Day 6 銀河下的沙丘(蒙古Mongol Els)

(Day 6) 2012-06-15

住宿 : Mongol-Aktai

行程 :蒙古烏蘭巴托 --> 蒙古沙丘

蒙古短短幾日既餘下行程，諗住租車去蒙古既舊首都哈喇和林一帶，途徑一個小沙漠及一個湖作為終結; 我諗到個奇妙既想法，就係唔係去揾租車公司，
而係先去尋晚full晒，就係Seoul Hotel隔離既Hostel, book定最後一晚既酒店，順便問吓租車資訊。

到達時，職員叫我地直接問Hostel個負責人，而呢位負責人可以操流利英語，俾了hostel訂金後，亦好樂意解答問題。我講我既計劃，Hostel負責人都大讚我既行程tim~都話以幾日短既時間，可以睇晒沙漠，湖等景色是最理想！ 

於是負責人並幫我地即時揾車，每日$45-USD連司機油錢，佢既食宿另計，一係包晒佢，一係就每日比$10000-T(即$50-HKD)佢自己攪掂; 負責人話後者係公價，也較好，因為司機都係為揾錢，你比左錢佢，食同瞓佢自己揀，可能瞓車都未定~

自駕問題佢即時話你唔使諗，因為買保險好貴同D路況很差喎... 咁都啱既，蒙古租車連司機發展得咁好，咁容易比遊客租到車自己揸咪好多人失業！

比錢要靠港女既paypal，原來要付錢或收錢一方俾約5%手續費，但hostel負責人就好豪爽地話佢俾手續費就可以，咁就慳返十幾蚊美金。

用極速食左個早+午餐，再買左D物資就返酒店攞埋D行李即時出發; 坐既車有點失望，以為係四驅車，點知只係韓國普通既私家車... 因為呢個價錢應該租到架好d...

@1200

首都有大城市既特質，就係塞車！ 好不容易才離開中心範圍，司機買左條後備軚，車既零件就上路喇！

首都外圍既公路，沙塵滾滾! 再行駛多一陣到達郊外，看到蒙古包，見到遊牧民族放馬牧羊，呢D先係蒙古真正既一面! 離開城市，心情都開朗D呀~

5個小時後到達蒙古沙丘，講開呢個蒙古沙丘，就係上網揾資料一個專欄所講既巴彥戈壁; 從Lonely Planet 得知巴彥戈壁係另一個地方(南戈壁省)，事實上這裡是”蒙古沙丘Mongol Els”! 攪到我揾餐死!!! 寫blog就可以無責任，但報章專欄就應該要謹慎點吧！ 你話係咪？？？

其實這裡有一間較大型既營地住宿外，仲有其他司機推介既蒙古包既民宿，民宿係好吸引，不過我地黎有個主要目的，就係入沙丘影婚紗相! 所以入住專欄所講緊貼住蒙古沙丘既大型住宿係不二之選! 

這個蒙古包營地係荒郊來講設備算是完善，職員十分友善！ 住既係蒙古包，有床有枱正中有個火爐用來燒柴取暖。 

將行李放好就即時去沙丘KO D婚紗相先~ 個零鐘頭後影完後食晚餐; 營地內還有另一個應該係當地團，晚飯後勁歌熱舞開party! 

飯後返蒙古包，見到好多，約十幾隻飛蛾係頂部係咁飛，即時揾職員協助！ 個男職員用掃把不停驅趕，見佢出晒汗終於或趕走或打死攪掂晒... 而佢見我地正燒柴透火取暖，個職員見我有點雞手鴨腳，即時協助⋯ 佢話最緊要係第一條柴，要用薄，易生火放係最外面用來透火兒，之後裡面既就放厚柴; 只見他用區區約半張六合彩票既小紙皮，就可以生到個熊熊大火喇！！！ 

之後而我地沖完個微暖水涼，算可以接受了... 沖完後返來D柴已燒完，我依樣畫葫蘆咁透火，真係得喎！！！ 銀仔又學到野啦~ 諗返早前係貝加爾湖，燒左人地三條長紙皮都未能生火，諗返都覺攪笑呀~

等到完全入黑，連月亮都落埋就開始影星星啦，但個銀河打橫行，在地平線中，硬係唔升晒上黎，只影到一半既銀河...

影完銀河返到蒙古包，D柴又燒完了... 由高分低能既港女試吓透火，佢都一次就成功啦~ 

高分低能呢個近期香港幾hit既用語，用來形容D學生讀書好叻，考試好高分，但就好多野都唔識，不能自理，如綁鞋帶等... 而我則是低分高能，哈哈~