Day 9 與佛有緣(寮國琅勃拉邦)

(Day 9) 2014-5-28

住宿：Thony 1 guesthouse

行程：琅橋—>琅勃拉邦

早上瞓醒後，係美景下享受一頓豐富早餐先～

計計吓停留了琅橋小村好幾日，係時候要走了! 食完早餐係露台呆坐，唔上網，唔做任何野，靜靜感受最後既寧靜...

搭船漂流落琅巴班(琅勃拉邦)，被LP喻為必定要搭既旅程! 1100到達碼頭，但無船落琅巴班，佢話唔夠人所以無開，再問之後幾日都無⋯ 其實好多乘客都想坐船落琅巴班，起碼十幾人! 咁多人都話無! 不如唔好辦呢條航線啦！ 其實都幾失望，最想就係坐呢程船嘛… 眾人當知道無後，全部人坐篤篤車去琅橋巴士站（$5-HKD) 再轉小型巴士往琅巴班（$40-HKD) 

4小時車程，係1410到達琅巴班南站，去市中心只係5分鐘車程，篤篤車兜客竟索取每人$20-HKD，價錢係剛才坐5小時車程既一半呀！ 離晒普! 我咁有性格梗係唔坐拉，烈日當空下步行去，而老外們就上晒車了～

其實步行十分鐘就到市鎮邊皮範圍，20分鐘就到中心區域，一直想搵早前新加坡人及內地遊客所講既PDQ Guesthouse，但都未搵到，天氣嚴熱背住沈重背包下求其搵左間Guesthouse，叫Thony 1 Guesthouse，屋住係一位婆婆，三代同堂一齊經營，一間房$90000-KIP($90-HKD)

進入市中心必經既橋，左邊車行，右面人行

好似好危險咁⋯

琅巴班這裡有個傳統，僧人每朝都於街上接受民眾用造好既飯來佈施，而遊客可以買定d生果作佈施之用； 我便突發奇想想學當地人咁親手造一頓飯來報施，並向婆婆提及明早想佈施一事，婆婆話聽朝會好似媽媽咁叫我起床，造埋飯比我一齊去佈施喎！ 佢個孫話婆婆是風雨不改的！

放低行李去今日算係唯一要去既景點，普西山Phousi

一出路口問正在落客，騎著電單車既學生妹妹普西山方向，仲順風車車埋我去tim~ 太好了~

普西山上有彿寺彿塔，景觀一流，望到整個城鎮，眉公河，南汗河； 

寺內既僧人太多會講普通話，仲遇到兩名國內漢語年青老師，話來交流； 當我講出我既心聲時，話咁好傳統要保持落去，現在地球一體化既同時好多傳統正在消失，即係我成日係遊記提及既，又係果句"慎終追遠" 囉！老師聽完即時話很喜歡，並很同意我講既說話，仲話好欣賞我，話呢D說話通常出自老人既口中，好難想像出自我後生仔既口中喎！ 我仲後生咩！ 人到中年三十幾啦！

琅巴班係一個小鎮，但已算是北部較為大了

於是係山頂得待日落，見仲有好多時間，搵個靚位一面欣賞風景一面慢慢等～ 而好多遊人亦跟我一樣等待日落架～ 等待時遇上一個韓國女仔坐在我身旁，便坐過少少騰出空間，於是交談起來，通常都係被問及幾多歲，結婚未之類既問題，佢叫Anna原來曾經係東北住過並做過韓語老師，27歲未婚，愛攝影，又係一個來旅行，不過傾太耐都唔係太好，都係自己行開吓⋯ 

日落時遊人聚滿山頂，其實日落既位置唔太好，構圖也不美，以我既技術影唔到靚相，所以我放棄影，用眼睛親身來感受，回想自愛上攝影後，真的無乜邊幾次用親身來感受，既迅速又動人既日落了～ 

日落完我再等埋magic moment，此時韓國女仔Anna同我講有好多蚊咬佢，要下山了，就像是叫我陪佢一齊下山一樣（可能我諗多左）我坐著無動於衷，於是雙方匆匆交換了Facebook 後就落山了，佢臨離開前問左我一句說話，問我有無計劃去韓國玩，我說實話，真係無! 佢就失望離開了…

不久我都落山了，從另一面通往夜市既樓梯落山，樓梯無街燈，要開電話照明； 係夜市行左一圈後，有好多手工藝品，又有傳統食物，但寮國傳統食物全是燒烤，怕熱氣既我都係算吧... 最後買左條褲後，就係一間法式風情餐廳食飯，再飲埋我呢個行程最愛既fruit shake便步行回程。

回程去到一條河邊，長長竹橋既陌生地方，睇地圖之際有兩個日本妹也迷失了，要借我地圖一看，看完也算同一方向，於是一齊行；其中一個係做護士，話日本做護士太忙，要辭工出走一年喎！ 係香港既護士其實也好忙... 最後佢又係問我係咪study喎！乜我真係咁後生咩！