2015年9月1日 星期二

Day 6 邊境小鎮(西班牙Port-Bou)

(Day 6) 2015-04-06
住宿 : Hostel Juventus
行程 : Saint-Paul-de-Fenouillet —> Perpignan —> Port-Bou(西班牙)


由於今日中午要去邊境小鎮還車,所以早上準時起床,食酒店包嘅早餐。食早餐時無影相,只記得同高Ling玩電動榨橙汁機,用左4個橙先榨到一杯仔橙汁… (港女按:早餐的沙律吧,同尋晚晚餐的差不多。)
@0800

早餐後Set好GPS出發!GPS顯示只需一個多小時,途中極少停車,只記得停過一次,及去過一個機場嘅範圍,見到泊了一架中東飛機,好奇揸近啲睇吓,點知揸到去禁區入口,於是折返回大路。



Perpignan
由於幾近不停站,喺10時許到達Perpignan火車站。問清楚還車點嘅職員,就揸去附近一個商場還車。陪伴了我們五日嘅名車再見,南法浮華自駕遊亦圓滿結束。
@1145


由於今日無火車直達巴塞,要經西班牙邊境小鎮Port-Bou轉車,而1245時將會有車。如果直接去巴塞,去到已經係傍晚,所以我們決定停留Port-Bou一晚,第二朝先去巴塞。由Perpignan前往西班牙的Port-Bou車票每人€9.1,係半價,可能係非繁忙時間呱。


火車沿地中海嘅海岸線行駛,回想自己都好耐無去過地中海了... 曾幾何時,銀仔連續幾次都去地中海,東歐、南歐、北非等全都沿地中海去遊覽,而且係遊記裡仲曾經講過希望要去晒所有地中海國家添!現在覺得世界好大,想視野廣闊一點,用有限嘅生命來感受全世界。

Perpignan火車站


Port-Bou
火車一小時車程於1345到達西班牙嘅Port-Bou,由於火車站位於高地,又找不到升降機,只見長長嘅樓梯,睇嚟銀仔要為團友做咕哩了⋯

小鎮不大,只搵到一間較大的酒店及一間Hostel。我們選擇了兼營餐廳的Hostel Juventus,不知祖雲達斯是否老闆嘅愛隊。一間4人房有兩張單人床,同埋一張碌架床,好有求學時期嘅宿營感覺呀~ €96 老細話第二日放假,不提供早餐。(港女按:Juventus係拉丁文「青年」的意思,泛指20-40歲人士。我地都仲係青年,哈哈。)
住宿位於三樓,只得樓梯,又係銀仔團長嘅表演時間⋯




呢間酒店有棵大樹好得意,但比較貴一點

民宿地下是同名餐館酒吧亦是接待處

房內有洗手盆,但廁所要共用

望到地中海景


安頓好後大家先醒起未食晏,覺得好肚餓,所以落樓下搵食。先前法國大餐就食得多,要食返餐西班牙餐先~ 當然西班牙海鮮炒飯不可或缺啦,仲有炸魷魚圈、pizza等,最後又係咖啡甜品,埋單€60,算係抵食夾大件,之後喺巴塞搵唔返咁抵喇。
@1430


當時選擇景觀一流嘅露天茶座食啦,不過較為大風





食完午餐都下午4點幾了,於是喺小鎮遊覽吓,見到有華人開雜貨店,唔知佢係點搵到呢個地方落腳呢。女士們就搵麵包店買定乾糧做聽朝早餐。後來我與團友失散,喺海濱公園相遇返。沿海邊散步,行到最遠嘅防波堤,港女第一次接觸地中海咋!及後再上埋小山丘等待地中海嘅日落,同時看到Port-Bou全景。山上有墳場,以及紀念二戰時逃到Port-Bou的德國籍猶大哲學家Walter Benjamin的碑文,有一小段沿山坡而建嘅樓梯,應該係佢逃亡時經過,樓梯盡頭係用玻璃隔住嘅懸崖,行到落去都有少少腳軟。呢個小鎮好多人放狗,銀仔都諗起自己隻狗,希望有朝一日可以同佢離開香港,一齊過悠閒生活。





高Ling好似好嘆



三種語言




落山時遇到位喺當地住嘅阿姨,佢知道我們將會去巴塞隆拿,就提我地要小心手袋嘅孭法。連當地人都驚,巴塞治安可想而知。係喎!我們已來到西班牙喎... (港女按:呢度係西班牙嘅加泰隆尼亞自治區,以同法文比較似的加泰隆尼亞語為主,西班牙語為副,好多指示牌都有幾種語言,都幾特別。)
後來知道該這小鎮一個Apartment只需幾萬歐元,真係平。


剛才成4點幾先食到好飽,而且聽朝清晨要早起搭火車,所以晚餐大家都唔食了,返住宿輪流沖涼早點瞓。

讀萬卷書不如行萬里路之認識加泰隆尼亞:
關於「加泰隆尼亞人」的民族意識從何時開始、以何作為基盤而成立的議論相當多。地名·民族名的由來無固定的說法。
通說認為,加泰隆尼亞人和其他的伊比利半島住民同樣以凱爾特伊比利人拉丁人為直系的祖先,還有迦太基貴族和腓尼基人的混血,以及極早脫離伊斯蘭帝國(烏瑪雅王朝)的支配是重要的特徴。特別是受後者影響,此地域和基督教文化有深厚的連結。此外,作為一個民族最重要的,獨自的語言加泰隆尼亞語的存在。

歷史和語言所構成的加泰隆尼亞民族的自我意識,最後因為和亞拉岡王國的合併、西班牙統一而喪失直到今日。

本日行程

12 則留言:

  1. 真係有啲似宿舍喎
    大街兩旁的梧桐樹好靚
    習慣咗一餐食兩個鐘,咁返港後會唔會食得特別慢XXD
    銀團長兼做bellboy超勁呀~~~~~

    回覆刪除
    回覆
    1. 原來係梧桐樹,其實我都係唔識⋯ 哈哈~
      唔會特別慢喎,因為香港餐廳拿拿林上菜,攪到你自然食得好鬼快。
      仲好講! 辛苦過擔泥⋯

      刪除
  2. 冇早餐食有冇計平d租o架?
    搬行李行樓梯側邊好似斜路,唔可以行?

    回覆刪除
    回覆
    1. 有冇計平d租?哎呀無同佢講吓價添! 蝕左添⋯
      行就應該危險,回程用來拖D行李上去。

      刪除
  3. 出門有壯丁同司機好緊要!
    小鎮好悠閒既感覺~

    回覆刪除
    回覆
    1. 但係點解得我一個做壯丁⋯
      係呀! 所以我鍾意小鎮多過大城市架!

      刪除
    2. 我夠唔明點解次次出門都係女多男少~

      刪除
  4. Silver,60歐邏的午餐好豐富,真係好抵食.市內的樹木好特別.

    回覆刪除
    回覆
    1. 午餐仲有一碟雞肶我無upload上嚟添! 物價小鎮永遠最吸引~
      樹木好多光禿禿,都好靚。

      刪除
  5. 我鐘意食西班牙餐多過法國大餐~
    壯丁同司機係我去旅行必備嘅...XDDD

    回覆刪除
    回覆
    1. 我兩款都咁鍾意~
      壯丁同司機我都係,你請埋我仆到嚟!

      刪除