Day 15 重拾相機(寮國琅勃拉邦)

(Day 15) 2014-6-3

住宿：Thony 1 Guesthouse 

行程：琅勃拉邦

受傷後終於再次拿起相機，計計吓足足有五日了! 0515起床出發影布施！ 因為幾日前只係布施，無乜點影相。

雖然早幾日前已親身布施，今日以第三者身份再感受，回想返當日既布施，真係施比受更有福呀！ 最後影了張自己非常滿意既照片~

睇完布施返去再瞓；瞓醒後食麵又返Hostel，只食個麵啫，個人溶化了...

食左好多餐既餐廳

到下午時候，去租車公司，相約好老闆Say車我去醫院覆診; 老闆Say提議不如先自己拆除繃帶，因為佢話上次睇住個醫生唔理我死活，係咁搣黐住傷口既沙布喎… 好提議！並叫靚仔Siay出去買鹽水等用品。

幾個人小心翼翼幫我都拆左個幾鐘，因為我怕痛嘛！

拆完後發現傷口大部份都極輕微，只不過係大範圍咁解，都唔去醫院啦! 叫靚仔幫我買黃藥水洗洗，過了半小時已全部結焦了，包括最嚴重既手掌。

一攪攪成兩個鐘! 下午茶老闆Say叫人買燒雞食，太飽了～

看見肥仔”阿醒”(來來去去都係呢D發音)，大熱天時3,4十度高溫，有時做勞力工作時，總是著住件冷衫； 而來到寮國後，發現當地年青人都經常著牛仔褸等外套，何解呢？於是問老闆阿Say，佢話就係要型囉! 阿Say同我都頂佢地唔順! 咁鬼熱，最好除晒! 最後都成功勸阿醒一齊玩除衫影相，哈哈~

我留在琅巴班（琅勃拉邦）算是尾聲，所以黃昏時老闆娘提議上Posti普西山，於是同埋靚仔Siay，三人一齊去，當地人上Posti係唔使錢的! 

上到去頂部既Posti塔內，Say 替我們每人買了每人兩盤花，他們原來都好誠心拜神架，仲求籤Tim！ 我在後面觀看，最後都叫我求埋一份，求得28號籤，但架上既28號籤文無晒，於是再求多次仍是28... 好神奇呀！ 即沒有答案啦...

阿Say對員工好似對朋友一樣

晚飯一齊去食本地餐，有冷氣，但好貴，靚仔就最開心，因為佢好少食咁貴既野，其實4點先食完燒雞，依家都有D飽！ 

食飯時叫靚仔比心機幫手，因為世界上好少搵到個當員工係朋友既老闆，係工司內每餐都一齊食，打成一片，所以靚仔都話如老闆外出，佢地全部人都會好肚餓架！ 哈哈～

鎮上大部份地方都望到普西山既普西塔架!

返住宿時由我駕駛，靚仔建議遊車河及去我炒車既現場； 由於現場係城外約8公里，路面無街燈照明，尋找現場其間老闆Say突然攞把手槍出來上膛⋯ 嘩! 做乜事!!! 原來佢話怕危險喎！ 話D緬甸人會殺當地既女人同小孩喎！ 既然佢咁驚都係回程吧！