2016年4月1日 星期五

Day 3 負責任的旅行者(印尼婆羅摩火山)

(Day 3) 2016-3-3
住宿:Hotel Sahid
行程:Cemara lawang —> Probolinggo —>泗水

0345時起床,因為自尋日上山後就烏雲蓋頂,傾盆大雨,直到瞓覺前都未曾停過,所以一起身就外出抬頭看看天色。驚訝嘅係,竟然見到星空喎!尋日嘅住宿職員話這裡日出時一定有太陽,而其餘時間通常都落雨,唔通佢真係無呃我?尋晚聽佢講時,也望望個天,心諗呢啲騙徒技倆呃我唔到嘅⋯ 殊不知原來係真!望了一會又感到天氣十分寒冷。
刷牙洗面後,穿上所有禦寒衣物,飲杯熱茶暖暖身子暖暖胃,可惜港女怕電熱水壺發熱位置有銹跡而不敢飲用。其實身處落後國度,出街食野只見到表面,背後嘅製作過程可能更恐怖、更污糟不堪。(港女按:正所謂「眼不見為乾淨」,況且我腸胃一向比銀仔好,touch wood。個熱水壺真係好恐怖,唔係銹跡咁簡單,而係有一層厚厚嘅鈣化物,我寧願呷兩啖凍水算數了。)
為了輕裝上陣,先將有轆背囊嘅有轆同埋支架拆除,背囊就變輕了,然後再執拾所需物品如就可出門。平時少行山嘅我,終於俾呢個背囊一展作長。一個大背囊、一個斜孭相機袋、加一個有轆嘅背囊就是我呢十年八年外遊時常見嘅裝備。早輪香港經常有返水貨客活動,Target就正正係呢啲有轆嘅袋或小型喼。佢地好得意,認定用呢啲袋就一定係自由行喎⋯ 我成日同港女講撞啱我去旅行,出街隨時被當水貨客打埋一份,哈哈~




0415時出發,摸黑上山,出發前發現屋企盞頭燈壞咗,只好用電話嘅閃光燈作電筒。初段其實都係沿馬路步行,一啲都唔難行。不過有時路較爛,地面嘅積水真的要小心。沿路只見一架架嘅吉普車上山,看不見有人行,可能我們較遲出發吧。
約50分鐘路程差不多到達check point 1,但馬路已到盡頭,有大閘欄住,再上就是佈滿碎石嘅小路,只得馬伕兜搭生意。咦!如果包四驅車上山即係到這裡為止?咁有啲搵笨喎,收成25萬咁貴之餘,又唔係直達景點,而且車程隨時只需5分鐘⋯ 即時對身旁,好似當我地係水魚嘅馬伕好厭惡,因為佢仲開價5至8萬!
多雲下的神光第一線⋯


讀萬卷書不如行萬里路之婆羅摩火山:(取自Wiki)

婆羅摩火山(英語:Mount Bromo),高度2,393米,位於東爪哇島泗水東南,相距大約150公里。它位於唐格爾山(Tengger)的巨大火山口之內。登格爾山大約於80萬年前形成,如今火山口直徑足足有10公里之闊。其後這個大型火山又再爆發,在廣闊的盆地上相繼誕生了婆羅摩火山,Mt Batok 和塞梅魯火山。這個高原上有村落,村落盡頭有懸崖,懸崖下是沙海盆地,盆地中央有火山口的奇特景觀。


根據上述Wiki所講,其實婆羅摩火山群位於一個巨大火山口內,即火山中的火山。


步行多一會到達check point 1,果然真係日出時份有太陽! 陽光射到火山上紋理顯然而見,好美。可惜無長鏡頭不能Zoom得太遠⋯ 而火山群中有一個正在冒煙,不知何時爆發。之後好不容易才搵到條崎嶇山路再上山,往check point 2,後來發現原來另一面有條好路⋯ 但看見火山群被雲層包圍,太陽也不見了,就算上check point 2也沒睇頭,所以行高少少便回程了⋯ (比藉口自己)


回到check point 1食小攤檔嘅杯麵、炸香蕉填一填肚及補充體力。見佢炸完嘅油倒回包裝袋內,應該是萬年油吧。

check point 1



有好路唔行⋯


再行上D個天就咁⋯

有人賣花


回到Cemara Lawang,發現這小農村風景幽美。農民下田耕作,看見我們也會打聲招呼,讓我感到是這小村的一份子。這裡民風應該很純樸,就可惜多了奸詐專劏遊客嘅小混混。


其實當我們討厭這些專劏遊客嘅小混混,有時候可能是遊客做成。我曾經出席D攝影分享會,原來有好多美麗照片都是造假,純粹一個字就係靚。有人曾於內蒙古影當地人馴馬、漁翁撒網。這些絕不是什麼真漁翁、牧民,只是騎馬來回奔跑數十次、撒百多次網的戲子。可能N咁多年前就真係嘅,但現在只需以人頭計比錢就可拍攝這些無內涵、無故事嘅照片。這些行為背後亦會衍生好多問題,如每人要比$600-HKD於落後國度蒙古影馴馬。對於當地人來講,遊客等同於水魚,他們亦可能不會再繼承自己嘅文化及傳統,咁好搵就索性改為專搵遊客錢。早前報紙財經版亦訪問某公司嘅高層,話佢熱愛攝影,去到蒙古國時為了係沙漠拍一張扮晒駱駝商旅嘅靚相,竟用了以每隻駱駝$500人仔租一小時嘅價錢,一共包八隻駱駝來影相,一小時共$4000人仔⋯ 大佬呀!你知有時係呢D落後國度,其實只需幾十蚊就可騎一小時駱駝嗎?咁以後真係想去這裡騎下駱駝嘅人咪要比更多嘅錢?為了影一張靚相,用餌誘鳥類、唔顧及當地人感受、破壞、比錢做假,網上都屢見不鮮。這些行為,全都對當地,尤其是落後國度有深遠嘅影響。影唔到咪唔影囉,所以我啲相張張都有佢嘅故事。老實講我有點討厭太過刻意嘅攝影,所以我嘅攝影器材越換越低調,希望以簡單器材也會影到靚相。近年我啲照片亦到比較注重背後嘅故事、感覺多於表面質素。

呢篇報導,一搵就搵到,原來除了早前提及天價租駱駝外,還有用糖果利誘六根清淨嘅小和尚做Model... 呢個愛攝影嘅敗類真係惡行連連⋯
http://hk.apple.nextmedia.com/financeestate/art/20120919/18019674

當然,攝影只是其中一樣。我們作為一個旅遊者對當地唔多唔少亦做成一定影響,怎樣才盡量唔影響到人呢?值得我們心思。當然唔會好似某D人,講到自己幾咁保育,自己去完又話呼籲人唔好去咁自私啦~ 所以極地守則其中一條,我覺得去到全世界都啱用嘅,就係「保持極地原始的風貌」。記住! 我們只是過客,不要意圖或企圖改變當地嘅文化及生活狀況。


純樸小村,風景幽美







回住宿對住個火山食住宿包埋嘅早餐,此時短暫地撥開雲霧見青天,行來行去,最靚嘅火山照竟然在住宿裡拍到⋯ 所以要看到靚景,絕對環配合天時地利人和的,當然仲要有緣份啦~ 用wifi連接世界,發現有好幾個whatsapp問候。原來尋晚蘇門答臘發生7.8級地震,不過我感受唔到喎。






其實我們本應仲有一個行程,就係前往火山口看一看岩漿。可惜一問之下原來冒煙嘅火山口早幾日前爆發過,現已封閉。唔怪之剛才行山時,一直都望唔到係呢個廣闊火山口嘅平原有人行啦,看來無緣了⋯ 

知道好多人對我隻GPS錶有興趣,po多D資訊出嚟先。隻錶紀錄了我今次行山嘅路線。

有好多數據,update個app後已改為繁體字了

上次新加坡游水時嘅資訊


26 則留言:

  1. 我都聽過住新界北嘅同事/朋友話唔敢用拉篋, 呢班人真係得人驚!
    資料搜集做得唔足或者驚危險嘅都好難避免俾人呃
    你清晨上到山, 第一張火山相嘅光線最靚!
    極地我自己會恪守leave no trace

    回覆刪除
    回覆
    1. 香港都唔知幾時攪成咁樣。。。
      資料搜集做得唔足或者驚危險嘅都好難避免俾人呃<--講緊我,wahaha~~
      第一張火山相,可惜無長鏡,人地果D影得好靚。
      我相信真正熱愛旅遊,跟你一樣會恪守leave no trace的~

      刪除
    2. 你唔算嘛?! 經驗都搭夠晒啦, 唔覺得你會俾哋呃到, 係呃到都係你衡量過之後自願上釣

      刪除
    3. 你真係識講說話,幫我美化今次被騙事件⋯ 今次真係老貓燒鬚⋯

      刪除
  2. 鈣化物係唔係白色既? 係水質既問題.
    我鍾意你個有轆嘅背囊. 顏色又靚
    發現屋企盞頭燈壞咗 - 你當咗屋企:)
    小農村同火山都好靚!


    回覆刪除
    回覆
    1. 個背囊好難得才搵到符合我要求,因為我想要則邊有袋來插腳架,手拖位置又要孖棍,因為單棍拖行時經常翻車,市面上通常無呢個組合,只得呢個例外,加上個轆可拆除,就perfect!

      刪除
  3. 我最近都看到有blog友跟攝影團去內地影相,原來羣馬奔騰場面,係用錢買嘅...有啲反感。

    回覆刪除
    回覆
    1. 果度應該係內蒙壩上,聞說攝影團一定會到嘅牧場,當地人就會趕馬。上網得知有時候比晒錢當地人交唔足功課,即唔騎馬來趕馬,而是改騎電單車。 其實只要入住過真正嘅牧民家庭就知道,他們好忙,每天劏牛宰羊做家務。牧羊要多點心機,反而馬就比較粗生,唔使點理,況且要放馬,跑得又快又去山卡啦,邊咁容易比你影到咁靚嘅相。最容易影到相信一年一度嘅那達慕大會,不過下文所講,都係比錢做假的⋯
      http://travel.mingpao.com/cfm/whtogo10.cfm?File=20150828/webnews/via1.txt

      刪除
  4. 我好單純,唔知有呢啲愛攝影嘅敗類.

    回覆刪除
    回覆
    1. 無計,我早年愛上攝影才知,不過知道醜陋一面,即時令到我興致大減

      刪除
  5. 我都有一個有轆嘅背囊, 款式差異 but 不同牌子!!!買了成年也沒在香港用, 怕被當水貨客打埋一份,哈哈~

    我在斯洛文尼亞的 hostel都見個熱水壺一層厚厚嘅鈣化物,起初也不敢飲用, 後來發覺沒有boil 的水也有一些沉積物, 既然水嚨頭的水可直接飲用, 便跳過心理關口, 一於"本"死無大礙~~~

    回覆刪除
    回覆
    1. 以水煲飯加熱後現沉澱物, 原來水含曠物質....

      刪除
    2. 我諗唔起上次係邊見到, 應該都係斯洛文尼亞. 係美國個陣飲既水, 頭髮係會黃d.

      刪除
    3. 哈哈Bell,我住屯門驚比人打多D~
      係呀! 你講開先諗起旅途上D水都不時見到沉積物喎!
      哦~ 原來Bell同小月係一齊去嘅~

      刪除
    4. sorry 講到好似一齊去咁,哈哈~

      刪除
  6. 尋晚睇完紀錄片Sherpa,對你呢篇既主題特別有共鳴。片中報導外國人為滿足自己的虛榮,爭相攀登珠穆朗瑪峰,對當地人和當地文化毫無尊重,神聖的珠峰淪為人潮擠擁的競技場,冒生命危險照顧攀山者的sherpa人更被西方顧客視為奴隸。另一方面,每人七萬美金的攀山旅程,無疑是助長當地經濟,但不得不懷疑,這些一擲千金的外國人,真的把當地人救出苦海,還是純粹增長了他們的貪慾呢?

    回覆刪除
    回覆
    1. 唉,Nado,有時我地D熱愛旅遊嘅人,尤其一個人在旅途上都有好多類似嘅反思。不過總會唔多唔少對當地帶來影響,可能我旅途上嘅行為都有好多不對嘅地方,有時連自己都未必察覺,唯有經常警惕自己⋯

      刪除
  7. 我個留言好似又唔見左。

    回覆刪除
  8. 你企在崖邊望火山個view好正喎,婆羅摩火山真係幾特別,似個小布甸XXD
    小村的風景也很美

    回覆刪除
    回覆
    1. 係,個feel都好唔錯添~
      再上高D去到check point D相會更靚
      小村我幾like,有種好純樸嘅感覺

      刪除
  9. 華~個火山真係好靚呀~~~~好彩你地好醒目無俾錢上山咋...但如果係我...我咁懶......我一定已經俾左錢囉.........................
    下...仲睇到岩漿架?!?!?!?!?好想睇!!

    回覆刪除
    回覆
    1. 係呀,好搵笨!
      再上高D去到check point D相會更靚,可惜我懶,天氣也差,無緣⋯
      係呀,有得直接上去個火山口架~

      刪除
  10. 最衰嗰陣無寫blog,我都唔記得自己去到邊個位,只記得好早好早起身!

    回覆刪除
    回覆
    1. 咁特別嘅旅程有時真係要紀低呢D點滴架,毛毛你仲唔勤力D。

      刪除