2015年8月15日 星期六

銀仔帶團浮華自駕之旅

近來銀仔十分勤力,要係秋季大旅行前清晒D遊記(希望)。清完上年年尾嘅《結婚・蜜月・旅行》後,現在要加快速度寫埋復活節嘅春季旅行先~



銀仔忽然帶團?

話說有一位叫高Ling嘅中學同學,近排成日話好想跟我去一次旅行,又成日叫我攪返團。由於搵到平機票,就聯同港女一行四人,選擇了復活節去西班牙巴塞隆拿及南法。

以銀仔來講,南法租名車,夠晒浮華

西班牙租平民車


今次能一齊出發,都算機緣巧合。我同港女想趁假期去旅行,其實心目中有好多地方都想去。不過早幾個月先係加勒比海旅行結婚,及後回港擺酒,動用了不少資產,所以今次主要考慮係價錢。想平當然諗起東南亞啦,但我對東南亞興趣不大,而且復活節機票絕對不便宜,港女朋友買了機票去北海道就要$6xxx喇!

自港女同我呢個旅行癡一齊後,佢自己竟然仲迷過我,扮晒旅行專家咁,成日上網check機票。今次這程機票,就係佢check到既。趁盧布大跌,選乘俄羅斯航空來回巴塞隆拿,連稅只需$4750-HKD,長途機飛歐洲竟然仲平過亞洲!其實盧布跌到最盡時(即美金1:80盧布),機票價錢一度低至$2800-HKD咋!!!幾年前,港女第一次跟我去旅行嘅目的地就係俄羅斯。當年匯率係1:30,現在是1:60,等於半價,於是特登安排左最後一日的轉機空檔重遊莫斯科,享受吓呢個半價消費優惠先~

高Ling得知呢個超值之選後,即時話有興趣。因為她與男友正計劃去西班牙旅行,並曾經參考過旅行社的旅行團,剩係團費就索價$16xxx,咁啱見我又去,當然就一拍即合成團了。最後高Ling男友唔得閒,便由佢找來朋友Ellen加入。



銀仔向來鍾意一個人旅行,就係喜歡自由自在,唔想遷就別人,所以可能只此一團~ 哈哈~ 既然一齊旅行,我都同佢地約法三章。首先我係無plan既,我亦都唔會遷就人,如到達一個地方大家做自己想做既事,就唔使勉強齊上齊落。初步路線大家有個共識,就係由南法嘅馬賽自駕到巴塞。


大家都知銀仔鍾意去冷門地方旅行,又唔鍾意搵資料。去過長線旅遊嘅朋友,大多對巴塞南法等地不感陌生。之前同港女親戚拜年時,發現佢表姐、堂姐已經去過巴塞,實在了無新意... 高Ling亦識得有同事去過,提供了租車意見,話預先上網book定會好平,其實係咪呢?因為我都租過好多次車,從未試過上網book定。去到先租有時仲平架,例如冰島之旅,有hostel主人介紹相熟經紀。我就話去得熱門地方,旅遊貼士眾說紛紜,好難照單全收,最緊要對自己有信心!當然我都心思思上網check吓,發覺價錢合理,無話特別平,所講嘅優惠是最小型嘅私家車,每日只需€2x,但要跑山路又要載四人連行李,就絕對不合適了。從租車網站得知跨國還車要俾多幾倍價錢,便有心理準備要喺法國境內租車還車。

想到租車問題,發現銀仔原來喺世界上好多地方自駕遊過啦!整個列表先~ (認吓叻咁)
埃及/馬來西亞沙巴/智利復活島/冰島/羅塔島/關島/巴哈馬群島/開曼群島/墨西哥

多次去運輸署申請國際車牌,上年嗰張最抵玩,用嚟租過五部車~


租車與否取決於多個因素,首要係考慮交通費。如租車比搭公共交通工具便宜,計埋時間、行程嘅彈性,相信都唔使多想吧。


出發前上網搵資料,得知巴塞原來係十大搶劫城市之首,犯罪手法層出不窮,部份專針對亞洲人。俾人偷嘢反而唔係咁驚,因為被偷者有大意之處,先讓賊人有機可乘。銀仔擔心既係更為猖獗嘅㩒住搶,今次旅程有三個女仔,所以都感到憂慮㗎... 最得意係後來還有另一位女仔想加入,佢擔心搭俄航途經俄羅斯是否安全,但竟然無諗過竊匪橫行嘅西班牙法國會有問題喎。我去過兩次俄羅斯,真係安全到你唔信呀!不過,這就是一般香港人的想法吧... (港女按:雖然莫斯科之前經歷過零星恐襲,不過而家伊斯蘭國橫行,歐洲大城市唔見得絕對安全。銀仔成日都話,繁榮大都市會吸引好多較貧窮嘅人去搵食,除咗正式工作,亦唔少得偷呃拐騙。相反,俄羅斯人外冷內熱,民風比較樸實,相對感覺安全得多。呢啲都係靠親身體驗,唔好道聽塗說而固步自封。)


何為「浮華」? 這旅程是銀仔遊歷以來最浮華一次,出發獲升級特選經濟位(多謝相識多年嘅老友)。於法國租車揸新款Benz,飲食大部份出入餐廳,法國經常食各種芝士同精緻甜品,西班牙就食火腿、海鮮飯等,一餐食兩個鐘唔係閒事,絕對唔似普通旅行團只食中餐㗎!只是住宿方面較為基本啫~ 


總之,「銀仔旅行團,帶你玩更精彩嘅歐洲」類似嘅對白,好似係電視或鐵路廣告日日廣播咁,哈哈~

行程:南法/西班牙東北/安道爾/俄羅斯莫斯科

機票: 
香港 —>  莫斯科 —> 巴塞隆拿
俄航(Aeroflot) $4750 來回

巴塞隆拿 —> 馬塞
Vueling Airlines € 66.24 單程





法國及西班牙美食


20 則留言:

  1. 我都想講你近期出BLOG咁勤力,我追不切看^^
    我係搭公車, 左就右等, 時間都沒有了....

    回覆刪除
    回覆
    1. 為了D遊記唔想爛尾就要寫快D了~
      公車能夠體驗當地文化,我都好鍾意,但就學你話齋"時間都沒有了",我只不過是近期多左租車啫~

      刪除
  2. 俄羅斯真係一個好地方,我上年去完今年都心思思去多左一次,真係好正!

    回覆刪除
    回覆
    1. 無錯,俄羅斯算係我再想返兜嘅國度,該國地大物博,好多地方我都想去!

      刪除
  3. 居然帶團,真係唔似我識嘅銀仔.

    回覆刪除
    回覆
    1. 娶左老婆,人生就擴大,多左好多可能性,係多元化的發展。

      刪除
    2. 王子 - 所以咪講到可能只此一團囉,銀仔仍然是你識的銀仔。
      JJ - 未必,我做人宗旨揸得好緊架,哈哈~

      刪除
    3. 等我都做下花生友先XXD我都覺得銀哥娶咗老婆真係唔同咗,至少做浪子之餘仲升呢學識照顧團友kakakakaka....
      自駕其實更加唔駛仔細plan啦,去到邊玩到邊住到邊^^好fee....
      應洗得洗間中浮華下唔好虐待自己嘛,返來勤力做嘢咪搵得返囉!!
      我記得幾年前我果陣都係1:30~~~~乜依家平咁多@@搞到我都心癢癢:P

      刪除
    4. 你條花生友吖,哈哈~
      唔駛仔細plan <-- 都唔係架,好彩我D團友夾到我先得咋。
      今次真係用享受來形容架! 唔使心癢癢,再go啦,俄羅斯咁大真係玩唔晒。

      刪除
  4. 山城好靚喎!自駕先去到呀?

    回覆刪除
  5. 回覆
    1. 但係你都好似係寫緊法國噃!

      刪除
    2. 南法我唔係留咗好耐, 好多地方無去~

      刪除
  6. 浮華團,顯示你的旅遊模式已進入成熟階段。我都想浮華,只係浮華唔起。南法本來今年夏天都想再訪,特別想行 le chemin de St Jacque,但時間配合不到,明年無人能夠阻止到我!

    回覆刪除
    回覆
    1. le chemin de St Jacque? 乜野嚟架?係咪D修行之路?
      明年再去? 等睇遊記~
      進入成熟階段《-- 都唔係架,呢D團一次半次啦,銀仔始終有自己嘅風格。

      刪除
  7. 香港乜都貴,反而歐洲洗費一D都唔貴,而家喺香港真係乜錢都唔想洗!
    去旅行我首選係自駕,如果太長車程我先會考慮坐車,因為得毛爸一個揸...XDDD
    始終自駕真係方便同慳時間好多~

    回覆刪除
    回覆
    1. 乜錢都唔想洗咪啱囉,去旅行先用! 依家香港食外國野又貴又唔正宗又趕頭趕命,真係再無係香港食貴野嘅理由!
      自駕真係唔錯,所以我要港女去考車牌!

      刪除
  8. Silver,你真係好叻去過那麼多地方自駕遊,佩服,佩服.機票去巴塞真係超平啊.

    回覆刪除
    回覆
    1. 純粹統計吓啫,見笑了~
      係! 就係呢張機票先令這旅程諗都唔諗就成行。而最後計數總結,更超平到你唔信呀!

      刪除