Day 14 兩個世界(開曼群島)

(Day 14) 2014-11-14

住宿：不知名民宿

行程：Montego bay(Jamaica) —> 開曼群島

晨早起床，貼心管家已為我們準備好早餐，尋日話我地好耐無食過蛋，佢就整左奄列，加埋喺超市買的橙汁。管家仲話沖咖啡俾我地飲，點知係雀巢即溶，削左D。。。起碼都要用特產而又唔貴既藍山咖啡吧(會唔會諗得太過完美呢)

@0700

民宿替我們預約的士$15-USD去機場

坐的士落山時見好多當地人係馬路旁行，原來司機話當地市區內無公共交通，一係的士一係步行，所以你會見到好多人係條街度行，香港真係好幸福⋯ 問點解無公共巴士，原來只係城市外圍行駛，而市內既市民都係用雙腳行走喎，唔怪得出到世界級跑手。

的士再路經尋日行既St.james 大街，原來同海邊既遊客區只係一街之隔，即隔住昨日落車既巴士總站既"Pier 1”。 的士沿海邊遊客區行駛，酒店、貴價餐廳林立，果然與昨日行街既平民St. James 大街有天淵之別喎! 

係Mo Bay機場大出血，因為買左Puma既保特T、鐵牌、帽，仲見到藍山咖啡專賣店，但比超市貴太多，就算忘記買原豆，都係忍忍手了⋯（港女按：返香港跟同事分享了一包藍山咖啡粉，用美式咖啡機沖已經好好飲。）

0915boarding，再見牙買加! 我一定會再來的! 在飛機看著好似一個個波的山頭慢慢遠去～

牙買加收穫：藍山咖啡、bob Marley掛勾、鐵牌、T裇、當地冷帽，還有婚宴派晒既牙買加匙扣

下一站會去開曼群島渡過一過週末，今次選乘開曼航空Cayman Airways，由Mobay 飛過去全程35min，在機上雜誌睇到呢幾日正值海盜節，又可以湊下熱鬧。

到達英國屬地既開曼群島，幾年來暢通無阻既BNO，係我身上終於第一次遇到些少麻煩了。 係喎! 都忘記了連英國自己都睇BNO唔係太順眼，當然連屬地也不例外啦! 佢地好好奇香港即係China，為何我們有英國護照，相信亦發現跟他們自己手持既英國護照有些少出入，解釋一番當然無問題啦! 出得門多，發現呢個世界上大部份人都唔記得了香港有回歸一事，甚至真係有部份人唔知有香港呢一個地方添! 香港，太眇小了。

走出客運大樓，只見有多隻走地雞周圍巡視，彷彿踏進了佢地既地盤一樣。 機場有數間租車公司，格價一番後租左架最便宜既韓國車，都唔記得是”現代”還是”大宇”了⋯ 租車時原來可以用$2x－USD 即時造張臨時駕駛執照，我有國際牌當然唔使啦~ 取車時隻雞又走過來對住我們嘰嘰咕咕呀!

剛才招待我們既係菲律賓人，忽然諗起自己旅遊歷程裡，我地部分香港人眼中睇唔起既南亞裔人士(我絕對無睇唔起)，他們係外國各層各業都可見到佢地，除了餐飲業，如係倫敦預約住宿既斯里蘭卡人，格陵蘭酒店reception既菲律賓人，博物館售票處等等⋯ 為何中國人大多係自己經營既商店、超市、中餐館工作呢？

取車後，一邊睇地圖一邊揸去近七里灘尋找港女係Airbnb book好既住宿。($2770-HKD三晚) 究竟呢個世界有幾多個七里灘架⋯

搵到今晚要住既住宿，無人應門，根據佢地係Airbnb溝通係話留條門匙係門口既地毯底，但就搵唔到，港女要打昂貴既長途電話比屋主，佢話唔記得留匙喎⋯

食完早餐到依家未食過野，好肚餓；午餐食Wendy’s，諗住會好似巴哈馬時咁抵食，點了一個漢堡包餐，一兜沙律，都係類似係巴哈馬既份量，兩個餐要$16-KMD，用App睇一睇，原來Cayman錢匯率係仲貴過美金，1對9.4，即呢餐要成$150-HKD呀! 差不多係巴哈馬既一倍既價錢呀!

國際金融中心、避稅天堂既開曼群島比我既印象係一個先進發達既島國，與關島類似，係七里灘附近一間又一間既大型酒店，沿路都有小型既shopping mall，而且白人較多，當然你會感到極度安全，與留左幾日既牙買加相比簡直係另一個世界，但就少了份異國風情、個性。 街上最常見係走地雞、蜥蜴等與人共存，揸車時就要經常停下來讓動物過馬路架!

先進發達既相無晒，得返D加勒比風情照⋯

食完再返住宿，屋主仍未見人，但鎖匙已在大門既地毯底了，上二樓房間放低行李，係機場攞既旅行指南睇睇開曼群島呢度有乜野好玩先~ 見一間騎馬公司Spirit of the West既黃昏騎馬有極高既評價，tripadvisor個個都比五粒星，於是就上網book左過黃昏騎馬，佢網頁介紹係海邊騎要濕水，換了沙灘褲，港女則泳衣打底就出發了。

網上照片

正常應該係有車接送，但我們即刻book即刻玩，所以自己揸車去島既北面，這一帶較為山卡啦，由於唔識路其間仲要港女打漫遊跟公司聯絡，搵了一段時間才搵到騎馬公司約我地既地點。 等呀等，見了一隊人騎馬路過，因為公司網頁稱1700開始，但我地等到1720先有人接我們，帶我地入樹林一個放滿馬既地方，有部份馬個身剛浸完鹹水個身濕晒無人打理，起初我仲以為係一個馬場，原來係一個咁既地方⋯

可能我地太遲報名，趕不及跟隨剛才所見既騎馬大隊出發，所以有專人帶領，而佢話可以唔使落水及濕身。 沿海邊行，這裡海邊應該缺乏管理，滿海都是海草，伸延到海中心，沙灘上也不時有垃圾，例如拖鞋、洗頭水膠樽等等，真是大煞風景⋯ 幸好有不算太美既夕陽。

活動期間我既坐騎經常被港女隻馬起飛腿踢，個導遊都叫我地唔好跟咁貼，但我隻馬又偏偏”Lawli賤”比人踢，於是我雙腳一夾，諗住超前的一刻，港女隻馬後蹄飛起，踢中我右腳上五寸下五寸呀! 嘩! 好痛! 即時睇住傷口流血，同埋開始腫大，腫到半隻雞蛋咁大呀! 帶隊位青年即時安慰並致電給老細，青年話其實我隻馬以前做開領頭馬的，但港女隻馬又唔like，從此就港女隻馬行頭⋯ 總之就兩隻馬互相唔妥啦! 即安排失當啦! 青年話可以終止行程，但我諗終止應該無得攞返錢，而且又開始左無幾耐咪好蝕？ 見只係皮外傷，痛楚也開始減退，當然繼續行程啦! 

日落後開始有群蚊出沒，好似係蒙古時一樣，不太enjoy。

玩完天已黑齊，只剩下老闆等候，而馬匹就咁綁在樹頭。收錢時仲話無錢找，港女諗住佢隻馬踢傷我叫佢收平D，點知我地未開聲老闆竟然唔怕面矇，話round up當比tips帶隊個後生仔喎! 真唔明為何tripadvisor D人有滿分既評價架! （港女按：無mark低幾錢，而家上網頁睇返就要$75-US一個人，認真貴。）不過天都差不多黑齊，無謂糾纏。

島既北部比較荒涼，居民多數是加勒比海黑人，好不容易搵到間當地士多，諗住買D消毒藥水，點知直頭免費借消毒藥水俾我洗傷口喎! 落後地方既人情味果然唔講得少，港女就幫襯佢地買左枝水。

洗傷口時痛到標尿，因為要洗乾淨傷口上既沙石，以免發炎，看來餘下行程唔先玩水上活動了⋯

沿路返來搵野食，但餐廳好貴唔捨得食，晚餐都係食超市杯麵，買左一大樽V8、火腿、半打雞蛋、一包plain bun，來做聽朝既早餐。

觀察超市物價實在貴得驚人，可能島國關係，一斤菜要7-8十港幣，一棵蔥$1xHKD⋯ 唔知當地人要搵幾錢先夠使。離開超市時，見到當地青年足球隊籌錢去外國比賽，擺低左1蚊美金，少少無拘啦。

返回住宿，終於見到屋主，原來係一對阿根廷夫婦，他們搬來開曼群島既原因男主人搵到份銀行工，女主人就過嚟教英文。佢地一句why not就搬來開曼群島，傾談其間發現他們都熱愛旅行，仲去過唔少地方。 “Why not” 看來係呢個結婚蜜月旅行既重大啟示。

P.S. 今日又無晒D相，開曼群島都係重災區。。。