Day 12 離開樂土(安道爾)

(Day 12) 2015-04-12

住宿 : Novotel Moscow

行程 : Sant Julià de Lòria(安道爾)—> 巴塞隆拿—> 莫斯科

晨早起床睇日出，真不願起床。當大家一同出到室外，嘩！ 不是因為美景，而是氣溫，真係好寒冷呢~

由天黑一直等晨光初現照片大地，等呀等，發現唔對路。前面阻擋著太陽嘅群山隨時2千米高，幾時先見到個太陽？就算見到都唔係日出感覺了，都是返回暖笠笠嘅被竇，再補眠一下吧！

外面太凍了，都係返回室內瞓覺吧

再次瞓醒食埋早餐，同屋主傾計，講吓呢間住宿嘅歷史。從照片睇到一磚一瓦都係男主人嘅父母同親戚建成，而家就由佢兩公婆同阿仔經營。佢地對中國遊客印象竟然是好好，我相信來得這山卡啦都比較有質素吧，(咦！兜左個大圈咪讚自己？) 這亦是跟我之前旅途所見嘅一樣。臨別前與屋主來一張大合照便離開，真係唔捨得這間深山住宿，同埋親切嘅屋主兩夫婦。

港女先落小鎮寄Postcard，當日郵局無開，去到旅客中心亦無郵票賣，好在職員肯幫手寄，可以擺底郵費俾佢地代勞，返到香港無耐已收到postcard。（港女按：安道爾處於法國與西班牙之間，以一般偏見來說，安道爾人既無法國人嘅傲慢，也無西班牙人嘅懶散。）處理完postcard事宜，銀仔就全速駕駛返回西班牙巴塞隆拿，因為要趕下午前到機場還車，之後上機飛往莫斯科。

再見夢想小國安道爾，希望有機會再重遊。

回程時取道收費公路全速前進，雖然未能再經過去程時嘅修道院，不過風景一樣秀麗。公路上見有好多踩公路單車往西班牙方向，唔通這些人都係來一個weekend？因為喺深山住宿遇到嘅法國情侶，正正就是趁weekend來安道爾渡假。高Ling沿途拍下大量單車照，回港後比佢無嚟到嘅男友羨慕吓。

近巴塞嘅山，好特別

一口氣揸到巴塞近郊的highway，收費道路出口職員好好人地寫咗去巴塞機場嘅路口名俾我地。可惜最後都係入錯了一個路口，兜來兜去迷晒路，大鑊！期間行極都錯，我又無信負責導航嘅港女，攪到佢黑面⋯ 好在飛機就唔趕，只係趕還車啫～ 所以話大城市自駕都係麻煩，而且巴塞嘅路牌算是極不清晰，去到好近機場才見有機場標誌。最後趕唔切搵油站入油，又唔想再迷路，遲了5-10分鐘還車，就由他收入油附加費吧，好在無收遲還車嘅罰款。

還車後我們check in先入禁區，高Ling要辦退稅，但條隊排到好長又唔郁，我與港女便爭取時間走去老麥醫醫肚。會合高Ling後才知佢排錯隊，對面無人排的櫃台先啱，應該是退稅種類不同，我無深究了。

1650時登機，五個多小時嘅機程，晚上9時許到達莫斯科。今晚入住港女係香港book定嘅Novotel機場酒店，到埗後前往Shuttle Bus嘅車站。室外已看不見十多日前看到嘅積雪，看來氣溫回升了不少。只是幾年無來，機場內部好像裝修過，戶外嘅的士都好新淨。

酒店check in時攪左好耐，因為出發前經酒店網做booking要兩間房，因網路問題重複了做左兩次booking即四間房，幾經轉折要我地自己email聯繫酒店，才取消到其中一個booking。現在check in時職員又話我們只book了一間房，如要住多間當然要pay啦！真係煩，最煩好似係酒店網bxxking.com，好似無責任咁，佢覺得網絡問題唔係佢責任，cancel一個booking後，錢又照收，但就無得住⋯

最後好在酒店方面到收取我們網上房價，不過匯率已差了許多⋯ （港女按：Receptionist係一位男士，俄羅斯人本身就唔鍾意笑，見住cool底嘅佢要夾硬擠出笑容，又幾得意。）

後來返到香港幾經辛苦才跟酒店網追回一間房嘅錢，仲要退少左二百幾，有錢退算了，好x煩!

每間房$5xx-HKD，算幾企理，梳洗好就爭取時間休息了，因為第二日要一早起身去逛逛市中心。