2015年11月25日 星期三

歐洲浮華自駕遊後記

銀仔外遊通常於春秋兩季,上年嘅秋季剛好去完昂貴嘅結婚蜜月旅行、又擺酒攪到無晒錢,今次就決定求其搵一個較平嘅行程。求其去都揀歐洲,主要係因為來回機票連稅$4750,計落平過去日本。
再者,呢程機票經我精心挑選,買機票時其實可以即時轉機回香港,但有另一班選擇,就係有足夠休息一晚再玩足大半日先返香港,更加吸引。(港女按:我問銀仔去歐洲都話求其會唔會太串,不過諗返起,朋友託我搵復活節期間去日本嘅機票,都要差不多價錢,甚至更貴。既然可以攞多幾日假,梗係去遠啲啦。)記得最初計劃行程,機票目的地就是西班牙巴塞隆拿。不過無理由十幾日都玩大城市巴塞架,所以要買多一程單程機票,由A點去B點咁玩。為何「西」一定要黐住「葡」呢?今次選擇了南法作起點,當然這行程最有驚喜係尾段嘅山區小國安道爾啦~ 銀仔成日無Plan亂咁遊,才會發現意想不到嘅驚喜咋~


結束行程後,大家相約一間西班牙餐廳來計計數,做一個金錢總結,來一個大家無拖無欠。
銀仔旅行團,去程upgarde特選經濟位,租過兩部車,一部係豪華Benz。飲食方面大部份出入餐廳,法國就法國大餐,西班牙就西班牙炒飯,絕不是坊間嘅旅行團餐餐食中餐架!住宿有部份可能較為一般,最差可以用合格來形容,有時就住到隱世夢幻住宿,所以我覺得已經唔錯了。
結算後計出,機票連食宿租車使費全包,13日行程每人都只係$15000-HKD有找咋,當然唔計高Ling同Ellen買名牌手袋嘅錢啦!記住這是豪華團,又是旅遊旺季復活節,如果再慳啲隨時可控制於一萬蚊以內。旅途上其實咁食法,我真係無諗過可以咁平架~  依家電視都成日有廣告「銀仔旅行團,帶你玩更精彩嘅歐洲」無人聽過咩?哈哈~
講開香港這間西班牙餐廳,位於長沙灣工業區內。用其中一樣主菜西班牙炒飯來評價這餐廳,價錢貴過西班牙巴塞1/3,份量又只得西班牙嘅1/3,我覺得只有半人份量⋯ 慶幸味道尚可。點菜時見個價錢,我們4人唔夠膽叫4個主菜,只係叫左兩個主菜及兩個前菜,甜品飲品都無叫。賣單每人接近三百,個肚仲要好似無食過一樣⋯ 連港女自己都話,真係無再係香港食貴嘢嘅理由了。



這行程銀仔有少少感想:

飲食文化
由於今次是我歷來歐遊出入最多餐廳嘅旅程,而之前我亦大多獨遊而無察覺,就係外國餐廳內,就算坐滿人也十分寧靜。每位客人說話都蚊滋咁細聲,我地當然也盡量配合環境做好自己。但將聲浪盡量壓到最細仍是最嘈一枱,除非唔開聲⋯ 
我地廣東話個語調其實係好嘈,而我之前旅行時亦經常聽到吵耳嘅廣東話,尤其是旅行團嘅出現。記得幾年前做導遊帶幾個日本朋友玩香港,我個日本老友Nori向我展示旅遊書最後一頁,並笑笑口向我指出一句中日文對照嘅說話[為何香港人說廣東好似吵架一樣]。話希望大家唔好再五十步笑百步,話強國人講說話大聲,但其實自己都唔係好好多咋⋯


另外今次於歐洲幾國用餐,當地人不論早午晚餐,咖啡都係必備的。佢地食完晚餐飲咖啡,唔怕瞓唔著?難道當地人已對咖啡因免疫?


治安/安全
這又是我老生常談的問題。以這行程為例,身邊嘅人普遍認為俄羅斯好危險,西歐法國西班牙就完全無擔心過。就好似早前「四個小生去旅行」播出後一樣,好多人都話俄羅斯靚,但就危險唔敢去喎⋯ 原來口講這些人都未去過,咁你又知有幾危險呢?這行程所到南法較大城市及西班牙,就連當地人話危險。沿途不停有人叮囑我們小心財物,係巴塞地鐵內仲見到賊仔添!至於俄羅斯,本來一直都不在銀仔旅行清單,三年下來,竟然已去過三次,對當地人印象不錯,未來有機會都想去發掘俄國其他地方。第一次去俄羅斯嘅高Ling已經發現到,當地人眼尾都唔望你,根本就唔會謀住你嘅財物,感覺好安全。高Ling亦係莫斯科全程孭住個新買嘅名牌袋,單鏡大機亦不用收收埋埋怕被人搶。始終都係靠親身看過、感受過才作定論吧!(不過出blog時,俄國正值出兵isis、歐洲大城市又風聲鶴唳,安全與否就好難講了。)

西班牙一個商場內嘅提示

香港 —> 莫斯科 —> 巴塞隆拿
俄航(Aeroflot) $4750 來回連稅
(回程停留一日莫斯科)

巴塞隆拿 —> 馬賽
Vueling Airlines € 66.24 單程

租車
Benz - $6947 (八日) $1376-pp

WV Golf - $1408 (兩日) $470-pp


銀仔帶隊浮華自駕之旅圓滿結束,緊接著是橫渡非洲之旅遊記。

20 則留言:

  1. 13日行程每人都只係$15000-HKD有找咋====>要投訴你改錯blog標題呀,應該唔係浮華團而係超值團先啱XXXD
    巴塞其實近南法多D,如果夏天去埋南法沿岸果邊應該都幾正......Bilbao聽聞也值得一遊可惜未有機會去!!
    橫渡非洲===>聽個名已經吸引,已擔定凳仔等睇@@

    回覆刪除
    回覆
    1. 係超值豪華團,哈哈~ 仲要唔收小費!
      畢爾包,睇開踢波都知,呢個行程雖然無去,但令我知道個位置所在。
      擔定凳仔? 你已經係頭位啦~

      刪除
  2. 華!!!!4750真係好平呀!!!!!!!!!!!!!!!!!!!!!!!!!!!!!!仲要15000之內搞掂?!天呀...好抵呀~~~~~~~~~
    唔好笑我唔識野....
    我初頭見你去安道爾....我以為係非洲黎架XDXDXDXD
    有時唔係跟旅行書而自己發現既打反而更好更驚喜~~

    回覆刪除
    回覆
    1. 小T你都成日周圍去,我點敢笑你呢,哈哈~
      俄航雞票飛歐洲經常都好平,但依定佢同is國唔妥,都係避免為妙。
      安道爾真係好正,下次去開去埋吖!
      我真係經常唔跟旅遊書架,有時會驚喜,有時又會遇上挫折。

      刪除
    2. 你分析得好有道理..............................
      咁依家係咪應該主力搭中東三寶~

      刪除
    3. 都可能係,但搭親中東三寶通常都係去歐遊或中東,近來都是立立亂,我迴避一下先~

      刪除
  3. 咁抵,下次我要跟呢個團。

    回覆刪除
  4. 抵玩, 我都想跟呢個團!!! ^^
    去歐洲旅行, 如果找到平機票,
    不住高貴/豪華酒店, 真的沒有花費太多.

    回覆刪除
    回覆
    1. 呵呵~ 可惜只辦一團呢~
      係,機票已半價,依家香港物價貴晒,花費真係不太多。但要接受到轉機,有D人必定要直航,就算價錢貴一兩倍都覺值得。

      刪除
  5. Silver,好抵啊,下次跟埋你去旅行.

    回覆刪除
    回覆
    1. 哈哈~ 全部認識嘅blog友都身經百戰,Andrew兄見笑了~

      刪除
  6. 歐元宜家又平, 去多幾次啦 :)
    香港地方細, 人又多, 緊係比人嘈. 我聽過朋友講上海話, 比廣東話仲似吵架.

    回覆刪除
    回覆
    1. 小月,抵過短線真係唔使考慮架,不過⋯
      不過依家歐洲有點麻煩,都係避一避風頭先~
      總之大家做好自己,係自己地方嘈唔緊要,去到別的地方都係入鄉隨俗好。如每人都做好自己,自己國家或地區一定得到全世界人嘅尊重。

      刪除
  7. 飲咖啡點會瞓唔著架...我飲咗仲會好瞓d...XDDD

    回覆刪除
    回覆
    1. 其實我都唔受咖啡或茶嘅影響,都係咁講吓啫,哈哈~
      我當然知你係咁啦,經常飲starbucks!

      刪除
  8. 嗚嗚嗚.....冇得跟你個團!你唔好咁殘忍呀吓!

    回覆刪除
    回覆
    1. JJ,好似歐遊你先至係最晒家喎, 跟你去就啱! 哈哈~

      刪除
  9. 香港而家個個學發哥行山,歐洲山明水秀,整個歐洲行山團,應該有市場。
    歐洲我識路,唔駛帶,銀仔不如攪個臭豆腐團益吓六斤,哈哈……

    回覆刪除
    回覆
    1. 其實香港人真係好鍾意學人架! 早前興旅行踩單車,依家興旅行行山及參加長跑,好無性格。
      哈哈~ 美食之旅當然由港女帶隊啦~ 佢"屎唔嗅"都食架!

      刪除