2015年5月22日 星期五

Day 15 加勒比海盜(開曼群島)

(Day 15) 2014-11-15
住宿:民宿
行程:開曼群島


瞓醒後民宿夫婦經已外出,食完昨晚超市買返來的早餐就出發前往博物館,因某些展廳無開,收平左。


首先焗睇15分鐘短片,講解哥倫布點樣發現開曼群島及島既發展,要睇完條片才會開門架! 好在段片都用心製作。講原住民生活、後來被英國人發現呢個島,變成殖民地既歷史,片中講及呢個博物館正坐落喺島上的舊式建築物。由於無晒D相,都唔係好記得詳情了⋯ 

只記得睇過牙買加舊既英聯邦國旗,原來當年開曼群島牙買加一起成為英國殖民地,歸牙買加總督管轄,1962年牙買加獨立後,轉成英國直屬殖民地。(港女按:館內有一條時間線,睇睇下又諗返香港,同途殊歸。)


讀萬卷書不如行萬里路之哥倫布大發現:(取自Wiki)

蓋曼群島現為英國海外領地,位於加勒比海西北部,由大開曼小開曼開曼布拉克三座島嶼組成。1503年,哥倫布發現了這些散布在加勒比海上的島嶼。登島後,他們在島嶼周圍的海域與海島之上發現了許多海龜,於是將這些島嶼命名為「海龜島」(Las Tortugas)。該群島又於1523年改名為「大蜥蜴島/美洲鱷島」(Lagartos)。1530年,群島得名「開曼」(caimán)。「開曼」在加勒比語中是海生鱷魚的意思。近年來的亞化石發現表明,這種「開曼」應指的是古巴鱷。
西班牙人並沒有在蓋曼群島上定居,他們只在島嶼周圍的海域捕魚,以在旅途中獲得肉食。後來海盜也採取同樣的方法補給後勤。據史料記載,第一個抵達蓋曼群島的英國人是航海家弗朗西斯·德雷克,他於1586年抵達該群島。


而根據另一記載,就係哥倫布既發現,及命名為海龜島後D海龜就有難了,因為當年是大航海時代,長期航海好難得到新鮮既肉,所以海龜島就成了航海船隊必經之地⋯

博物館




參觀完博物館,就去尋晚book定既潛水艇每人$75-USD,成架潛水艇只得兩group人,就得我同講女及另外兩啤上左年紀既夫婦。 不過尋晚上網book位時好得意,就係今日之後既兩個時段都full晒,只剩下最早時段,但最早時段只得我們幾丁友,莫非郵輪下午才靠岸?
先係碼頭集合,然後有船載我們到海中心既潛艇,睇住潛艇深度儀開始下潛,最深達到110ft海床位置。 睇到一大片珊瑚礁,唔算得上靚,看到龍躉、魔鬼魚及呢個旅程經常食既海螺。潛水艇比多一種選擇想擁抱海洋,又唔使濕身既人。



剩返一張海底相⋯


潛艇都唔記得玩了幾耐,但都肯定超過45分鐘,上到岸後發現人頭湧湧,馬路封了做行人專用區,原來今日係加勒比海盜節! 而且遙望碼頭停泊了郵輪,唔怪知突然多左咁多遊客喇! 碼頭旁既一個小小沙灘堆滿晒人,原來稍後有加勒比海盜節既爬船比賽,各位健兒都悉心打扮,船也有特別既裝飾,如有一隊係聰明笨伯隊,有一隊係古羅馬戰士隊等等,船方面有人用一個大水筒做船,也有用木板做成古代戰船等。 


等左好耐仍未開始而且烈日當空,都係先食個午餐醫醫肚先,去左碼頭附近既肯得基$18-USD,話明肯德基就緊係食家鄉雞,偏偏門外地下招牌就有隻走地雞巡視,心諗天堂有路你不走,唔驚”掠”左你? 就係呢個咁有趣情景影左張得意照,可惜傻瓜機不見了⋯


食完肯德基後海邊濟到水洩不通,行行專用區有好多作海盜打扮既人,也有好多刑具擺放比遊人拍照,我地當然都唔放過玩吓斷頭台啦,影相其間兩個海盜走來扮行刑,而且影完仲無收Tips添! 延遲又延遲,終於日落時才開始比賽,321槍聲一響個個奮勇當先,第一個沉船就係坐滿8個古羅馬戰士既自製古戰船沉沒,之後要去到海盜圍繞一圈才可回頭,海盜船上既海盜使用渾身解數用強力水槍攻擊參賽者,也有一兩艘船開始下沉,包括聰明笨伯家族,有隻船仲要水警輪救起,觀眾個個笑到碌地! 最後第一名埋岸既係爬普通獨木舟參賽者,觀眾即時噓聲四起,在旁既更是Fxxk聲始起彼落,畢竟獨木舟無乜改裝又係勝之不武既⋯


碼頭附近一帶酒吧食市都坐滿了人,望一望價錢真係貴到唔捨得食,又未肚餓,於是係附近行一陣再食。最後去了嘉年華既小食檔,檔檔排長龍,食既好似香港食既兩餸飯,不過檔檔都係差不多既食物,因為每檔都係食龜肉,由於價錢太貴兩人食一個飯盒,$160一個疑似龜肉飯盒運沙律,飲品都唔捨得買,可能當地人覺得我地窮到燶。點解係「疑似」?因為「龜肉」黐住D骨頭,上網睇過,都仲未肯定龜係咪有骨,唔知呢度有無高人可以指點一二?



晚上band show,係年紀比較大的band友,但好識搞氣氛,真係啱晒港女喜好,大家都係飲啤酒、同喬裝成海盜既人影相,其中一個仲係冷氣技工,派左張卡片叫我地寄返張相俾佢。Band show後有一個「獄卒」帶左一班「海盜」上台,搞左一輪,由島上總督宣布其罪狀,其間獄卒及總督反被海盜挾持要求釋放。總督唯有將海盜獲釋,同時開始放煙花。
現場完全唔見有人set腳架影煙花,亦都無人霸頭位,而從多年遊歷所見,香港人及中國人對攝影已達瘋狂程度。 外國人旅行通常較少用大機,而香港人基本人人一部單反; 撞到有D”器材派”朋友,其實佢地D相一般,甚至連點樣影景深都未識,就已經不停追求新款既器材,就係因為話頂級相機影D相靚D喎! 
(港女按:香港向來煙花特別多,開曼群島既煙花實在只屬鄉村偷雞級數,不過第一次喺外地睇煙花,而且唔使花幾個鐘霸位,又別有一番風味。)

無晒D相,上網搵到段youtube來回憶吓


小弟第一次影煙花相


口渴到一個點,活動完結後即刻飛車去超市買飲品,擦左好耐,最後好似揀左果汁?定Vita Malt?? $10 因為覺得Vita Malt好飲,買左兩支返去請屋主兩公婆飲。

14 則留言:

  1. 博物館睇過,龜係有骨架.
    http://www.infovisual.info/02/021_en.html

    回覆刪除
    回覆
    1. 我之後都有search,係唔相信啫,乜原來真係有,哈哈⋯ 但當晚檔檔賣龜肉,何來有咁多?而且海龜受保護,我相信係應節改個咁既名,純粹噱頭啫。

      刪除
  2. 龜肉飯聽落好似有啲驚,唔係好敢食:P
    藍色EIIR郵筒好得意,未見過^^
    咁其實開曼群島本土人係咪都係拎英國護照㗎呢?

    回覆刪除
    回覆
    1. 無錯係用英國護照,因為英國屬地,好似世界零距離講法屬圭亞那拎法國護照一樣。
      香港有少量既綠色郵筒,得意嗎?
      我成日覺得果D唔係龜肉

      刪除
  3. 嘩........加勒比海盜, 感覺好遙遠, 我個腦只係浮現到johnny depp個海盜look出o黎 ^^
    完全同意香港人d攝影器材真係好癲, 人人一部單反係指定動作! 但印像中去極地o既老外都係重型攝影器材, 西歐中歐o個d就多數用輕便相機仔。

    回覆刪除
    回覆
    1. 唔遙遠,你成日都去好遠噃!
      之前去格陵蘭見到d丹麥人都係帶N年前既傻瓜機咋

      刪除
  4. 龜肉飯係咩味,好得人驚,我未必敢食...

    回覆刪除
  5. 拍得好靚的煙花相. 開曼群島好有英國色彩.
    係烏克蘭, 日本北海道, 都看過煙火, 都是在酒店看到, 唔使霸位.
    外地的煙火大部分都係小兒科. 香港的煙火真的是大制作.

    回覆刪除
    回覆
    1. 唔好玩我,拍到爆晒光,你讚我實比人笑死!
      香港每次都大製作,一年又好多次,浪費金錢⋯

      刪除
  6. 旅行最開心遇上當地的節慶.

    回覆刪除
    回覆
    1. 係呀! 呢個旅程遇到兩個!
      但我通常都避開D大節慶,因為怕多人又貴住宿又搵唔到。

      刪除