Day 6 尼姑?孤單?(拉脫維亞Sigulda)

(Day 6) 2012-03-14住宿 ：Livonva Hotel $17-LT = $246-HKD行程 ：拉脫維亞Riga --> Sigulda

波羅的海寒冬指數:0

尋日由於烏雲密佈,特登留番全古城最高既建築物今日先去!今早一望個天色,藍天白雲,果然天公做美噃~ 一於即時上全古城最高St.Peter church既tower 先!

食完個早餐,又係Hersbuger;早餐後去到St.Peter Church, 但就未夠鐘開,唯有周圍逛吓影吓相啦~ 去返尋日我覺得最靚既地標, ”The House of Blackhead”,set腳架影相先~ 真係好,晨早樓樓成個廣場都無遊人,我又可以放肆啦~

"黑頭屋"後面既就係古城最高既St.Peter Church 

 

等到1000 St.Peter終於開門,Towner入場費$3-LT($45-HKD)

上Tower前有個角落,圖文並茂介紹左St.Peter church既歷史; 此教堂曾受過雷電擊中,於世界大戰時又毀於大火,真係劫難重重... 一位小朋友由一個家長慢慢講解,十分留心! 唔知我將來如有小朋友,會唔會留心聽我介紹呢?

 

上Tower唔使行，有升降機搭~ 上到塔頂真係好靚呀！可以望晒Riga既全景~ 從高處欣賞,D建築物好似模型屋仔咁呀! 真係唔使用模型模式,都可以影到架~ 係塔頂上,雖然陽光普照,但天氣仍是嚴寒加十級巨風! 與我同Lift既人,都拿拿林影完相就走啦•••

返Hostel Check out,個靚女職員仲問我參唔參加1700 Hostel 攪既市內free tour,有咁好既節目安排,怪不得係08年入選十大hostel 啦！


Check out後,又去尋日街市食飽飽; 係1200到巴士站,剛好趕得到1215開往Sigulda既巴士 $1.5-LT

Sigulda音叫”詩孤單”,有拉脫維亞瑞士既稱號! 聽詩孤單個名,真係唔知多尼姑丫,定係好孤單呢? 總之我呢一刻就好享受我既孤單啦~

 

個多小時既車程,到達呢個佈滿白雪既漂亮小鎮,係巴士總站既旅客中心攞左D資料,然後根據尋晚搵定既資料,向心儀既住宿跟住地圖行,未book既,心儀只因價錢考慮(係D酒店網個地圖cap左落黎,地圖上就顯示左鎮上既住宿)
去到距離市中心,十分鐘步行時間既酒店Livonva Hotel,酒店細細間似足民宿,十分討好,$17-LS一晚連早餐,即$246-HKD價錢唔錯！入到房好正呀!!! 個窗望正一片白雪既公園~ 十分滿意~




係酒店hea左陣,諗住去山中既城堡,去到巴士站走左班車,要50分鐘後先再有,車費$0.3-LS; 等車時又肚餓了,食D茶點先~

去到差不多1700 ,但城堡要close 啦••• 唯有明天請早••• 等車回程時,看見對面馬路有棵大樹好高,樹腳吓有班青年正在玩耍,形成強烈大細既對比,好特別~

落返小鎮週圍影吓相,全鎮都佈滿厚厚既積雪,相信早前落了好大既大雪~ 行到差不多,晚餐食Pizza,$60-HKD,個Pizza好鬼大好厚,食淨兩塊打包~
返到酒店先發現,酒店個小公園先係有最靚既雪景！不過天已黑,唯有聽日先影Lu...