2015年8月11日 星期二

Day 27 旅行・結婚・蜜月,圓滿結束

(Day 27) 2014-11-27
行程:Cancun —> 達拉斯 —> 香港


半夜三更0245起床,食咗部份尋晚買既麵包早餐就出發(港女按:好好味又好頂肚,唔似香港美X麵包空氣多過麵粉)。摸黑於公路行駛,先去還車,其間公路上不停有警車閃燈巡邏,仲截左隔離部車添⋯ 好在最後都無攪我地,準時到埗機場附近的租車公司,還車後再有職員車我地去機場。

墨西哥機場郵箱



呢程機無野食只有飲品,就食埋尋日超市買嘅麵包醫肚。


3小時機程到達達拉斯機場,有點肚餓,食十年前係香港機場曾經開過既Irish pub,食fish&chips,連埋汽水$15.99-USD。「愛爾蘭」酒吧果然正宗噃!係整條嘅魚,並不似係香港食,求其整幾條雪藏魚柳,一啲都唔抵。

達拉斯機場



呢班機好奇怪,唔full,相信都有9成客,但行李架竟然放到滿晒,我個手提行李要放到老遠,而機上廣播話可以幫大家再寄倉而唔收過重嘅費用Tim!攪左成粒鐘仲未攪掂!而另外仲聽到機長廣播,話近逃生門既位置唔可以放置物品,如有問題可要求調位,或唔喜歡這航班更可以落機!搭咁多次飛機,呢個廣播真係第一次聽咋,應該有人唔合作呱⋯ 最後delay左半小時先起飛。


航班上遇到個討厭客人坐在同一行,我地坐中排4坐位的最側,而該亞洲男人則坐另一端,隔了一個空位; 起飛無耐已經將隻腳撗跨了中間個空位"浪"起港女前坐枱邊位置,即係港女如要用將枱就要近距離對住佢鞋底! 我都知坐長途機既人通常會霸埋D空位用來瞓覺,但並唔係咁樣將腳一伸嘛!於是我善意地拍一拍他的腳,佢都放下腳。後來派了飲品,佢又將飲完D罐、杯放係個空位上,當正垃圾桶,港女多次表現出不滿嘅樣子。



不過呢程機都係衰架喇,座位又窄又頂腳,跟去程完全兩回事,長途機要瞓覺都幾攞命!附近D乘客又衰,不時打噴嚏及咳嗽又唔掩口⋯ 

旅程最後嘅亮點,就係飛越白令海峽,我地亦把握機會,去太平門個窗欣賞阿拉斯加景色。期間同幾位乘客傾偈,其中一位係菲律賓裔美軍醫生,佢講開香港的工作,知道住家工由佢祖家輸入,地盤及勞力工作等就用南亞人士等等,話好奇怪香港人做咩工作喎,我唯有話香港人唔挨得苦囉⋯ 哈哈~



讀萬卷書不如行萬里路之美洲三大文明:(分享自網上一篇精而簡的分類)

http://mike0123783.pixnet.net/blog/post/25893245#comment-41573284

16 則留言:

  1. 遇到D無品乘客真令人苦惱

    回覆刪除
  2. 呢個旅程完結,又有另一個旅程開始啦!

    回覆刪除
  3. 話咁快便完成了蜜月旅行~~
    讀萬卷書不如行萬里路,旅途中人與人的相亙交流,是最好的回憶禮物。

    回覆刪除
    回覆
    1. 都唔快了,呢個大長篇寫左好耐⋯
      絕對認同,親身體驗,印象深刻過書本、電視多多聲呢~

      刪除
  4. 有一次搭長途機隔離係個肥鬼坐,佢個肚腩D肉冚住晒我同佢中間支扶手,我見到佢都辛苦!

    回覆刪除
    回覆
    1. 嘩! 好彩我仲未遇過啫⋯ 但長途機我咁瘦都辛苦啦,何況係咁肥! 睇嚟叫港女減肥先!

      刪除
  5. 呢班機真係好騎呢! 其實好多較落後, 知識文化水平低o既國家都有唔少呢類人, 未去到識為他人設想o既level。
    "唔喜歡呢個航班可以落機"呢句宣佈會唔會太型?! 咁樣待客好似唔係咁好!

    回覆刪除
    回覆
    1. 係,出門多都見唔少,就算香港人口中嘅優越民族一樣會有呢D人。
      呢個廣播直頭型到爆燈啦~ 哈哈~

      刪除
  6. Silver,坐飛機最怕遇上衰客.

    回覆刪除
  7. 銀仔,你真係名符其實"蜜月"喎。 去足成個月咁滯。 羡慕 ^0^

    回覆刪除