Day 8 情定巴哈馬(巴哈馬群島Harbour Island)

(Day 8) 2014-11-8

住宿：Valentine's Resort & Marina

行程：Harbour Island

今日係我地既大喜日子，並且搬到一間較豪華既酒店，就是替我們辦婚禮既酒店。一早起身喺原來酒店食早餐，之後就執包袱去新酒店。新酒店都幾慷慨，早一晚打嚟話可以提早入住，以便準備婚禮事宜。入到酒店房，都覺得性價比合理。港女一枝箭走去沐浴更衣，銀仔亦爭取時間淥咗兩個杯麵。

我地真係好彩，因為酒店之後爆水喉，完全無水用。香港人結婚，最多就係人，化妝髮型師、攝影師、兄弟姊妹、父母親戚一大堆，今日港女同銀仔一腳踢，搞到酒店房亂晒籠。約咗下午3點半出發，酒店職員3點鐘先拎份誓詞過嚟，銀仔不停練習，可惜主婚人決定用問答形式進行，白費咗銀仔一番心思。

我地住其中一間房

不知是否因為我們是結婚套餐才有呢？

有露台不過無時間享用

送香檳

呢條淘寶婚紗唔錯~

開頭諗住儀式用英文，會無咁入心。原來到嗰一刻，互相捉住隻手，聽主婚人讀誓詞，逐句問我地願唔願意，加上海浪拍岸嘅自然樂章，都會令人熱淚盈眶。不遠處有另一對新人喺十數名親友見證下結婚，而我同銀仔就只有主婚人、兩個充當見證人嘅酒店職員、攝影師，有一種「世界只得你和我」嘅感覺。其實我地已set好腳架影低呢個一生人一次的時刻，希望可以喺婚宴同賓客分享。可惜隨住遺失相機，呢個片段又變成腦海中的影像。

交換戒指、揭頭紗同埋簽咗一堆文件後，攝影師就捉住我地影相。本身個套餐係包一小時攝影，但結果係由剛才其中一位酒店職員，揸住高爾夫球車載我地去Harbour Island地標影相，就係一棵枯樹。日落時候剛好水退，又有一片金黃色，第二朝再去影相，已經行唔到出去。影完相就返酒店，沿路接受途人祝賀，本來自拍左好多相，但又唔見晒，只好在心中。由4點影到天黑齊，可見佢地都唔太計較。影相途中，撞到酒店常務經理，佢話今日酒店爆水喉，唔好意思，要請我地食飯補數。我同銀仔心諗，今晚終於可以盡情食。

酒店係粉紅沙灘上佈置一個"龍門架"來行禮

男既係官員，而女既係酒店經理及其中一個證婚人

以上結婚相全是攝影師影的，只不過係我懶得改浮水印

返到酒店房，已經非常疲累，本來打算沐浴更衣，但等極都未有水，所以就先去食飯。到達餐廳範圍，見到酒吧好多人，而餐廳就得一張枱佈置晒蠟燭、鮮花，咁大個人都未試過包場食飯，之後有客人想喺餐廳食，都俾侍應帶左去第二度。

新婚第一頓晚餐，銀仔本來都預咗食好啲，而家更加可以由頭食到尾。

麵包籃後，頭盤係水牛芝士蕃茄沙律，水牛芝士好似漢堡扒咁厚咁大塊。跟住係靚女餐飲經理推介嘅芝麻吞拿魚，日系菜式，吞拿魚表面略烤，蘸上芝麻，裡面係生嘅，點wasabi同豉油食，仲有小量中華沙律。

再嚟海螺周打湯，一碗兩份飲剛剛好。

跟住到主菜，叫咗一塊牛扒，同銀仔好想食嘅鬼頭刀Mahi-Mahi。牛扒叫咗medium，結果熟到不行，浪費咗食材。鬼頭刀就唔錯，而且喺香港食唔到，要珍惜機會。

食到呢度已經極飽，侍應話為我地準備咗甜品拼盤，我地話要一份就可以。拼盤有雪糕、朱古力蛋糕、青檸批、蘋果撻等，最後都剩返少少。難得唔使埋單，銀仔都留低咗貼士俾成晚幫手斟茶遞水嘅女侍應。

婚後晚餐，港女手機影既唯一照片

P.S.兩個人的結婚套餐盛惠1500美元，包一位主婚官員、兩位證婚人（酒店職員）、行禮場地的簡單佈置、香檳一枝、一小時攝影。當時的套餐不包房間，要自己加錢住一晚，我地揀了最平的園景套房，都要295美元咖（加21%服務費及11美元resort fee）。而家再上佢地嘅網頁睇，已經推出咗4日3夜的結婚套餐，不過唔知幾錢。

由詢問package到結婚當日都好滿意，可惜服務性行業好多時會out of sight, out of mind，或者過左海就神仙。同Harbour Island講再見後，竟然要追返佢地轉頭。結婚證書就等了個幾月先收到，結婚相就只得少量低解象相片，同攝影師、酒店職員久經交涉，都未及喺婚宴前收到適合晒大相的相片，非常可惜，只可以用slide show分享。執筆前，攝影師剛應承會寄返光碟俾我，希望結婚一周年前會收到啦。

By 港女