2016年3月26日 星期六

Day 2 騙案之都(印尼婆羅摩火山)

(Day 2) 2016-3-2
住宿:Cemara Indah Hotel
行程:泗水 —> Probolinggo —> Cemara Lawang


0915起床,打開窗簾發現原來房間是停機坪景!

食酒店包嘅早餐,以二百多元一晚房錢算是多野食了。不過竟然連早餐都有印尼蝦片,可以想像蝦片對印尼人有幾重要。食早餐才開動「銀仔mode」上網搵去火山嘅資料,應該先要到Probolinggo(中文叫龐越)嘅地方再轉小巴前往。大部份遊行都要跟奸詐當地人絞盡腦汁,因為好多當地司機一車就車你去旅行社。





回房執好行李出發,check out時問清楚從機場搭公共巴士Damri前往Purabaya巴士站$25000-IDR($15-HKD)。
Purabaya是一個好大嘅車站,經職員提點下找到前往另一面嘅車站大樓,這裡有車去Probolinggo,一上車便即時開車。$30000($28-HKD) 好抵喎!長途車都只係同剛才嘅市內巴士差不多價錢。

市內巴士,明碼實價

Surabaya巴士站,穿過較新嘅大樓就能搵到往Probolinggo嘅巴士



車上有人叫賣零食,其中一樣好似強迫要買咁,每人一盒$2500($1.7-HKD)。原來是爆漿椰子糖,一咬落去椰油四濺,小心!之後也不時叫賣,看來印尼人真的好鍾意食卜卜脆嘅"口立濕",不只細路,連大人都愛,真係見到都熱氣…
@1335

榴蓮看來也是印尼嘅特產噃

爆漿椰子糖



Probolinggo

進入Probolinggo,突然有人叫我們落車,話這裡已到站,都無睇到便匆忙地落車,發現原來係一間旅行社,巴士隨即開走,看來是串通,是欺詐遊客嘅技倆。姑且一聽個老細有乜好講,話現在已有6人,計埋我地便夠人十分鐘後開車,係咁sell我地套餐,又問埋回程去邊,極想一條龍劏水魚咁款!我地話回程返到巴士站再諗乜目的地,佢即時大我地話巴士話必定會pickpocket ,又話會謀財害命添!心諗有無咁誇張呀... 我話唔驚,返來再算。佢又話你唔驚可以即時免費送我地去巴士站,佢都痴痴地嘅。可惜唔知巴士站有多遠,咪聽吓佢所講嘅公共小巴幾錢囉,雖然係咁sell我地package,都比我斬釘截鐵拒絕!佢開價十皮上山($60-HKD) ,此時有個外國遊客也付款,見到不太貴連講價都忘記了。
(港女按:直到打遊記先記起今早上網搵資料時睇過關於騙徒嘅伎倆,老貓燒鬚了!)

真的隨即開車,開到前面約500米嘅巴士站接埋其他外國遊客,原來巴士站就係呢度,何來有什麼危險? 跟其他遊客交談,原來同我地一樣遭遇,有些堅持來到巴士站,找到這小巴,比我們便宜$60000($40-HKD),但就苦等了成兩小時才等埋我地湊夠數。唯有咁諗,比多十零廿蚊,慳返兩小時時間囉…
傾談其間,佢地都話各種嘅詐騙手法層出不窮,真的受夠當人了⋯

一車水魚,包括我地


Cemara Lawang

上到山氣溫急降,也下起大雨。雖然中介或司機當我地水魚咁劏,但上到山上都唔係就咁放低我地就算,而是保證每人都搵到心儀嘅住宿。你只要講出要求,Homestay或Hotel,司機都會送你去,可能又有得分啦。跟班老外入homestay看過,其實homestay都唔係乜野homestay。由於外國人玩成個月東南亞,所以佢地找便宜住宿是可理解的。我們今早上網時就搵到心儀住宿了,有機會是全村最貴嘅一間,因為位置絕佳,位於火山口旁。


到了Cemara Indah Hotel接待處,看有什麼選擇。最貴係家庭房,我地得兩人選擇了中價嘅標準房55萬($320-HKD)。由於現金唔夠,山上又無ATM,焗碌卡,收取3%手續費。Check in後當地人當然捉緊每一樣搵錢嘅機會啦,問我地需不需要當地最出名嘅活動,包Jeep上山看日出,索價28萬($160-HKD)。當然無考慮啦,我地諗住行山,而且眼下天氣唔好,如果聽朝都係咁就無謂上山。跟住又問需唔需要租借電筒、外套等等⋯ 最後仲話有按摩服務。全部都唔需要呀!
(港女按:間房狀況非常基本,可能因為長期潮濕,所以有陣霉味,而且張床嘅彈簧都非常舊。本來打算一人一張床,點知俾銀仔喺其中一張床嘅枕頭底發現毛蟲屍體OMG!唯有一齊瞓,最多唔郁咁多啦。)




火山爆發逃走路線


晚間天氣實在寒冷,跟個多小時車程山下嘅炎熱天氣簡直兩個世界,好在都有帶備禦寒衣物啫~ 晚餐也幫襯酒店,餐廳範圍才有wifi供應,用google map查下聽朝要行嘅山路先,也load一load個地圖,以便離線用GPS來定位。發現原來步行上Viewpoint 1只需3公里約48分鐘,就算上到最頂嘅Viewpoint 2 都只係5公里,不明白為何包車會咁貴!食飽飽早點瞓,因為如要看日出要凌晨4點出發啦~



24 則留言:

  1. 呢啲地方有時焗住要比人劏。

    回覆刪除
    回覆
    1. 係,但盡量唔好比人劏咁多,如果唔係會變本加厲⋯

      刪除
  2. 唔知印尼有寒冷o既地方.

    回覆刪除
  3. 銀哥連賊佬謀財害命都唔驚冇畀人大到,卻竟然怕了毛毛蟲......無言~~~~~
    kakakakaka....
    難得銀嫂同你去完一趙非洲後,似乎都練大咗個膽喎,心口掛個勇字喎XXXD
    間酒店又真係幾豪裝喎唔怪得咁貴,天氣唔好咁多雲霧其實睇到日出機會也不高,無謂花喱啲錢...
    5K都好近丫你平時跑步都唔只
    凌晨多唔多遊客一齊行上山?

    回覆刪除
    回覆
    1. 呃遊客錢和講價其實係旅途上最掃價又令人無奈的環節,如果大家都明碼實價待客以訪的話,遊客玩得開心盡興,畀多十元廿塊錢絕對唔係問題,反而如果發現係呃錢的話,即使只係被呃十元八塊,個心同條氣總會有啲chok住chok住玩得唔開心!!!!

      刪除
    2. 見你咁講我都覺得好好笑,其實曱甴先係我死敵,遲D非洲有一篇因為有曱甴,可能連你都覺得我嘅舉動瘋狂。
      我見唔到有人一齊行喎,可能我地較遲出發,返而有好多人包吉普車上山就真。
      我唔鍾意跑步的,就算依家係熱潮都係咁話,又要有運動唯有迫自己游水⋯

      刪除
    3. 無計,落後國度就係咁,所以我就點都唔明我去過非洲嘅地方竟然極少咁嘅情況。其實就算發達嘅香港都經常有呃遊客錢嘅情況發生,真討厭。

      刪除
  4. 呢間已經係山上最貴既酒店喇???????驚驚......
    救命...我發現真係度度都係咁呃遊客錢....南美又係咁...

    回覆刪除
    回覆
    1. D山卡拉地方無計啦⋯
      咦! 南美⋯ 等我諗諗先⋯ 我又無乜不快經歷喎! 可能我多搭公共交通少搭的士。只記得一次由玻利維亞過關秘魯時搭的士遇到呃錢。

      刪除
    2. 就好似烏尤尼d酒店咁..真係諗起都恐怖....................
      我係阿根廷俾人呃錢呀....我地出入因為有4個人其實搭的士個價都ok既~~(講到尾我地懶)

      刪除
    3. 烏尤尼? 鹽酒店嗎? 不過當地貧困,應該唔會有好住宿⋯
      的士? 所以我極少搭的士,呃左8成!

      刪除
  5. "明碼實價"呢幾個字我最like, 估唔到啲巴士外觀都幾ok
    我都好怕食熱氣嘢, 下次再去記住帶定"清熱x"
    啲人好得人驚架, 個個都靠呃靠嚇!
    非常認同基爾嗰句, 我睇到銀生竟然驚毛毛蟲, 笑咗->銀哥連賊佬謀財害命都唔驚冇畀人大到,卻竟然怕了毛毛蟲

    回覆刪除
    回覆
    1. 相信每個遊客都喜歡"明碼實價",隨意抬價實在太討厭⋯
      清x酷已是我近年出門必備啦,hehe~
      其實我睇基爾咁我,我自己都唔住笑左~~~哈哈~

      刪除
    2. 我細佬又係唔怕曱甴....怕四腳蛇

      刪除
    3. 唔係架, 我見過有個奇女子完全唔怕遇到呢啲情況, 覺得係豐富咗個旅程嘅經歷, 唔會特別有負面情感。我諗好多人都覺得開心經歷唔怕多, 其它就咪搞, 但真係乜人都有架!
      同你打吓氣先, 等緊睇非洲曱甴篇

      刪除
    4. Venus,我以前都好嬲架,但你見我依家字裡行間都無乜野了(非洲有一日會好嬲),因為都好似你個奇女子咁覺得係一個經歷,當然唔係完全啦! 有時真係會激㷫你嘛⋯ 我現在會用我嘅經驗,來同佢地鬥智鬥力,爭取較為貼近平民價,等佢地知道唔係每一個遊客都係水魚。
      曱甴篇係我係非洲最唔開心嘅一日⋯ 因為有曱甴加埋被騙嘅情況

      刪除
  6. 銀仔,全世界的搞旅遊的都當遊客是水魚,所以要小心為上.

    回覆刪除
    回覆
    1. 絕對係,但希望盡量唔好比人呃咁多,爭取較為貼近平民價,如果唔係佢地會變本加厲的!

      刪除
  7. 不嬲對印尼呢個國家無好感,文化對我又無吸引力,聽完你講既騙案,更加唔好預我。

    回覆刪除
    回覆
    1. 印尼係9成遊客心目中都只得峇里,旅途上可知一二

      刪除