Day 7 氾濫的遺產(蒙古哈喇和林)

(Day 7) 2012-06-16

住宿 : Anar Camp

行程 :蒙古沙丘 —> 哈喇和林

一早騎駱駝$10000-T per hour, ($50-HKD),約大半個鐘就回程，無所謂啦，如騎過駱駝既話都知唔係太好受...
不過係中亞地區獨有既雙峰駱駝則第一次騎，早前係哈薩克只係見過。

騎完之後就前往蒙古既舊首都哈喇和林進發; 短短100km既路程因修路就要兩個小時車程... 初到哈喇和林，只見一片荒蕪，就係因為太荒蕪，令到風沙特別大，真的很難想像這是最強盛時蒙古帝國既首都... 不過最有睇頭，可以用一個字”大”來形容，就係額爾德尼召寺!

鶴既蒙古語叫"扥豁loon"

午餐

遠睇額爾德尼召寺，幾大!

射鵰英雄傳! 玩一玩都係港幣廿零蚊，抵!

呢個寺範圍基本上大個整個市中心！ 入場免費，內裡主要有三處廟宇建築群，但要入廟堂則要比$3500-T($18-HKD)連導遊,寺廟影相費用$35-HKD。 開頭咁貴諗住都唔影，不過當係添香油啦~ 我們只係入左佛祖廟宇建築群，分別講述釋迦牟尼的老，中，青，內裡有大量唐卡，畫功精緻。

寺既城牆

寺內一望無際咁大

額爾德尼召寺，於16世紀建成，係蒙古第一座佛教寺廟，及後經歷多個政權既迫害，包括蘇聯史太林，蒙共，僧侣被屠殺或流放，現成為一個博物館，於2004年成為世界文化遺產; 

講開世界文化遺產，覺得太濫太多了，連”法國美食大餐”都係遺產，我諗咁車仔麵，嗅豆腐，獅子山都要了⋯ 所以旅行時我都無乜特別著意，乜野都話係文化遺產... 

因為自己都鍾意歷史文化，自己覺得有興趣咪睇囉！ 呢個廟背後有豐富既歷史，經歷興衰，於2004年成為世界文化遺產; 而香港既志蓮淨院都學人申請做世界文化遺產，興建左好似只係短短20年不夠，有乜歷史？有乜遺產？ 志蓮淨院，都係算把啦！

之後去到寺外圍北面既龜石，用來守護舊既哈喇和林城池的，所以古時哈喇和林既遺址就在這裡，全部一片頽垣敗瓦, 亦都無好好保存。只有地基健全，而地上好多一片片既爛磚頭，上面有一層經歷風霜既塗彩，可能全都是過千年既文物; 於是係呢個荒涼既遺址，平靜地穿越時空，閉著雙眼來感受這裡曾是版圖橫跨歐亞既蒙古帝國，千萬蒙古鐵騎既基地... 

地基

之後要去LP講城西營地，那裡位於河谷，風景壯麗，但個司機唔知係咪講極都唔明，定係先入為主，成日話頭先食飯度有得住... 最後經人地既導遊協助下，佢先車我地去... 所以有當地既導遊或當地人帶領，往往都有這個情況發生; 如早前去埃及，朋友醬爆叫左佢既翻譯同我玩左一日，我話想搭地鐵，而佢就話地鐵唔好，搭的士都一樣！

去到河谷，入住一個名為Anar Camp； 原來LP都有介紹，仲話好商業化tim。經講價後，兩人$95000-T(即$475HKD)連晚，早餐，價錢都算唔錯！

晚飯食完正想走既時候，聽到門外有音樂聲，原來有民族音樂show睇，不過睇完之後其中一個表演者話要收錢，每人$10000-T($50-HKD)... 吓！咁咪即係老屈？ 事先又唔知有show睇，依家唔係自願情況下俾錢睇喎... 經解釋後，職員話唔收我地錢，不過我就覺得攪到尷尬囉！ 果然好商業化吓！ 後來返到蒙古包，原來有單張話有show睇架，但係9點而唔係7點囉，況且無寫價錢！！！  

呢個Camp有源源不絕既熱水沐浴，高級既坐廁，但就少了點純樸...