Day 14 離別(冰島雷克雅未克)

(Day 14) 2012-10-04
住宿：HEE Hotel
行程：冰島 --＞格陵蘭

今朝揸車返到首都雷克雅未克已是十點幾啦! 唔還車住,用僅餘既時間去埋餘下想去既景點先~ 著名既藍湖溫泉? 早已去了無咁商業化,及更便宜既米湖,所以唔去!

先去碼頭,可能係海邊,寒風很太! 只見觀鯨既公司成行成市,果然係觀鯨既熱門地~ 及後路經小小既湖區,有好多天鵝棲息; 最後去埋現代版藝術品既地標維京船骨架。

到此一遊過以上景點,就返第一日住過既住宿,諗住還車,但租車公司仲話可以寬容多兩個鐘,即1300。梗係再揸車去食午餐啦! 係一個商場既food court食; 再到超市買補給,恐防一陣搭飛機無得食。

泊車記住要買飛~

約十日既冰島之旅終於完結了。但一個既終結，才是另一個既開始，呢一刻才是我真真正正旅程既開始呢! 因為有人一齊去既旅程，我個腦會完全唔諗野架! 就好像尋晚我仍未知確實起飛去Greenland既時間一樣! 返到來首都,住返第一日既民宿,港女幫我上網一check，誤以為1130已開走了班flight(因為呢班機既時間曾經一改再改); 其他人好緊張咁幫我上網搵資訊... 而我呢! 我當時仲慢條斯理，沖個涼先... 真係皇帝唔急太監急囉!

最後先攪清楚，原來首都有兩個機場，已起飛既嗰班係Interetional 機場飛既，而我搭嗰班flight則係Domastic 開既,係今晚先起飛! 可想而知有人同我一齊既旅程，我是這樣的糟糕!

經B&B好幫得手既老闆娘(亦即第一晚果間)指示下，原來步行去機場都只是30min咋!

由港女送我步行去機場; 之前既旅程試過我出發先,中途先接港女機,覺感覺都唔錯,大家都滿心期待; 但今次就一同出發,玩到好開心先分道揚鑣,港女先回港,心情真係大家都不好受呀...

送君千里,終需一別,步行去到小小的客運大樓,距離boarding仲有一段時間,叫港女入黑前好快點返去!

客運大樓外,黃昏下機場的擁抱，帶來傷感•••看著淚流滿面既港女離去,並不時回頭與我揮手,依依不捨,直到看不到大家為止... 去吧！格陵蘭！瀟瀟灑灑的，給我瀟灑的上機~

遠望The Pearl 

客運大樓