2016年5月11日 星期三

續Day 8 給我一個吻(馬拉維Cape Maclear)

續(Day 8) 2015-9-18
住宿:不知名簡陋住宿
行程: Mongochi —> Cape Maclear


45分鐘電單車尾嘅車程,全是碎石泥路,終於於日落前,看到遠方嘅湖邊有人聚居,即差不多到達Cape Maclear。去到我選擇嘅Fat monkey住宿落車,可惜Full晒。


Fat monkey係LP極力推介的,好似一個渡假村一樣,有露天酒吧、露營營地、渡假屋、沙灘排球場等,估唔到這裡也有resort。住宿問題暫且放下,反正我都唔驚無得住,整番支啤酒欣賞馬拉維湖日落才是正經事。我這種隨遇而安嘅性格,相信由我自己一人來演繹才能發揮得淋漓盡致吧,哈哈~



太陽徐徐下山後...唔係,係下湖至啱,便要解決住宿問題。問問附近嘅住宿,但全部都full晒⋯ 返回Fat monkey取回大背囊,個職員話可以露營,只收幾美金,仲可以加錢租埋個帳幕,都ok嘅。等候時search到住宿有wifi,一問之下又話要買張wifi卡先可享用,住宿都有得買$1200-MWK ($16-HKD),便能與世界聯繫。終於明白為何馬拉維好多地方都有free wifi,但都用唔到了,原來只需買一張wifi卡,就能於全國享用到某網絡供應嘅free wifi了。


享用wifi時,職員話幫我搵到間住宿,叫我等候,有人來接我。不知是否無晒帳幕借呢?原來這週末,這個偏遠嘅小村舉行運動大會,所以有好多遊客嚟,咪full晒囉~


當地wifi卡

fat monkey嘅酒吧,坐滿遊客


跟個男人到達一間簡陋平房,就是我今晚嘅住宿。門口台階有兩男一女嘅遊客,穿著住泳衣泳褲濕笠笠,好明顯其中一啤是情侶,因為他們不停kiss。打聲招呼得知原來情侶是巴西遊客,另一靚仔來自南非。先參觀住宿,十分簡陋,屋內無電黑麻麻,用蠟燭來照明。得一間房,有兩張碌架床及一張大床,已放好行李,應該是剛才嘅兩男一女。不過房內嘅廁所及浴室無門,看來要將就下了。我先住一晚,看看如何再算。


放底行李後,肚痛要開大,因為無廁所門,以免臭崩崩,先跟門外嘅朋友說聲。由於房內漆黑一片,拿了啪啪燈入廁所。無耐巴西情侶入嚟浴室鴛鴦浴,我問他們唔怕臭嗎?他竟然回答我房間用來照明嘅蠟燭會燃燒臭味喎,哈哈⋯ 一路痾,一路聽到說話聲及kiss聲。由於拉肚子,腦海中都無什麼遐想了。


痾完又沖乾淨涼後,被邀一同啤一啤,我啤了兩支。巴西男原來是被派來於馬拉維首都嘅巴西領事館工作,是中葡巴混血兒,姓Yau,唔怪望落有少少之黃皮膚啦~ 他說每七年調一個工作崗位,之前去了印度,現在來馬拉維,到完成第三個工作剛位後便能回到祖國巴西工作了,好似好慘咁。女嘅於大學工作,不知是否教授或普通職員,他們於巴西駐馬拉維領事館相識。雖然只相識了幾天,便打得火熱,並趁著週末來這裡渡假。咦!係度食係度痾!?而南非靚仔仍是學生,來旅行之餘也在這裡小村做義工老師,義教當地小朋友十多天英文。


我啤了兩支夠了,唔明D西人點解可以當水飲。啤完後再到另一間餐廳食晚餐,看看餐牌十分昂貴,尤其是以當地來講,可能是天價! 點了個Pasta $3500-MWK($50-HKD)。點菜後等候好耐⋯ 於是去電視區收看南非欖球世界杯,南非對英格蘭。電視前坐了一班人收看,應該是英國人,而南非靚仔當然看得肉緊。認識我都知,我是捧斐濟的。當然我跟佢講,我捧斐濟,因為認識了佢,我現在支持南非。


等左好耐終於有野食,我諗住穩陣D食pasta,咁貴嘅價錢竟然唔好食喎⋯ 算吧,雖然損失了金錢,但賺左友誼。今晚傾左好耐,認識了新朋友,過了一個好開心嘅晚上。不過唔習慣嘅係兜口兜面有人不停kiss,是文化差異,哈哈~


回到簡陋住宿,再輪流沖涼,整好蚊帳便瞓覺。由於房間差不多密封,只得一排透氣孔,熱到出晒汗,瞓唔到。樓下大床又有不停錫錫聲,不知稍後會否表演真人show呢?



17 則留言:

  1. 咁有冇落去𥄫吓真人show表演?

    回覆刪除
    回覆
    1. 唔使𥄫,我瞓上格床,望到,wakaka~~~ 不過無表演⋯

      刪除
  2. hahahahahah
    最正都係你大梗佢地入黎沖涼………………………………
    中間有無野隔住咖XDDDD

    回覆刪除
    回覆
    1. 有呀,一間套房,分別有獨立廁所同獨立浴室咁囉~

      刪除
    2. 咪係,等多陣都唔得,我驚臭親人嘛⋯

      刪除
  3. 個湖中日落都幾正喎!!!!
    唔知露營個camp site係點樣,如果咁熱可能選擇露營仲好,一來又唔駛被逼睇真人show...XXXXXD

    回覆刪除
    回覆
    1. 你講開D假Camping節目,我都無睇過佢地係個營生活,煮過飯就算,一轉鏡頭又著好晒衫扮瞓醒⋯ 香港D電視節目係咁上下,你估炳萬咩,哈哈~ 其實呢套野因為我剛係納米比亞camping返嚟,都幾期待,可惜⋯ 有乜好過去假Camping

      刪除
  4. 廁所浴室冇門,好唔方便呀。

    回覆刪除
  5. 好耐都唔得閒上來,而家有好多篇要catch up返!通常幾日內就打得火熱既情侶,亦都好快玩完。我都幾怕住宿遇上年輕戀人,故此揾AirBNB時我對年青夫婦避之則吉,屋主大聲搞野,係每個寄宿者既噩夢。Btw,你本中文日記,係咪經常比當地人問攞來睇?我就時時有呢個經驗。

    回覆刪除
    回覆
    1. 係喎你忘完未呀?你個灰過魁北克之旅未寫噃~
      呢D情侶旅途上真係遇唔少,純粹伴遊,旅途完結通上say good bye
      係呀,當地人或遊客對本遊記d中文好好奇架~

      刪除
  6. 好勁~點解佢地可以錫咁耐錫唔停~~~~~
    我覺得好尷尬..一路開大一路聽到佢地啜啜聲~~~

    回覆刪除
    回覆
    1. 你去旅行時留意吓,鬼鬼不論年青式老年,都鍾意係咁錫錫架~
      尷尬到爆,開大同錫錫,完全唔喇更嘅!

      刪除
  7. "我這種隨遇而安嘅性格,相信由我自己一人來演繹才能發揮得淋漓盡致吧" <--完全同意
    酒店要book定架, 話說我十幾年前試過喺奧地利由火車站一路行一路搵酒店, 搵到入夜都冇房, 之後當地人幫忙試多幾間先搵到, 嗰次勁驚要瞓火車站, 所以我唔會俾類似驚險嘢再次發生
    相信嗰對情侶眼中只有對方, 其它世事同味道都唔會感受到, 呵呵

    回覆刪除
    回覆
    1. 我嘅風格基本完全不可行架~
      首先旅行無plan及唔鍾意plan,我驚喜、體會行先,我唔想因為已book好嘅住宿而放棄眼前嘅美景或體會呀。再者我喜歡去D咁落後山卡啦,D人都未必試上網或無網絡,好多酒店網係無得book架。好似cape maclear為例,其實有好多住宿,只網上只搵到一兩間,仲要十分昂貴,過千果吓先離晒譜! 所以大家風格唔同,我旅途上好少可好似你及其他blog咁享受,享受唔到,睇吓都好,咁先鍾意睇你地D blog~ 不過依家我都好enjoy搵住宿,發掘無乜人去地方嘅過程。

      刪除
  8. 同你一樣,有d我去唔到嘅地方,睇吓你去都好,起碼叫見識過!
    講個秘密你知,我幾十歲人都未試過露營...

    回覆刪除
    回覆
    1. 你又玩野毛毛!
      其實我咁大個仔只係N年前單身苦悶,報了D歷奇課程上吓,先露過一晚露咁大把咋! 今個旅程露過夠盤,反而愛上了~

      刪除