Day 5 韓國風(蒙古烏蘭巴托)

(Day 5) 2013-06-14 晴

住宿 :Seoul Hotel $40-USD

行程 :俄羅斯Sljudyanka —> Ulan-Ude —> 蒙古烏蘭巴托

0500列車到達Ulan-ude, 今個行程就只是搭這程短短幾小時既民用西伯利亞鐵路咋! 可能有人問點解唔直接搭西伯利亞鐵路去蒙古？
因為從資料顯示，係邊境關口最少停留4小時，Lonely Planet亦講曾經試過停10小時! 我地今次假期又唔係長，無謂浪費時間啦! 與其停4小時係邊境，不如直接坐10小時既巴士落烏蘭巴扥仲好啦~

一出火車站遇到好好人既兜客女司機，$200-RBU車我地去前往蒙古既巴士站(即Lonely Planent所講既Hotel Baikal)，途中仲車我地兜一個小圏慢駛拍照，傾談其間佢話曾經去過韓國工作一個月喎~ 

去到酒店，個司機好熱心咁幫手問酒店職員過境巴士巴詳情，及後竟然揸埋去蒙古大使館按人門鐘Tim! 咁早當然無人應門啦! 之後用車再送我地到上車地點，即穿過酒店旁既噴水池，見佢咁好人緊係額外再醒多$50-RUB佢啦~ 見仲有粒幾鐘，咪問佢邊度有野食囉，點知佢仲話唔使錢車我地去tim! 嘩!!! 真係太好人啦~ 車到去類似老麥既餐廳，仲話等埋我地食完再車我地返巴士站喎！ 真係唔好意思，咪諗住請佢食早餐，點知佢拍一拍個肚腩，話怕肥唔食係度等喎... 佢真係太好人啦，再比多$50-RUB佢，叫佢唔使等啦~ 臨走仲話一陣會到巴士站揾我地tim!

天未光到達Ulan-ude

蒙古大使館

穿過噴水池就係搭巴士既地方

0730發車，開車前一刻掛住呢位阿姐tim,最終無出現... 希望佢又揾到第二個客仔吧~

漫長既車程十分好瞓，路況也比想像中好; 過關時有兩間找換店換錢，過境後車到去一個用膳既地方食午飯，品嘗第一餐既蒙古菜~ 唔識俄文蒙古語，唯有指其他人點既食物啦! 水煮羊肉湯，羊肉飯十分美味! 價錢亦合理~ 

中途景點

10個小時既車程，係1700到達蒙古首都烏蘭巴托，落車地點係火車站。

烏蘭巴托最多既係卡拉ok同酒吧，機本上梗有一間係左近~ 去到最繁忙既大街，揾到心儀既Hostel,但就滿晒... 於是就係不遠既Seoul Hotel落腳($40-USD), LP講呢間酒店一樓係脫衣舞場，但就無時間觀摩... 

火車站

首都主要走韓國風格，超市餐廳日常用品全都大吹韓國風! 大街有摩登建築，大型商場，香港有既牌子都可以係呢度揾到! 市區大街有一間現代化廁所，不過小孩仍是由家長陪同下周圍痾，可能真的是文化不同，跟國內人一樣需多多包容; 這裡最令人留意既係當地女仔，大都樣靚身材正，皮膚白又識打扮! 

大型百貨

呢個係小數既肥女人

由於港女早前整爛左副太陽眼鏡，蒙古陽光咁猛烈一定要買啦！ 係Adidas專門店用左約$600-HKD買左副陳列品，有少少污糟... 所有櫥窗既太陽眼鏡都無新既，都唔明點解？

晚餐食pizza及意粉

買水果既地方