2015年7月18日 星期六

Day 21 大開殺戒(古巴Cienfuegos)

(Day 21) 2014-11-21
住宿:民宿Casa Yaité
行程:Trinidad —> Cienfuegos 


0730起床,一早起身行出天台,食民宿預備既早餐CUC$6($48-HKD),有三色水果、麵包、炒蛋同果汁,對遊客嚟講唔貴,但唔合理,最後將飲唔晒既果汁帶走。臨走時,屋主仲問港女收返飲左雪櫃內一枝水既錢CUC$1($7.8-HKD),真係有點離譜。(港女按:話說佢尋日收咗我地CUC$20,但食早餐時叫我地俾護照佢登記時,見到佢寫房租係CUC$15,睇嚟係古巴式打斧頭)


離開民宿沿路去巴士站,朝早9點幾已熱到爆,所以check-in後就喺車站等開車,無再出去逛。臨上車,打算將背囊放到車底,點知一定要由職員擺放,盛惠CUC$1,我當然醒啦,放低了當地cheap錢幾CUP就算,佢亦當然無堅持要CUC,古巴人搵錢方法何其多。





Cienfuegos


上車訓左兩轉就到達Cienfuegos,繼續一大個太陽,首要任務就係搵住宿。係街道一直行尋找當地可供住宿個”工”字標誌,開頭搵到一間樓底好高嘅舊建築,不過民宿主人話今日無房,會帶我地去佢個妹到。位於後一條街嘅係新式平房,睇落幾企理,又是設計時尚有品味,就以CUC$20($160-HKD)成交。第一間民宿嘅房東同個妹嘅英文好流利,完全無視港女的BB西班牙文,仲話接待過香港人。安頓好之後,趁民宿主人唔係廳,拿拿臨喺飲水機斟返滿枝水先出去逛。。。

巴士站看見當地人坐既公共交通工具

認住左上角既"工"字符號就係住宿喇~

大廳及偏廳,右下黑忟忟係我間房


Cienfuegos感覺較大,無Trinidad咁遊客區既感覺,也比較雜亂,畢竟雜亂才是真正古巴嘛~


放低行裝就去醫肚CUC$6.95($56-HKD),餐廳菜單係全西班牙文,兼用本地錢標價,埋單時難得老實地用CUC$1 = CUP$25
計數,實在為之感動,所以俾左CUC$1 tips。侍應係一個年青人,佢話間餐廳係家庭生意,跟住就係咁播Hotel
California,仲問我地識唔識。傾談期間佢話好鍾意呢首歌,不過佢就話無時間學結他。The Eagles的名曲Hotel
California,令到銀仔重新認識,愛上了!


唔上遇見不少有品味的家居

(左下)港女譯:永遠革命




之後出發去市中心行吓,有的士及馬車選擇,Cienfuegos馬車仍是主要交通工具之一,就像當年去埃及時一樣,有得揀,當然選擇了搭馬車啦!每人CUC$1($7.8HKD)



到達市中心,開始見到有遊客,仲有賣漢堡包薯條嘅快餐店。路經雪茄烈酒舖,終於忍唔住買左一盒雜錦雪茄同一套Havana Club冧酒酒辦。
舖頭內見到早前René話賣比我地雪茄果款牌子,係全部鎖晒入玻璃櫃既頂級貨色,問一問識員,一支已貴過我買一盒啦!


左下呢五個人經常見,好似係被美國扣留中的政治犯

右下人頭牌雪茄應該就係最名貴既一款

戰利品,都係cheap啱我




行到海邊坐低食串燒同飲野CUC$4,搭枱有兩個阿姐好好傾,佢地喺西班牙出世,持西班牙護照,但定居古巴多年,無打算走。其中一個阿姐個仔喺美國生活,佢定期都會去探親,但一啲都唔嚮往美國生活,話因為美國太大交通無古巴咁方便喎。跟住講起喺古巴唔係見到太多中國人,佢地就笑笑口話中國咁大,周圍都係中國人。

喺廣場影相,見到微型巡遊及雙彩虹,港女話喺香港成日都睇唔到,要自拍返夠本。







經過超市買左支有汽水CUP$10,即CUC$0.4左右,今朝民宿竟然索價CUC$1!離晒譜!


行完街截架馬車打算返民宿,再次乘坐才了解馬車係點到點,即係有固定起點終點站。返回馬車總站馬伕仲好好人比我地上「司機位」影相添!

步行回住宿看見街頭酒吧,供上年紀一族即酒鬼留連,也遇上醉貓問攞錢添,不用理會就無問題。 路經一間小店門口大大個招牌有Piña colada賣,回想返來古巴最hit 當然是Mojito啦! 其次最常見好似就係Piña colada,古巴旅程中我都飲唔少。 而及後上網search得知該飲料原來是發源於加勒比海架!



糧油店

街頭酒舖





返到民宿展開滅蚊行動,銀仔打死左廿幾隻蚊,好誇張。就係因為屋主太有品味,房間被舖及窗簾用上黑色,所以引來群蚊亂舞。
銀仔搵屋主求助,屋主話古巴係咁樣,佢地已經習慣同蚊共存,所以無殺蟲水或電蚊片⋯ 咁都得!



再去老實餐廳食晚飯飲啤酒,今日隨手揀個菜式,唔係太啱胃口,下次都係揀啲睇得明嘅菜名,CUC$10。(港女按:等食飯時,坐埋窗邊的吧台,見到街頭有年紀比較細嘅青年玩踢波。之後侍應仔一有空檔都會由窗口望出去,見到佢高高瘦瘦嘅背影,感覺到喺搵錢之外,心裡應該仲有一啲未實現嘅夢想。)



食完飯返到民宿,港女記事時,銀仔繼續努力用雙手加蚊怕水滅蚊。


16 則留言:

  1. 回覆
    1. 所以我一定要滅晒佢! 蚊係我死敵,佢地好愛我⋯

      刪除
  2. 去大陸旅行就時時都要滅蚊囉!間民宿都好靚呀!行去海邊遠唔遠?

    回覆刪除
    回覆
    1. 民宿近巴士總站,但去海邊就有點遠,要搭車。
      其實突發奇想,下次想帶埋電蚊拍,Wakaka~

      刪除
  3. 嘩, 好恐怖呀, 咁多蚊, 你o個晚中左幾多啖呀?
    siempre呢個西班牙文我識呀, 幾叻叻, 以前合唱團唱過首amigos para siempre(friends for life), 係巴塞奧運o既theme song, 我仲順便鍾意埋sarah brightman

    回覆刪除
    回覆
    1. hehe~ 滅左8899,又有冷氣,所以無比蚊咬~
      嘩! 識咁多! 你同港女溝通得到喎!

      刪除
  4. 「正當銀嫂好深情地寫下旅行記事嘅時候,你就係旁邊不斷拍蚊和噴蚊怕水」=====>想像到當時喱個畫面應該係會幾搞笑XXXD
    不過我都係超怕蚊,一定要消滅晒先瞓到!!!!!

    回覆刪除
  5. Silver,在古巴好像回到六,七十年代.

    回覆刪除
  6. 一隻馬拉咁大架車,好慘啫!

    回覆刪除
    回覆
    1. 我見佢跑得好輕盈吓噃~
      不過毛毛,我有另一種諗法(不喜勿插),如這些動物能夠用佢嘅技能生活(不是做奴隸),這樣還有生存空間; 如我早前睇過高清台嘅"冰原上的孩子",講到西伯利亞極少地方能保持著馴鹿遊牧嘅生活,而有些已發展嘅極北城鎮,已爬不到馴鹿嘅足跡,只能夠係巨大嘅雪房看見他們的屍首,成千上萬隻堆積如山,他們攞黎賣或出口,都睇到我不是味兒⋯ 畢竟人類就是破壞者。

      刪除
    2. 如果這些城鎮仍過著遊牧生活,相信D馴鹿並唔會只比人類宰殺⋯

      刪除
    3. 如這些動物能夠用佢嘅技能生活(不是做奴隸),這樣還有生存空間==>呢點我同意,但我最討厭係...好多時D動物雖然付出咗佢哋嘅努力,但得唔到人類嘅善待!

      上次我去芬蘭,有狗拉車,D狗隻隻都瘦到皮包骨,喺D咁凍嘅地方,要人拉車又唔俾飽飯人食,人類係咪真係要衰成咁吖!

      刪除
    4. 不過我無諗到連芬蘭都係咁,所以我地香港人真係要見多D個世界。

      刪除