Day 5 膽粗粗跳車(寮國琅橋)

(Day 5) 2014-5-24 晴/雨

住宿：不知名民宿

行程：西湘版納—>(寮國)琅橋

不知是否太少香港人去，只得內地及台灣人去，D譯名以普通譯音為主，有D又譯得怪怪的⋯ 你知內地D譯名不嬲都怪怪地，如”貝克漢母” 有無人知係乜？

所以銀仔膽敢係這裡用貼近當地既語言去譯這些地名，務求想去當地既朋友問路時都令對方聽得明白! 

如早前講過今日要坐巴士去既地方叫”琅勃拉邦” 我會叫”琅巴班”

0600起床，食酒店供應既簡單早餐，求其塞飽個肚就算了，不過D米飯又估唔到幾好食噃～

巴士0735開出，只係得十個乘客； 開車前我同司機講我想去"琅橋" Nong Khiaw，問他會路經嘛？ 原來不會路經，只經地圖顯示最近既路口，佢提議我到”琅巴班”再轉車去，咁無理由要走回頭路嘛，而且我現在行程就係一路向南玩，最大目的係琅橋沿湄公河支流坐船南下去琅巴班，所以如落到去就一定唔返轉頭了… 於是我叫司機係果個不知名路口掉低我，再截順風車去啦！有個好心乘客話，個路口好似有間中國人開既超簡陋飯店，提議我住一晚，第二朝再截車去喎～

巴士一路往南走，一直大霧閉天，怪不得當年諸葛亮打南蠻既時候，士兵因瘴氣問題傷病嚴重啦！ 咦！ 我依家咪正正當年諸葛亮打南蠻既時份？ 故五月渡瀘，深入不毛…

原日太陽出來後就煙消雲散喎！ 1100到達磨憨口岸，司機先去磨憨車站停一停，一落車好似比人蟻嬲蜜糖咁，又換錢又買電話卡，最後兩樣都有做，滙率唔錯，換了¥300人仔及$100美金；而電話卡更吸引，佢話有數據有500mb容量喎！不過唔知用唔用到⋯ 開價¥50，還價¥42成交！$100美金換$780000-Kip

之後就到磨憨關口，中國離境後就到寮國，寮國果面叫磨丁關口，一入建築物已有個職員截住叫捐什麼$2美金既捐款，車上既職員就打眼色叫我繼續進行，可憐既同車幾名乘客被敲詐了… 到了入境，這裡規矩每人也夾$20000-Kip($20-HKD)落護照，我看見有內地遊客唔知規矩，關員光明正大主動開口攞架！ 唔比應該百般留難呱… 仲有呢度可以辦落地簽證架！ 

一入寮國境內，好似返回原始咁呀！沿途一片荒蕪，只見盡是森林，偶爾見到村莊，不過是茅屋、木屋，而九曲十三彎既山路，令到車程加陪延長；司機車我們到一間簡陋餐廳，$25000-KIP或¥20，餸自己揀，白飯任裝～ 

初次見寮國女子

1430去到猛晒巴士站稍作停留（內地叫猛賽既地方），係一個頗大既城鎮，地圖上顯示係個公路十字路口，見站內有車去唔同既地方，趁機當然問吓有無車去琅橋啦！ 不過要明早0900先有，需4個小時… 咁樣其實好穩陣，不過銀仔愛冒險，照原定計劃吧！而車上有個乘客，應該係當地有生意，同我起碼講超過十次話琅橋無野玩架，勸我直到琅巴班… 呢D人只懂享受，又點會明白一個旅遊者既思想吖！後來知道內地人叫琅橋做琅開，開同橋完全兩個音，都唔明點譯既! 

離開猛晒後，看來完整既石屎路已完結，全是爛路，又遇正大雨又水浸，巴士係崎嶇既山路行程"櫈"死人啦！

係崎嶇既山路，終於遇到山泥傾瀉維修而封路了，梗係啦！沿途看見好多山頭都光禿禿，似是全民皆伐木，問一問身邊既乘客，原來真係好似我猜想咁賣往中國既… 另一個又講得好啱，邊個大國係想用自己既資源吖，正如美國用中東既石油一樣！ 見到都心嗡… 所以我地香港人成日鬧大陸既時候，都要想想我地所稱歐美大國既所作所為⋯ 唔好諗埋一面，咁先係正面思考!

等候其間見有幾個女孩兜售小食，聽個生意乘客講，有次坐車回雲南時，同車有幾個香港人，沿路不停對這些小孩派錢喎… 另一個內地客話派錢唔好，會令到小朋友有惰性，送就比D文具等小禮物… 點解內地遊客都明既道理你地香港人仲未明？ Lonely Planet有講既旅遊者責任你地究竟有無睇？

係叫百蒙既地方跳車，即早前講既分岔路，諗住截順風車，截得十架八都唔啱路時，遇到架白牌，靜靜雞問士多好好人既一家人幾錢，問定費事比人劏，但係溝通唔到就比D錢佢抽，原來$25000-KIP($25-HKD)，上車前就二話不說比左錢，費事比人呃！

架車繼續南下送左車上既人到目的地，先再去琅橋; 車上有名乘客應該做狗肉生意，有4頭狗係車尾，用鐵鏈鎖住，神情驚恐，落車時攪到司機仲幫手清理臭賓賓既糞便Tim! 係寮國做狗狗真係好慘... 跟著我既"何B仔"真幸福了～ （何B仔英文Hobie，係我隻愛犬）不過以我所見又有好多人養狗喎！ 點解呢？

兜左大半個鐘，又返回我係百蒙上車既地點，原來司機又撈埋送貨呀！

1945到達琅橋，計計吓由百蒙坐來既車程差不多兩個鐘呀！最後一小時風景最美，沿河流旁行駛， 問清楚琅橋讀音係讀"Long kyo"即Tokyo 東京無左個東呀！

行左約十步搵到間簡陋蠟燭既住宿，見天已黑齊就入住啦！$40000（$40-HKD) 唔記得講價Tim... 

放低行李即時搵野食，穿過一條封左路既地方，約有幾十枱食物擺晒係條街度，好似有全村人既份量咁呀！似係有乜儀式，見其中一間屋內點晒大臘祝及有好多長者在傾談，但就唔好意思影… 

穿過呢條街後似係中心區域，見有旅行社，旅店，好多外國遊客，拿！ 車上既中國遊客就唔識玩啦，淨係識去琅巴班！ 之後搵到間好靚既餐廳，我諗今晚住得差啫，都要食好D既！點菜時得知，頭先封晒路原來有party呀！ 見有背包客入後園，呢間餐廳都有住宿既，係小屋有熱水淋浴架～ $80000-KIP($80-HKD) 聽晚考慮吓先～

返到我住既房間好熱，相信個燈泡發熱令到整間房熱辣辣，熄鬼左佢先！因為出面好涼好舒服，雖然周圍樹林河流，偶爾見到一隻蚊但野蚊既我都無被咬喎！ 沖涼後係民宿室外既空間，聽住今晚party中年男人既歌聲，邊打遊記～