Day 3 暴發戶(雲南西湘版納)

(Day 3) 2014-5-22 晴

住宿：金色港灣大酒店

行程：昆明 —> 西湘版納

酒店無冷氣，但高原既晚上尚算涼快，能夠入睡，電蚊片有效，也無被蚊子襲擊，不過開窗瞓係大陸既大城市有一個好大既問題，就係晨咁早D車就不停響號… 嘈死了！ 索性起床！

@0730

先落酒店附近食個"營養套餐"，再問人南客運站點去，得知原來昆明都有地鐵架！ 於是返酒店執拾行裝，出發！

@0900

地鐵有個站叫南客運南站，落車過對面就係長途汽車站啦！ 開往邊境、寮國北部既車都有； 諗住買十多分鐘後開往元陽既車票，點知賣晒，要買下一班1230，無計… 見仲有咁多時間行去附近既商貿城坐吓先～

睇睇吓小說，whatsapp比港女幫我搵資料，發現原來係元陽再去西湘版納全是山路需時廿幾個鐘架！諗諗吓我最終目的係想去寮國啫，無謂㗰咁多時間吖！況且依家去睇梯田都唔啱時候…

於是急步回車站，門口有幾個人兜客以為係白牌，順便問吓，點知就帶我到售票處買飛，咁得意？ 即係唔係白牌啦！ 咁兜乜呢？

於是我買同一時間開往景洪(即西湘版納)的巴士，¥226 需時8個鐘！ 職員話可以半價退回元陽既車票… 我諗不如做兜客叫賣吓先啦～ 叫賣了十分鐘放棄了，哈哈～ 剛才兜我好好人既阿姐用半價幫我收購，睇黎我都唔係食呢行飯架啦!

見仲有時間去食個午餐先～ 食完上車，乘客裡有一啤德國情侶，個德國男同職員全程用國語溝通，真係堅！ 說來慚愧，好過我多多聲…

1230準時開車，車上只有小貓三幾個乘客，咁少客都可能因為1200有一班卧舖同去景洪（貴¥30），咁我覺得日光日白又唔使卧舖既。 車上坐椅完全係南美坐長途巴士既坐位，有多塊板"浪腳"，坐椅可以"埃"到160度！ 

7個小時既車程，全是在山區高速公路行駛，由昆明開始一直落山，沿路盡是梯田，可能無元陽咁出名吧！看著這些梯田，大部份都在陡峭既山坡上，真係行上去一轉都想死，仲話要耕田！偶爾見到這些農民係懸崖山坡暴曬幹活，都有點鼻酸酸既感覺… （咦銀仔幾時變得咁感性架！）唔知當遊客或愛攝影既人去到元陽，拍下梯田美景既同時，又有幾多人想到這個美景是辛勞既農民，不知用左幾多代先建成架呢？D農民又幾咁辛酸呢？見到農民係咁惡劣環境下生存，真的覺得自己好幸福！ 

而係山區行駛，穿過無數既隧道，開山劈石，耗費多少人力物力，工程巨大難以想像（第一次去漢中已有同感），如果無隧道、公路打通這些與世隔絕既偏遠山區，這裡既農民應更加命苦…

突然想到內地既農民挨左咁多代，政府或地產商終於收地而成了暴發戶，去到外地旅遊不懂規矩，以前討厭這些人，但現在真心替（農民們）他們高興，終於脫貧，做到佢地連發夢都唔咁諗既事，最後但願天下人人都得到幸福！

沿途仲有好多小村既建築風格各具特色，有條小村每間屋既牆上都有圓形大標記，另有條村每間屋既頂部用藍色瓦片，牆身均有隻仙鶴… 雲南是多民族既省份，真不知是傣族，彝族還是苗族了～

車程後段瞓著左，醒後已過左普洱，其實好想望一望，我地成日都飲既普洱茶原產地， 原來係雲南！ 

普洱茶，內地讀“耳”，回港後查證得知，我地香港人都一直讀錯，應該同內地一樣讀過“耳”字，但我相信，我去飲茶都應該會繼續錯落去，哈哈⋯

http://cantonesestandard.wordpress.com/2010/07/16/正讀無普洱/

原本8個鐘既車程變左10個鐘，係2200終於到左西相版納… 鬼叫呢架巴士見人少少，車底無乜人放行李，善用埋來運貨，攪到成日停站撈埋送貨… 

係長途巴士站附近找到間金色港灣大酒店，間人房價錢有兩種，¥100及¥180，都有冷氣及包早餐既；冷氣，經尋晚一役我係特別關心； 價錢唔同，分別多了窗、wifi、電腦，參觀過後梗係¥100啦！

夜媽媽放底行李即時搵野食，穿過醫院，有一間"清真"未關門，清真既蔥爆羊肉好正架！ 不過就無羊，叫了蔥爆牛肉飯；

食完係街散步，行回烏燈黑火既巴士睇吓資料，原來每朝0630都有巴士開往寮國多個城市，這裡不知是否中途站呢？ 

於是再逛，原來我落腳既大街行過d仲有小販開檔喎！馬路旁仍有人擺地攤賣水果，9成賣芒果，但體積大過日常所見既兩陪！ 

這個傣族既地方，所有建築物與泰國相似，路牌甚至政府建築物都有傣族文字，但傣族人又有幾個懂得呢？ 包括我搭火車既傣族阿姐，佢都話只識幾句咋！

行左陣開始落微雨，於是急促回酒店，但願雨水可換來農民偷得浮生啦～

香港既同事及港女講，今日新疆又炸死左30幾人，泰國軍人奪權，香港發紅色警示，聯同之前既越南，依家東南西北包圍住我都有危險呀！