Day 7 森林古堡(拉脫維亞Sigulda)

(Day 7) 2012-03-15住宿 ：Hostel Tallinn €20-LT = $200-HKD行程 ：拉脫維亞Sigulda --> Riga --> 愛沙尼亞Tallinn

波羅的海寒冬指數: -1℃

今日一要定去尋日去唔到森林中既古堡！
首先食酒店提供既豐富早餐，主人為我剛煎好既兩隻煎蛋+4塊煙肉，好有家的感覺~ 
全枱都係野食，起初我以為要同其他住客share，怕食晒D蛋同煙肉，一問之下原來只有我一個住客，枱上既食物統統為我而設架！！！ 嘩！淨係呢餐早餐都值回票價啦~



食完早餐去巴士站搭0935開出既巴士，經過10分鐘車程就到達，但係要等到1000先開門••• 唯有係外圍欣賞吓雪景先啦〜
一開門只有我一個遊客入場，入場費$3-LS ($45-HKD)，離開ticket office沿小路行，沿途風景幽美，行15分鐘就到森林中既城堡啦~

去到城堡，就一口氣攻頂，到頂部風景好靚呀！可以見到無邊際，佈滿白雪既森林，同結晒冰既河~ 由於太早，亦是旅遊淡季，整間城堡及城堡範圍只得我一個遊客，包場！ 正〜
上網搵資料時，呢個小鎮有拉脫維亞瑞士之稱，見有人留言話夏天來到，覺得好失望喎••• 我諗無雪睇，夏天來到只不過係一個盡是遊客既平凡小鎮！不過夏天呢個小鎮先係旺季噃！依家冬季cable car, 租單車統統都close...
兩個鐘行完，係手信舖買左樽波羅的海既特產瑪瑙，老闆娘仲送我一枝HKD$10既手信Tim~

無人既塔頂

塔頂風光

有條結晒冰既支路,完全行唔到,冼到PK...

返酒店攞返行李，順便食埋尋晚食淨既Pizza，住宿職員見我食凍晒既隔夜Pizza，叫我用焗爐叮返，仲叫我沖茶飲Tim ~ 真貼心~ 所以我好鍾意呢間酒店〜

酒店後花園

返Riga我選擇搭火車，搭1350開出既班次，火車站正在重建中，只淨低月台，所以無車票賣，詢問之下原來上車後就有職員來收錢，回Riga 既車費$1.85-LS。


返到Riga既火車站，要穿過我呢兩日經常去既街市就到巴士總站，然後就再搭1600既巴士去愛沙呢亞 $14-LT = $220-HKD我選擇既巴克公司係Lux，車上有wifi，又有野飲機，不同種類既飲料任飲，仲要架車一半都座唔晒~我就沖左杯Cappucino，扮吓品味陳豪先〜 諗住嘆野飲打遊記喇，點知係呢個時候，租客係whatapp send 左張相黎，話間屋收到封收數信喎！極大可能係上手租客D蘇州屎! 仲有成個禮拜先返到香港，想打比收數佬電話費又貴，依家都唔知做到D乜！最緊要攪到現任租客都唔好意思嘛,又煩埋我...總之就係巴士上同租客打字whatsapp，打到就黎瞎啦！
及後其見到有人差電，原來座位旁有插頭架！真係一架豪華巴士！如果唔係有D煩野我應該能好好享受•••

天都黑齊，望吓條街D車，原來不知不覺已到左愛沙尼亞呢面啦！咦？不過無關員上車檢查既？唔通上車時,個司機對晒passport，佢就係撈埋passport control?
到達愛沙尼亞首都塔林已經2025，天都黑齊，諗住行去old town搵酒店之際，係巴士總站轉個彎，一個無路人既街角竟然有間hostal喎！一問次吓single room €25一晚，我就同佢講價，講到住兩晚每晚€20〜
房間只係一床一櫈，乜都無••• 不過好在一樓有個大廚房，咖啡茶任飲！ 有咁大個廚房聽晚一於自己煮先~

由於晚餐未食好肚餓，而酒店附近黑嘛嘛，唔想行咁遠•••好在見對面馬路有一間餐廳營業中，緊係唔使諗啦!晚餐對面既餐廳攪掂€12.35，好大碟好飽~