，古巴同美國面左左多年，銀行講到明換美金係要收取20%手續費，於是諗多兩諗已被人趕出去了⋯

出去即時叫港女排隊再試佢張卡，我就試吓ATM都係提款唔到，眼白白見其他人都係ATM提款成功⋯

港女試左恆生Visa都失敗，見身上有僅餘既歐羅及英鎊，唯有再排隊換晒佢! 換完銀行剛好夠鐘關門。

就係咁，今日係銀行排左三次隊，換了當地既錢都係只夠俾稍後影婚紗相既費用。

最衰都係我懶老定，係開曼群島唔係ATM提款，就算開曼群島錢都好吖! 於是好沮喪咁遊覽，一邊行一路諗解決方法，明天都係再試埋另外D卡，最壞打算焗住換美金囉，但換左都唔足以玩一個星期，唯有邊度都唔去留係夏灣拿了。

排長龍的銀行

夏灣拿有好多海明威及雨果到過既足跡，如海明威當年住過既酒店，經常留連既酒吧；雨果舊居等等。

行到海邊大家都好徬徨，無晒方向，港女連食晚飯都唔想食，想慳返D錢。

返回住宿跟Rene講剛才既情況，佢即時再帶我們到大馬路既另一部ATM提款，但都係失敗，佢話部機可能無錢，叫我明天再試。 佢知我地唔捨得食飯就介紹了街角既一間餐廳，話又平又抵食喎! 仲帶埋我地入去，當時餐廳空無一人，看看餐牌價錢算是合理，每人叫左個set，主菜味道不錯，但係白飯奇少，嚴格來講兩啖食晒，好彩叫佢加飯都無收錢。 開始用餐期間餐廳開始多人，好似旅行團咁。呢餐好似食咗十幾CUC, 有飲品(啤酒或汽水)，同埋雪糕，算係咁了。 

回想返遊覽了夏灣拿幾小時，印象唔錯，感覺安全。

食完飯，就返住宿沖涼瞓覺，因為聽朝要一早起身影結婚相。

"單車的士"整個行程都無坐過，因為一睇就知貴野

海明威當年經常下榻的旅館Hotel Ambos Mundos 

今日只有這些照片⋯

讀萬卷書不如行萬里路之認識海明威：(取自Wiki)

厄尼斯特·海明威

歐內斯特·米勒·海明威（英語：Ernest Miller Hemingway，1899年7月21日－1961年7月2日），美國記者和作家，被認為是20世紀最著名的小說家之一。海明威出生於美國伊利諾伊州芝加哥市郊區的奧克帕克，晚年在愛達荷州凱徹姆的家中自殺身亡。海明威一生中的感情錯綜複雜，先後結過四次婚，是美國「迷失的一代」（Lost Generation）作家中的代表人物，作品中對人生、世界、社會都表現出了迷茫和彷徨。

1939年至1960年間，海明威在古巴定居，並稱自己為「普通的古巴人」。在這段期間海明威寫下了聞名於世的代表作《老人與海》。古巴革命成功以後，海明威曾與古巴革命的領導人菲德爾·卡斯楚會面。2002年11月11日，卡斯楚更親自出席了海明威故居博物館的落成儀式。

現在我都係部Pad部下載了老人與海慢慢睇了。

P.S. 古巴首都，相信香港開埠以來都叫夏灣拿，但近呢幾年就跟隨祖國叫哈瓦那，好多用語或譯音亦如是，如”弗吉尼亞”、”手遊”、”拉美”，有的是簡化、有的是譯音，但對於講開廣東話既我地來講不太順耳；以及港女做翻譯工作來講，”拉美”呢D字簡直是會令中文水準下降! 但回歸後所有媒體(包括”反中”媒體)都取用，不自覺地已融合⋯ 所以銀仔流浪記仍然會叫作”夏灣拿"的!