Day 4 (下) 再單身遊記(立陶宛十字架山)

(Day 4) 2012-03-12 
住宿 ：Salduve Hotel $50-LT = $150-HKD
行程 ：立陶宛 kedainiai --> Siauliai
波羅的海寒冬指數: 7℃

兩個鐘既車程,係1410到達最近十字架山既城市Siauliai; 係巴士站售票處一問,剛好趕得及坐1415開出路經十字架山既巴士~ 巴士總站有information,可得到來回班次既時間表~ 於是係寄存行李,寄低個大背囊,7小時只係$2-LT=$6-HKD,真係好抵喎~

上車前有個溫度顯示器,原來依家有正7度既氣溫呀~



由Siauliai開往途徑十字架山既巴士,約20min就到,有一位親切既查票婆婆,提醒我係公路旁落車,並給我指引,沿一條支路行就可到達~



一落車郊外既風景勁靚呀！應該係話天氣勁靚就真！藍天白雲，有正7度既氣溫,今次旅程終於見到太陽伯伯啦~未開始行,係路口已經set腳架不停影相啦~ 一路行一路影,約30分鐘,最後過埋個info centre就到啦~







Info centre外有兩檔攤檔,賣D十字架相關既野,我就買左個十字架頸鏈,無信仰既我都即時帶上,然後遊覽Hill Crosses十字架山~ (打呢篇遊記時我都帶上,別有一番感覺)

嘩！真係好多十字架呀~ D大十字架上,仲比遊人掛上好多小型各式各樣既十字架,我終於明白頭先舖頭點解咁多木既十字架賣啦! 原來係比人寫上祝福字句掛係度架!

因為有太多啦！開頭影D相睇落有D雜亂無章,到後來才用特寫既形式來拍攝,效果唔錯噃~

於是再仔細咁睇下掛係度D十字架仔,有好多係我買既頸鏈類型; 而寫上字句的木十字架,依家先知頭先無買,平平無奇既木十字架原來係咁用架！但D人寫乜就睇唔明,因為係當地語言••• 不過我相信係D祝福或悼念既字句。係十字架山遊覽過,我相信十字架山仍然不斷擴張中! 香港D人都興將唔要既彿像放埋一起,唔知第時香港會唔會有個關公山或者觀音山呢?

十字架山範圍唔算大,約一個鐘就行晒,見仲有個零鐘先有車到路口,就唔行出去住,坐低對住個十字架山食D餅先~ 此時發現多左舊烏雲係十字架山頭頂,多了分陰森,多了分神秘呀!

食完小食一邊聽住歌，一邊步行返回路口既巴士站; 聽歌我鍾意用Random,一聽就即時播放由Hugh Grant主演《Music and Lyrics》既主題曲Way back into love啦~ 由於出發前係情人節,電視播返D愛情片,所以今次旅程呢D歌係大熱呀！ 每個旅程我都會加D唔同主題既MP3架~

一邊聽住呢首輕快既歌,係條無人行既支路行,面對溫暖既夕陽,被一大片啡色既禾旱草包圍下,心情十分開朗~ 此時覺得,終於重拾返我自己既旅行風格啦！

聽完呢首個歌,即時諗起朱姐套好鬼悶既《再單身遊記》,姑物論有無感情,起碼呢一刻既我,回復返幾年前咁,孤身走我路! 無意見分歧，想做就去做,”再單身遊記”呢幾個字,形容我好貼切呀~

一邊行一邊留心咁聽緊MP3,雙眼一路欣賞緊這一片良辰美景時,突然有架貨Van車向我響號,佢話要車我一程呀!!! 就係咁,係路途上遇到一個好好既人,車我返Siauliai呀！有順風車坐Yeah~



返到去1710,剛走左去拉脫維亞1700開出既尾班車•••同我搵既資料有D出入噃•••於是攞返個背囊,去市中心位置搵住宿,正如車我返黎既有心人所講一樣,Siauliai係一個boring City...

係市中心一路行,點知行極都見唔到有住宿...記得巴士總站對面有一間Hotel,於是返轉頭,點知又執埋笠! 好在係呢間荒廢Hotel既庭園都痴到Wifi喎! 梗係即時用部I pad上網搵吓資料啦! 係d book 住宿既網站發現,原來Siauliai住宿分得好散架！市中心區普遍都係貴野,於是揀左離市中心既一間酒店,€20一晚，即時落訂!

於是跟google map係咁行,原來好Q遠架！ 係一條天橋上遇正日落,於是停步欣賞埋美麗既Magic hour先再行,其實都耽誤左不少時間,不過唔緊要啦~

欣賞完日落就繼續行,由日落行到個天完全漆黑,行左好遠好遠... 一份既堅持，諗起上年身在秘魯,沿路軌摸黑行去馬丘比丘都係咁啦！行到又凍又餓,路經油站有間快餐店,即時幫自己加加油先~

最後行左一個小時終於到喇！酒店座落係一個工業區,毫不起眼! 酒店好殘舊,感覺好有前蘇聯鐵幕既色彩呀~ 係reception見入住既只有當地人,連個接待處阿姐都唔識講英文架!登記時個阿姐竟然話$50-LT喎! (即$150-HKD) 比係個住宿網站最初做booking時顯示話要€20,平左好多噃！証明上住宿網未必係最平既~

入到房間,好有返左大陸既感覺呀！幾間房共用一個超簡陋既廁所; 開完大正想沖涼時,發現個廁所係無得沖涼架!!! 於是著返D衫出去reception求助,個阿姐唔識英文,又要我出動身體語言,攪到check in緊個大叔都忍唔住笑~

最後開左間套房既浴室比我沖涼,廁所環境唔錯,我諗呢間套房都唔平,不過就無乜熱水,好似沖緊凍水涼咁呀... 求其啦! 天寒地凍下快快沖完,打晒冷震呀...