(Day 6) 2015-04-06
住宿 : Hostel Juventus
行程 : Saint-Paul-de-Fenouillet —> Perpignan —> Port-Bou(西班牙)
由於今日中午要去邊境小鎮還車,所以早上準時起床,食酒店包嘅早餐。食早餐時無影相,只記得同高Ling玩電動榨橙汁機,用左4個橙先榨到一杯仔橙汁… (港女按:早餐的沙律吧,同尋晚晚餐的差不多。)
Perpignan
由於幾近不停站,喺10時許到達Perpignan火車站。問清楚還車點嘅職員,就揸去附近一個商場還車。陪伴了我們五日嘅名車再見,南法浮華自駕遊亦圓滿結束。
@1145
由於今日無火車直達巴塞,要經西班牙邊境小鎮Port-Bou轉車,而1245時將會有車。如果直接去巴塞,去到已經係傍晚,所以我們決定停留Port-Bou一晚,第二朝先去巴塞。由Perpignan前往西班牙的Port-Bou車票每人€9.1,係半價,可能係非繁忙時間呱。
火車沿地中海嘅海岸線行駛,回想自己都好耐無去過地中海了... 曾幾何時,銀仔連續幾次都去地中海,東歐、南歐、北非等全都沿地中海去遊覽,而且係遊記裡仲曾經講過希望要去晒所有地中海國家添!現在覺得世界好大,想視野廣闊一點,用有限嘅生命來感受全世界。
Port-Bou
火車一小時車程於1345到達西班牙嘅Port-Bou,由於火車站位於高地,又找不到升降機,只見長長嘅樓梯,睇嚟銀仔要為團友做咕哩了⋯
小鎮不大,只搵到一間較大的酒店及一間Hostel。我們選擇了兼營餐廳的Hostel Juventus,不知祖雲達斯是否老闆嘅愛隊。一間4人房有兩張單人床,同埋一張碌架床,好有求學時期嘅宿營感覺呀~ €96 老細話第二日放假,不提供早餐。(港女按:Juventus係拉丁文「青年」的意思,泛指20-40歲人士。我地都仲係青年,哈哈。)
住宿位於三樓,只得樓梯,又係銀仔團長嘅表演時間⋯
安頓好後大家先醒起未食晏,覺得好肚餓,所以落樓下搵食。先前法國大餐就食得多,要食返餐西班牙餐先~ 當然西班牙海鮮炒飯不可或缺啦,仲有炸魷魚圈、pizza等,最後又係咖啡甜品,埋單€60,算係抵食夾大件,之後喺巴塞搵唔返咁抵喇。
@1430
食完午餐都下午4點幾了,於是喺小鎮遊覽吓,見到有華人開雜貨店,唔知佢係點搵到呢個地方落腳呢。女士們就搵麵包店買定乾糧做聽朝早餐。後來我與團友失散,喺海濱公園相遇返。沿海邊散步,行到最遠嘅防波堤,港女第一次接觸地中海咋!及後再上埋小山丘等待地中海嘅日落,同時看到Port-Bou全景。山上有墳場,以及紀念二戰時逃到Port-Bou的德國籍猶大哲學家Walter Benjamin的碑文,有一小段沿山坡而建嘅樓梯,應該係佢逃亡時經過,樓梯盡頭係用玻璃隔住嘅懸崖,行到落去都有少少腳軟。呢個小鎮好多人放狗,銀仔都諗起自己隻狗,希望有朝一日可以同佢離開香港,一齊過悠閒生活。
落山時遇到位喺當地住嘅阿姨,佢知道我們將會去巴塞隆拿,就提我地要小心手袋嘅孭法。連當地人都驚,巴塞治安可想而知。係喎!我們已來到西班牙喎... (港女按:呢度係西班牙嘅加泰隆尼亞自治區,以同法文比較似的加泰隆尼亞語為主,西班牙語為副,好多指示牌都有幾種語言,都幾特別。)
後來知道該這小鎮一個Apartment只需幾萬歐元,真係平。
剛才成4點幾先食到好飽,而且聽朝清晨要早起搭火車,所以晚餐大家都唔食了,返住宿輪流沖涼早點瞓。
真係有啲似宿舍喎
回覆刪除大街兩旁的梧桐樹好靚
習慣咗一餐食兩個鐘,咁返港後會唔會食得特別慢XXD
銀團長兼做bellboy超勁呀~~~~~
原來係梧桐樹,其實我都係唔識⋯ 哈哈~
刪除唔會特別慢喎,因為香港餐廳拿拿林上菜,攪到你自然食得好鬼快。
仲好講! 辛苦過擔泥⋯
冇早餐食有冇計平d租o架?
回覆刪除搬行李行樓梯側邊好似斜路,唔可以行?
有冇計平d租?哎呀無同佢講吓價添! 蝕左添⋯
刪除行就應該危險,回程用來拖D行李上去。
出門有壯丁同司機好緊要!
回覆刪除小鎮好悠閒既感覺~
但係點解得我一個做壯丁⋯
刪除係呀! 所以我鍾意小鎮多過大城市架!
我夠唔明點解次次出門都係女多男少~
刪除笑死我啦小月~
刪除Silver,60歐邏的午餐好豐富,真係好抵食.市內的樹木好特別.
回覆刪除午餐仲有一碟雞肶我無upload上嚟添! 物價小鎮永遠最吸引~
刪除樹木好多光禿禿,都好靚。
我鐘意食西班牙餐多過法國大餐~
回覆刪除壯丁同司機係我去旅行必備嘅...XDDD
我兩款都咁鍾意~
刪除壯丁同司機我都係,你請埋我仆到嚟!