Day 2 一路向西(雲南昆明)

(Day 2) 2014-5-21

住宿：昆明三葉飯店

行程：廣西—>雲南

尋晚9點零瞓，直到今朝8點先起床，我講起床都無錯，因為成晚都打橫瞓晒三個位 ～ 半夜除了偶爾辛苦醒來，其他時間都算瞓得到～ 

今早6時才到廣西既南寧，停站起碼半小時，隔離站剛好也有一列高鐵，看清楚原來係去桂林的！ 如果深圳都有高鐵向西去雲南有多好…

瞓醒後看見出面D山好得意，又越過高山又越過谷咁，經對面個阿姨講原來呢度係廣西既平果； 傾開原來佢識廣東話架！ 多麼的親切啊～ 原來佢嫁左落廣東，依家返廣西既百色探望年老既媽媽； 佢問我邊度人我梗係答返我鄉下肇慶啦～(講香港怕比人打) 當佢知我去雲南旅遊時，佢都講依家後生既，都好鍾意週圍去架！

早餐食上車前買既杯麵，及尋日食剩既煎餅； 依家係火車上過左十多個鐘，列車上係會播音樂的，但大熱既然係廣東歌喎！ 

無聊間看看DL左好耐既水滸後傳，坊間書店係搵唔到的，但竟然係AppStore 就有！ 所謂後傳名不經傳，當然文筆等等與4大名著既水滸傳差得遠啦！ 內容講眾梁山好漢接受朝廷招安後既境況；回想返水滸傳108條好漢，《後傳》講到死得七七八八，不是為國捐軀就是再被奸人所害，死剩既做仍然被迫害，忠良被害就是宋朝本色！ 於是再次綠林再起，真係唏噓…

正沈醉小說之際，突然有個職員話想攞我個個電話號碼，話幫人攞喎！ 仲求我比他好交差喎… 傾談期間佢知我係香港人，我諗係查票時要睇埋証件而得知既； 諗左一陣，無理由係佢成班同事面前請呢個人食檸檬嘛，就比個一卡兩號內地電話佢啦，反正旅程後都用不著～

@1300

午餐去餐卡食，師父收晒工，只剩下賣剩蔗”西紅柿炒蛋盖飯”，都要食啦！列車行使於高架橋，田野盡收眼底，望一望隻錶，原來已到海拔1700米啦～

食完飯返來，見原本坐對面個女人，正在先前買了外置電(即香港稱既尿袋)既男人度充電，仲話唔收錢tim~ 真係太好了～ 因為呢舊電成舊水咁貴，我又唔想加重我負擔，所以諗都無諗過要買！

火車尾聲，與一男一女閒聊起來，女既住近中緬邊境既傣族人，去到昆明溜夜再要坐多十幾小時臥鋪巴士回家！ 佢4，5十歲仲掛住玩wechat搵真愛，佢話上個月係當地潑水節，仲比左佢潑水節時穿上民族服飾既照片我睇tim! 男既係醉酒佬，鍾意不停吹水～

我已完全融入內地長途火車文化，當正自己屋企，除鞋，撓腳好隨意咁坐，認真回想，外國人坐長途車迷一樣係咁！ 後來更都唔介意個醉酒佬伸腳在我身旁既坐椅，此外車上都有好多好人，大多互相關照，然後大家各散東西，真是一剎那既緣份。

晚上8時終於到達雲南昆明，落車時與友善既乘客合照； 計一計足足28.5小時，相信係我歷程裡，需時最長，而又路程最短吧…

昆明火車站，於早幾星期前發生恐怖斬人案，現在有好多武警駐守； 落車係大馬路搵了間門面頗靚既酒店，上到房先知，¥148但竟然無空調！ 真定假呀？ 沖涼後發現剛洗完既面極速爆拆喎！ 真係乾到爆！ 於是落街食野時問一問其他住宿，原來昆明好多住宿都無冷氣架！ 搵到一間有冷氣要$178

路牌有燈會發光架，有點無必要浪費電力⋯

來到雲南梗係食米線啦～ 仲有一大桶酸菜任你落！¥8 但d肉得薄chichi幾片，加¥5再多幾片先~

食完行過隔離再食蒸餃+茶葉蛋¥7.5

返酒店途中不得不買支國產平價護手霜來塗面呀！

雲南都幾多特產，仲有雲南白藥等等!

夜市

酒店二樓有得按摩，但睇個價錢按腳一小時要¥88，咁貴梗係無幫襯啦！ 此外食野時已發現昆明蚊患十分嚴重，返到酒店發現窗既蚊網破爛，房內有蚊，於是搵服務員，原來櫃筒有電蚊片，都好d⋯ 瞓前拍死三隻蚊，希望電蚊片有效啦⋯

@2330