Day 22 偽日本人(古巴夏灣拿)

(Day 22) 2014-11-22

住宿：Casa de Juan y Margarita 

行程：Cienfuegos —> 夏灣拿

屋主晨早斷斷續續拍門，開頭都無理佢繼續瞓。到預定起身時間就應佢門，佢話1030有客人入住，要求我們1000執好行李。

磨到最後一刻，先去巴士站旁，睇吓之前經過、毫不起眼既火車站，望落一架不知是否已廢棄既火車車廂，如果要搭應該好難頂喎！

毫不起眼建築物就是火車站

臨離開前，再去昨日食過既餐廳（港女按：La Cueva / Avenida (street) 46, No. 4908 E/49

&51，有緣人不妨一去），encore昨午一樣既美味海鮮炒飯，食飽飽才上長途巴士返夏灣拿，剛好數夠散紙埋單。（港女按：簡單同侍應仔講再見，話我地將會返夏灣拿，臨走握手時我心裡默默祝福佢。返到香港睇雜誌，知道原來喺古巴做侍應分分鐘好搵過做醫生，希望佢都係啦。）

返住宿攞返行李，聽講下一位客人也是中國人，由於我們要借廁所，民宿主人又唔想我地用佢私人廁所，所以開返間客房俾我地。看到床上行李本旅遊書係繁體字，應該是台灣或香港遊客；臨走屋主仲同我因今早拍門嘈醒我而say sorry tim (好在喺佢破門前剛好瞓醒左)。

街頭掠影1

街頭掠影2

候車室

上車前再要出張車票

巴士開出，係一個小鎮中途站有一位東方人面孔上車，於我們的前排座位坐下來。佢一坐下後即時問我們來自那裡，而佢自稱係日本人，但一開口已出賣左自己了，操純正京腔。雖則佢話自己係北京出世，又喺美國住咗廿幾年，但言談間話古巴開放都係靠大陸，坐緊既巴士又是中國製，講到偉大既祖國是天上有地下無一樣，又話香港正在鬧事等等…

再者日本人大多性格內斂，唔會一上車見亞洲人面孔就即主動傾談，加上及後係另一個中途站，臨排隊上車前係正車頭路中心大大聲「咳吐」隨地吐痰！正正是一個不折不扣的劣質中國人典範！我剛才仲同佢傾計，怕成車既人都標籤埋我地呀！

話說去到中途站，又一條條水魚魚貫而入食自助午餐，精打細算既我就係知呢個中途站係「謀人寺」，所以上車先前食飽飽！之前食過一件三文治都要$3.5-CUC($28-HKD)，記住呢度係古巴！不過唔食正餐我地都會消費既，港女飲了最愛既山竹汁$12-HKD，我就嘆返杯附送竹蔗的古巴咖啡$20-HKD，再食一大杯雀巢雪糕$16-HKD，抵過香港食蓮花杯。

古巴咖啡

上車後，當然同呢個偽日本人再無交流啦！佢唯一一樣可能講得啱嘅嘢，可能就係美國成日講平等自由，但其實只係白人嘅平等自由。

其實我見得最多，並不是香港人，而是中國人唔認自己係中國人，特別是擁有其他國籍嘅，因為我曾經係機場工作見得太多及旅途上都見不少，我工作時見過最誇張嘅係仲未入籍，手持中國護照，只係攞左綠卡就死都唔認係中國籍！

後來落車四散前，佢仲想兜搭我地一齊搭的士，我真係差啲忍唔住潤佢！唔認都唔緊要，都唔使認有血海深仇嘅日本人架！

夏灣拿

返到首都夏灣拿，仍然烏雲蓋頂，同港女商議後決定再次步行去有哲古華拉做外牆圖案既革命廣場，補影返遺失了的風光。沿途再行熟悉既道路，穿梭平民區之間，遇上當地平民兩父子，沿路閒談間，聽到佢地對開放既渴望，爸爸希望阿仔有更多發展機會...

遍地都是類似藍莓嘅果實，從樹上擇下來試一口⋯ 苦苦地!

左上：有點像葵涌

中：發現古巴人好鍾意望街，應該太悶

微微細雨下到達革命廣場，到達有哲古華拉同卡斯特羅肖像嘅地標，微微細雨已變狂風暴雨，快影了幾張唔滿意既照片後即時著雨褸速逃！行到無乜車既大路，好不容易才截到一架”泥鯭的”回市中心。

 José Martí紀念碑

滂沱大雨中~

讀萬卷書不如行萬里路之古巴革命廣場：(Wiki)

革命廣場是世界最大的廣場之一，其面積達72000平方米^[3]。革命廣場為許多政治遊行的舉辦地，同時也是古共中央第一書記菲德爾·卡斯楚及其他政治人物在古巴經常發表講話的地點。菲德爾·卡斯楚曾多次在重要場合在此對超過100萬人次的古巴人發表過講話，其演講時間通常為每年的5月1日或7月26日（古巴革命節）。廣場的主要建築物為何塞·馬蒂紀念碑，高 109 米（為哈瓦那市最高點之一），基座高18米。國家圖書館和許多政府機構的建築均坐落於廣場四周。紀念碑後即是古巴國務委員會主席的辦公地革命宮（Palacio de la Revolución）。紀念碑對面是內政部大樓和電信部大樓，其中內政部大樓上有著名的切·格瓦拉（西班牙語：Che Guevara）的畫像及其名言「直到最後的勝利」（西班牙語：Hasta la Victoria Siempre）。

革命廣場和何塞·馬蒂紀念碑是在古巴前總統富爾亨西奧·巴蒂斯塔的任期內修建的，於1959年完工，這一年菲德爾·卡斯楚取得革命勝利。革命廣場原名「公民廣場」（西班牙語：Plaza Cívica）。在1959年的古巴革命後，改為現名「革命廣場」。到達紀念碑頂部有電梯。

返到René樓下抬頭大叫René，無人回應(因為當地人都係咁樣搵人的)，唯有係佢民宿對面有瓦遮頭既地方呆等，並由港女打漫遊致電René，當然都係無人接聽啦！呆等期間唯有自得其樂，架起腳架影底暴雨中的夏灣拿先~

過左一陣終於搵到René，佢話等雨細啲就返嚟。佢返到嚟，話以為我地尋日返，喺巴士站接唔到我地，於是就將間房租咗俾人。佢話隔離樓有間民宿俾客人甩底，可以俾我地住，唯有好啦。

銀仔跟René上樓，冒雨喺天台搬返個背囊去新民宿，好在雨勢已無咁大。

來到另一間民宿，發現有LP推薦嘅招牌。以為民宿主人叫Juan，原來擺了烏龍，Juan & Margarita係佢父母，由佢繼承之後亦無改招牌，一為紀念、二為俾遊客可以繼續按圖索驥。

閒談間了解到古巴的變遷，現任屋主Eisler稱父母來自西班牙，本來該建築物是他父親整幢買下來的，但當卡思特羅上場並與美國交惡後，強行共產制，整幢建築物就被政府沒收重新分配。佢父母就分配了該單位，子女要搬去市區外圍區住，真係一個悲慘的故事！

另外也講到做民宿被政府抽重稅（一開始收登記費、之後每月收定額稅、每年按收入再收一次稅）等等。如果瞞稅（如報少租金、出租無登記嘅房間），仲有機會被人告發，後果應該幾嚴重。當晚就係有對法國夫婦本來無出現，點知我地安頓好之後，佢地亦到埗。Eisler唯有戰戰兢兢開埋另外間房俾佢地瞓，仲叫我地唔好話俾René知…

同時亦交代雖然出面水浸街，但幢大廈就爆水喉，得返後備水源，叫我地慳住用。

趁雨勢減弱去食晚餐，去返第一晚、即係身無分文當晚食既餐廳，為左影下遺失了的記憶。及後搭的士去另一區中心區Vedado，慕名來到全世界最好Jazz club之一的酒吧 (LP咁講既) la Zorra y El Cuervo $10-CUC($78HKD)包兩杯飲品。來到古巴，當然飲住Mojito欣賞Jazz啦~ 今晚表演嘅樂隊係－Yasek Manzano & Su Grupo! 聽咗一個多小時先完第一SET、等埋小休、聽左一陣第二SET，見已經夜深，唯有打道回府~

港女本來想買隻CD，但身上CUC已經用得七七八八，唯有作罷。

晚餐，無較回白平衡，"黃禁禁"

LP所講，全世界最好Jazz club之一的酒吧

喺門口截到的士返民宿，沿住Malecon行車，見到一大堆夜蒲青年、三五知己、一雙一對喺海傍意猶未盡咁傾偈、嬉戲。。。就好似尖東海傍咁樣～

古巴之旅就這樣到了尾聲（港女按：銀仔叫我問司機想唔想換新車，司機話梗係想，因為架車真係太舊。銀仔跟住就話，如果無晒舊車，對遊客就無咁吸引～～司機跟住答咗啲嘢，我聽唔明喇 >.< )