Day 13 真正牙買加(牙買加Montego Bay)

(Day 13) 2014-11-13

住宿：Cazwin Villas民宿

行程：Negril —> Montego bay

晨咁早0700起床影婚紗相，用好有牙買加icon既街頭小舖做背景。當係第一間影完，再補多張，要移開張爛膠櫈之際，竟然發現我尋日唔見既行李牌喎！我都呆左幾秒，真的不敢相信雙眼呀！ 而港女亦話根據我往績搵返既機會係好高既！ 我諗遲D打一篇係失而復得既blog，個list可能水蛇春咁長呢：P

影影吓有個貌似食完大麻既雷鬼人問我地攞錢，又話間舖係佢既，當然無理佢啦！於是去了酒店門口既檔口再影，影相期間好多當地人睇住，最後索性叫佢地一齊合照tim~ (估唔到擺酒當晚曬大相放係入口，就係用上面我喺牙買加親手影既婚紗相)

太熱了，影完返去沖涼。早餐後去舖頭攞貨，尋日睇啱既，佢只拎得幾個返嚟，話唔肯定我地鍾唔鍾意。最後只揀到13個鎖匙扣，同預計的60個差太遠，佢亦唔想比昨日既discount我地。經討價還價，再加少少策略，老闆娘全部屈服！

回程開始落雨，返到去又覺得好熱，結果喺半露天既浴室沖多次涼。最後就執埋行李出reception check out，再見honeymoon，我一定會再返來架！

酒店幫我call既的士$15-USD 去巴士站，極大雨！的士司機問我地點解唔搭埋上Mo Bay，我地只好笑笑口話太貴了。

坐巴士去Montego bay，當地人簡稱為Mo Bay ，車費每人$1500-JMD($100-HKD) 呢程巴士又遇上親善大使司機，究竟間巴士公司係咪只得佢一個司機？ 倒瀉C既大雨仍未停過，敬業樂業既司機係滂沱大雨中扭幾手軚泊個好位，跟住落車搬來幾舊磚頭同埋一把遮，放在車站同車門中間，等我地唔使淋雨同踩到泥濘。然後我就同司機夾手夾腳搬行李上車。有趣既係，呢班車唔只載人，仲載左一箱箱雜貨，真係物盡其用。

個半鐘車程到達Mo Bay，已晴天再現，前日係booking.com 訂好既住宿派左個管家來接我們，似足做戲既馬姐一樣。貼心既管家知我地未食午餐，仲叫的士司機車我地先去買外賣Jerk Chicken炸雞飯，又去超市掃手信，買藍山咖啡同聽朝早餐飲既橙汁。之後仲問我地早餐鍾意食乜，話成日招呼唔同既遊客，都做慣不同既早餐喎！真係貼心！港女話成個行程只係得continental breakfast，好耐未食過蛋，所以order了煎蛋。

約遠離市區15分鐘車程到達半山區，管家同我地分享左一D牙買加稅務知識。除左買野必定要俾超過百分之十銷售稅，仲要交教育稅、建設稅等等。。。就算自己無小朋友都要比教育稅，好似好唔公平咁。我地就對銷售稅感受比較大，其實香港人真係好幸福。

經過一段山路，終於到達今晚既住宿。($96-USD)原來係一間別墅，外牆正在翻新，有一個雷鬼人正在工作，見佢咁nice即時上去吹吹水，問佢咁大把頭髮唔怕熱及點洗頭之類，佢話搵條河，浸個頭落水，沖完就Shake Shake吓頭髮就OK喎，真有趣哈哈~ 管家之後仲要港女同身在英國既老闆娘Carol玩skype視像會議，Carol話希望日後有機會親身見面後，亦不忘叫港女去trip advisor寫個好評，港女當然在管家面前都向佢老闆美言幾句啦。

以下民宿既照片是我從booking.com搵到的

我間房

女係管家，男係司機

當我們食完外賣，貼心既管家知道我地要外出時，即時替我們call的士，仲係佢一大袋既手電借出一部比我地以便聯絡，並立刻替電話卡增值，嘩！咁貼心，唔怪知係booking.com有差不多滿分既評價啦！

Mo Bay係全國第二大城市，亦可能係全牙買加最出名既旅遊城市，因為遊覽加勒比海既郵輪都會停靠於此。市中心有兩處地方較為吸引，海邊係遊客區好多餐廳，而St. James區就有好多店舖既平民區，問過好多人都話St. James 大街係safe，所以珍惜呢個機會捨棄遊客區去後者行吓。消息來源也再三提醒，一定要留在大街，唔好入橫街窄巷「探險」。

St. James竟然一D商業化都無，極之地道，一個遊客都無，不知是否5時後郵輪遊客登船離去，還是集中晒在遊客區呢？相信這裡能感受到真正牙買加。

街道上全是當地人，所以只得我兩個黃種人係街上行走分外受人注目，而且有太多唔精神，爛身爛世既雷鬼人閒蕩，可能食大麻食到”Short左”，又有太多游手好閒既人係路邊兩旁上下打量我地，又有人主動上前兜搭我們，我無理佢地，雖然無對我們做過D乜，但就感覺極度不安。好在市面都好熱鬧，又撞正學校放學，所以印象尚算正面。

我地已經好醒，出門前只帶足夠既現金、及一部後來唔見左既傻瓜機，在街上一影完即時收埋，兩手空空感覺安全D。(由於只帶遺失既傻瓜機，所以今日珍貴照片通通無晒⋯)

係這區打醒十二分精神略略咁行左一轉，超市雜貨肉檔菜檔電器服裝店統統都有，十足十一個巨型市場。當地舖頭大多圍晒鐵絲網，舖內再有一層鐵網，只剩下好似睇完醫生既取藥處來一手交錢一手交貨，可見當地治安認真一般。另外發現當地超市基本上已被華人壟斷，入到一間華人超市傾計佢竟然係廣東人，覺得我地來這裡旅行好奇怪，仲話幾危險，叫我地唔好玩咁夜。 回程既的士司機竟然覺得華人超市好，因為能提供平價貨喎。

網上St James Street圖片

行街期間買了牙買加特產 — 蔗，回憶小時候回鄉探親食蔗既情景； 之後去一個商場內，一間由印度人經營既店舖買手信作婚宴回禮，$2.5-USD一個，咁抵緊係買啦！店主兩公婆好好服務，拎左一大堆俾我地揀，揀到興高采烈之際，發現帶唔夠錢，又無信用卡，結果只買了16個⋯ 好在佢地都無嫌我地運桔，而閒談間佢地都提及曾到香港探朋友。

買手信後只剩$300-JMD即（$28-HKD)，由於開始入黑唔敢周圍行，見到間係牙買加常見既地道快餐店Patties，價錢好平，食了一個牛肉批，另一個就由於無晒D相，食左D乜都唔記得了⋯ 只記得飲品都無錢買，我唯有面矇矇去問店員拎水飲。

天已差不多黑齊，櫥窗外既街道仍然熙來攘往，似足旺角行人專用區一樣。差不多食完打電話比的士司機來接我們，等左超過半小時先到，期間港女打過一兩次電話俾佢，佢都係話on the way，係危險區域都咪話唔驚！

返到住宿上天台食蔗飲啤酒，好涼爽但有蚊！一邊回想返今日感受到真正既牙買加。遺憾既係竟然無係牙買加飲過藍山咖啡，因為明天就要離開了⋯

依家facebook出左好多關於旅行既專頁，終於有香港人講牙買加了，打呢篇遊記前港女比左呢位仁兄D網上投稿我睇。佢比我更深度遊，去左牙買加好多地方，畢竟我今次目的是來Honeymoon嘛！佢都有去過Mo Bay，但就去左跟我完全相反既遊客區，感覺極度商業化，唔知佢見唔見到Mo Bay平民既一面呢？